− باش شۇجى شى جىنپىڭنىڭ پۇقراۋى كارخانىلار سۆھبەت يىغىنىدا قىلغان مۇھىم سۆزىنى ئۆگىنىش، ئىزچىللاشتۇرۇش توغرىسىدا
□ خەلق گېزىتى ئوبزورچىسى
«پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتى توغرىسىدىكى ئاساسىي فاڭجېن ـ سىياسىتى جۇڭگوچە سوتسىيالىزم تۈزۈم سىستېمىسىغا كىرگۈزۈلدى، ئىزچىل چىڭ تۇرۇلىدۇ ۋە ئەمەلىيلەشتۈرۈلىدۇ، ئۆزگەرتىشكە بولمايدۇ ھەم ئۆزگەرمەيدۇ».
2 ـ ئاينىڭ 17 ـ كۈنى ئېچىلغان پۇقراۋى كارخانىلار سۆھبەت يىغىنىدا، باش شۇجى شى جىنپىڭ مۇھىم سۆز قىلىپ، پۇقراۋى ئىگىلىكنىڭ تەرەققىياتىدا قولغا كەلتۈرۈلگەن زور مۇۋەپپەقىيەتلەر ۋە ئۇنىڭ دۆلەتنىڭ ئىقتىساد، جەمئىيەت تەرەققىياتى ئۈچۈن قوشقان مۇھىم تۆھپىسىنى تولۇق مۇئەييەنلەشتۈردى، پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتى توغرىسىدىكى ئاساسىي فاڭجېن ـ سىياسىتىدە ئىزچىل چىڭ تۇرۇپ ۋە ئۇنى ئەمەلىيلەشتۈرۈشنى مۇپەسسەل يىغىنچاقلىدى ھەم مۇنداق تەكىتلىدى: كەڭ پۇقراۋى كارخانىلار ۋە پۇقراۋى كارخانىچىلارنى خاتىرجەم ھالدا تەرەققىياتنى كۆزلەشتىكى «خاتىرجەم قىلىش كۇمىلىچى» يېيىش ئىمكانىيىتىگە ئىگە قىلىپ، پۇقراۋى ئىگىلىكنىڭ ساغلام تەرەققىياتى، يۇقىرى سۈپەتلىك تەرەققىياتىنى ئىلگىرى سۈرۈش ئۈچۈن ھاياتىي كۈچ قوشتى.
1980 ـ يىلى جېجياڭ ۋېنجوۋدىكى جاڭ خۇامېي تۇنجى يەككە سودا ـ سانائەتچى تىجارەت كىنىشكىسىنى ئالدى. 40 نەچچە يىلدىن بۇيان، ئىسلاھات ـ ئېچىۋېتىش باھار سۈيىنى جانلاندۇرۇپ، ئىسلاھات دولقۇنىنى مەۋج ئۇرغۇزۇپ، پۇقراۋى ئىگىلىكنىڭ تېز تەرەققىي قىلىشىغا مىسلىسىز تارىخىي پۇرسەت يارىتىپ بەردى؛ پۇقراۋى ئىگىلىك كىچىكلىكتىن زورىيىپ، ئاجىزلىقتىن كۈچىيىپ، ئىسلاھات ـ ئېچىۋېتىش ئۇلۇغ مۇساپىسىگە ئەگىشىپ جۇش ئۇرۇپ راۋاجلىنىپ، مۇقىم ئېشىش، يېڭىلىق يارىتىشنى ئىلگىرى سۈرۈش، ئىش ئورنىنى كۆپەيتىش، خەلق تۇرمۇشىنى ياخشىلاش قاتارلىق جەھەتلەردە تەڭداشسىز رولىنى جارى قىلدۇرۇپ، دۆلىتىمىزنىڭ تەرەققىياتىغا تۈرتكە بولۇشتا كەم بولسا بولمايدىغان مۇھىم كۈچكە ئايلاندى. مەيلى تەرەققىياتنى كۆزلەش، يېڭىلىق يارىتىشنى ئىلگىرى سۈرۈش، خەلق تۇرمۇشىغا نەپ يەتكۈزۈش بولسۇن ياكى ئومۇمىيەتنى مۇقىملاشتۇرۇش، ئۆزگىرىش ۋەزىيىتىگە تاقابىل تۇرۇش، يېڭى ۋەزىيەت يارىتىش بولسۇن، پۇقراۋى ئىگىلىكنىڭ تۆھپىسىگە كۆز يۇمۇشقا بولمايدۇ.
پارتىيە 18 ـ قۇرۇلتىيىدىن بۇيان، باش شۇجى شى جىنپىڭ پۇقراۋى ئىگىلىكنىڭ تەرەققىياتىغا يۈكسەك ئەھمىيەت بېرىپ، «پۇقراۋى ئىگىلىك دۆلىتىمىز ئىقتىسادىي تۈزۈمىنىڭ ئىچكى ئامىلى» «پۇقراۋى كارخانىلار ۋە پۇقراۋى كارخانىچىلار بىزنىڭ ئۆز ئادىمىمىز» قاتارلىق مۇھىم ھۆكۈملەرنى ئېنىق ئوتتۇرىغا قويۇپ، پارتىيەمىزنىڭ پۇقراۋى ئىگىلىكنىڭ تەرەققىياتىغا بولغان قانۇنىيەتلىك تونۇشىنى چوڭقۇرلاشتۇردى. پارتىيە 19 ـ قۇرۇلتىيىدا «ئىككىدە قىلچە تەۋرەنمەسلىك» يېڭى دەۋردە جۇڭگوچە سوتسىيالىزمدا چىڭ تۇرۇش ۋە ئۇنى راۋاجلاندۇرۇشنىڭ ئاساسىي تەدبىرىگە كىرگۈزۈلدى، پارتىيە 20 ـ قۇرۇلتىيىدا «پۇقراۋى كارخانىلارنىڭ تەرەققىيات مۇھىتىنى ئەلالاشتۇرۇپ، پۇقراۋى كارخانىلارنىڭ مۈلۈك ھوقۇقى ۋە كارخانىچىلارنىڭ ھوقۇق ـ مەنپەئىتىنى قانۇن بويىچە قوغداش» ئوتتۇرىغا قويۇلدى، پارتىيە 20 ـ نۆۋەتلىك مەركىزىي كومىتېتى 3 ـ ئومۇمىي يىغىنىدا «ئومۇمىي مۈلۈكچىلىكتىن باشقا ئىگىلىكنىڭ تەرەققىياتىغا ياخشى مۇھىت ۋە تېخىمۇ كۆپ پۇرسەت يارىتىپ بېرىشنى مەقسەت قىلغان فاڭجېن ـ سىياسەتلەردە چىڭ تۇرۇش»نى چۆرىدەپ بىر قاتار ئىسلاھات تەدبىرلىرى ئورۇنلاشتۇرما قىلىندى. پارتىيەمىز تونۇش جەھەتتە ئۈزلۈكسىز چوڭقۇرلاشتۇرۇپ، ئىستراتېگىيە جەھەتتە ئۈزلۈكسىز مۇكەممەللەشتۈرۈپ، ئەمەلىيەت جەھەتتە ئۈزلۈكسىز بېيىتىپ، باشتىن ـ ئاخىر «ئىككىدە قىلچە تەۋرەنمەسلىك» «ئۈچ ئۆزگەرمەسلىك» «ئىككى ساغلام» قاتارلىق مۇھىم سىياسەت ـ فاڭجېنلارنى گەۋدىلەندۈرۈپ، باشتىن ـ ئاخىر پۇقراۋى ئىگىلىكنىڭ تەرەققىي قىلىپ زورىيىشىنى ئىلگىرى سۈرۈشكە بولغان بوشاشماي ئىزدىنىشىنى نامايان قىلماقتا.
يېڭى دەۋردە پارتىيە ۋە دۆلەت ئىشلىرىدا ئۇلۇغ مۇۋەپپەقىيەتلەر قولغا كەلتۈرۈلدى، جۇڭگوچە زامانىۋىلاشتۇرۇشتا پۇختا قەدەم تاشلاندى، پۇقراۋى ئىگىلىكنىڭ تەرەققىيات ھاياتىي كۈچى ئىنتايىن زور دەرىجىدە ئۇرغۇتۇلدى، تەرەققىيات نەتىجىسى تېخىمۇ كۆرۈنەرلىك بولدى، تەرەققىياتتىكى رولى تېخىمۇ نامايان بولدى. يېڭى سۈپەتلىك ئىشلەپچىقىرىش كۈچلىرىنى تېز يېتىلدۈرۈش ۋە تەرەققىي قىلدۇرۇشنى مىسالغا ئالساق، دۆلەتنىڭ يۇقىرى، يېڭى تېخنىكىلىق كارخانىلىرى ئىچىدە پۇقراۋى كارخانىلار 2012 ـ يىلىدىكى 28 مىڭدىن كۆپىيىپ بۈگۈنكى كۈندە 420 مىڭدىن ئاشتى، ئىگىلىگەن نىسبىتى %62.4تىن ئېشىپ %92تىن كۆپرەككە يەتتى. 2024 ـ يىلى يېڭى ئېنېرگىيەلىك ئاپتوموبىل ئىشلەپچىقىرىش مىقدارى 13 مىليوندىن ئېشىشتىن، سۈنئىي ئەقلىي ئىقتىدار، رەقەملىك ئىقتىساد قاتارلىق ساھەلەردە يېڭىلىق يارىتىش نەتىجىلىرى سىجىل بارلىققا كېلىشكىچە، ھەممە جايدا پۇقراۋى كارخانىلارنىڭ كارامىتىنى كۆرسىتىۋاتقانلىقىنى كۆرگىلى بولىدۇ. ئەمەلىيەت شۇنى ئىسپاتلىدىكى، پۇقراۋى ئىگىلىك جۇڭگوچە زامانىۋىلاشتۇرۇشنى ئالغا سىلجىتىشتىكى جەڭگىۋار قوشۇن، يۇقىرى سۈپەتلىك تەرەققىياتنىڭ مۇھىم ئاساسى، دۆلىتىمىزنىڭ سوتسىيالىستىك زامانىۋىلاشقان قۇدرەتلىك دۆلەتنى ئومۇميۈزلۈك قۇرۇپ چىقىشىغا، ئىككىنچى 100 يىللىق كۈرەش نىشانىنى ئىشقا ئاشۇرۇشىغا تۈرتكە بولىدىغان مۇھىم كۈچ.
ئىسلاھات ـ ئېچىۋېتىش يولغا قويۇلغاندىن بۇيانقى، بولۇپمۇ يېڭى دەۋردىن بۇيانقى تەرەققىيات مۇساپىسى شۇنى تولۇق كۆرسىتىپ بەردىكى، «نەچچە ئون يىلدىن بۇيان، پۇقراۋى ئىگىلىكنىڭ ئىسلاھات ـ ئېچىۋېتىش ۋە سوتسىيالىستىك زامانىۋىلاشتۇرۇش قۇرۇلۇشى ئىشلىرىدىكى ئورنى ۋە رولىغا بولغان تونۇش توغرىسىدا، پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتىغا دائىر فاڭجېن ـ سىياسەتلىرى توغرىسىدا پارتىيەمىزنىڭ نەزەرىيەسى ۋە ئەمەلىيىتى تومۇرداش بولۇپ كەلدى، دەۋر بىلەن تەڭ ئىلگىرىلىدى»، بۇ، پارتىيەمىزنىڭ پۇقراۋى ئىگىلىكنىڭ تەرەققىي قىلىپ زورىيىشىنى ئىلگىرى سۈرۈشتىكى قەتئىي ئىرادىسى، روشەن مەيدانى، كۈچلۈك غەيرىتى ۋە ئىستراتېگىيەلىك ئىرادىسىنى چوڭقۇر كۆرسىتىپ بەردى.
سۆھبەت يىغىنىدا، باش شۇجى شى جىنپىڭ پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتىغا بولغان ئاساسىي فاڭجېن ـ سىياسەتلىرىنى مۇپەسسەل يىغىنچاقلىدى ۋە مۇنداق تەكىتلىدى: «پارتىيە ۋە دۆلەت سوتسىيالىستىك ئاساسىي ئىقتىسادىي تۈزۈمدە چىڭ تۇرۇپ ۋە ئۇنى مۇكەممەللەشتۈرۈپ، قىلچە تەۋرەنمەي ئومۇمىي مۈلۈكچىلىك ئىگىلىكىنى مۇستەھكەملىدى ۋە راۋاجلاندۇردى، قىلچە تەۋرەنمەي ئومۇمىي مۈلۈكچىلىكتىن باشقا ئىگىلىكنىڭ تەرەققىياتىغا ئىلھام بەردى، مەدەت بەردى ۋە يېتەكچىلىك قىلدى؛ پارتىيە ۋە دۆلەت تۈرلۈك مۈلۈكچىلىكتىكى ئىگىلىكنىڭ ئىشلەپچىقىرىش ئامىللىرىدىن قانۇن بويىچە باراۋەر پايدىلىنىشىغا، بازار رىقابىتىگە ئادىل قاتنىشىشىغا، قانۇن تەرىپىدىن باراۋەر قوغدىلىشىغا كاپالەتلىك قىلىپ، تۈرلۈك مۈلۈكچىلىكتىكى ئىگىلىكنىڭ ئەۋزەللىكلەر ئارقىلىق بىر ـ بىرىنى تولۇقلىشى، ئورتاق تەرەققىي قىلىشىنى ئىلگىرى سۈردى، ئومۇمىي مۈلۈكچىلىكتىن باشقا ئىگىلىكنىڭ ساغلام تەرەققىياتى ۋە ئومۇمىي مۈلۈكچىلىكتىن باشقا ئىگىلىكتىكى زاتلارنىڭ ساغلام ئۆسۈپ يېتىلىشىنى ئىلگىرى سۈردى.» بۇ ئاساسىي فاڭجېن ـ سىياسەتلەر جۇڭگوچە سوتسىيالىزم تۈزۈم سىستېمىسىغا كىرگۈزۈلۈپ، پارتىيە نىزامنامىسى ۋە ئاساسىي قانۇندا گەۋدىلەندۈرۈلدى، بۇ ۋاقىتلىق چارە ئەمەس، بەلكى ئۇزاق مۇددەتلىك تەدبىر، ئىلگىرى ئۆزگەرمىدى، بۇنىڭدىن كېيىن تېخىمۇ ئۆزگەرمەيدۇ. يېڭى مۇساپىدە، پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتى توغرىسىدىكى ئاساسىي فاڭجېن ـ سىياسەتلىرىدە ئىزچىل چىڭ تۇرغاندا ۋە ئۇنى ئەمەلىيلەشتۈرگەندە، چوقۇم پۇقراۋى ئىگىلىكنىڭ يېڭى شەرەپ قۇچۇشىغا، يېڭى تۆھپە قوشۇشىغا تۈرتكە بولغىلى بولىدۇ.
ھازىر، جۇڭگوچە زامانىۋىلاشتۇرۇش قۇرۇلۇشىنىڭ ئاچقۇچلۇق مەزگىلىدە تۇرۇۋاتقان پۇقراۋى ئىگىلىك تېخىمۇ كەڭ تەرەققىيات ئىستىقبالىنى كۈتۈۋالدى. يېڭى دەۋر، يېڭى مۇساپىدە، كەڭ پۇقراۋى كارخانىلار ۋە پۇقراۋى كارخانىچىلار ئىدىيە ۋە ھەرىكەتنى باش شۇجى شى جىنپىڭنىڭ مۇھىم سۆزىنىڭ روھىغا بىرلىككە كەلتۈرۈپ، پارتىيە ۋە دۆلەتنىڭ پۇقراۋى ئىگىلىكنىڭ تەرەققىياتى توغرىسىدىكى فاڭجېن ـ سىياسەتلىرىنى توغرا ئىگىلەپ، تۈرلۈك پايدىلىق تەدبىرلەردىن ياخشى پايدىلىنىپ، تولۇق پايدىلىنىپ، ئىشەنچنى چىڭىتىپ، روھنى ئۇرغۇتۇپ، تولۇق غەيرەتكە كېلىپ، ئەمەلىيەتچىل بولۇپ يېڭىلىق يارىتىپ، پۇقراۋى ئىگىلىكنىڭ ساغلام تەرەققىياتىنى، يۇقىرى سۈپەتلىك تەرەققىياتىنى ئىشقا ئاشۇرۇشى كېرەك.
(شىنخۇا ئاگېنتلىقى، بېيجىڭ، 2 ـ ئاينىڭ 18 ـ كۈنى تېلېگراممىسى)
