شىنخۇا ئاگېنتلىقى، رىئودې ژانېيرو، 11 - ئاينىڭ 19 - كۈنى تېلېگراممىسى (مۇخبىرلار شى شياۋمېڭ، لى زىجيەن) شۇ جاي ۋاقتى 11 - ئاينىڭ 19 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتناشقان مەزگىلىدە فىرانسىيە زۇڭتۇڭى ماكرون بىلەن كۆرۈشتى.
شى جىنپىڭ مۇنداق كۆرسەتتى: جۇڭگو بىلەن فىرانسىيە مۇستەقىل، پىشىپ يېتىلگەن، مەسئۇلىيەتچان چوڭ دۆلەتلەر، ئىككى دۆلەت مۇناسىۋىتى ئۆزگىچە ئىستراتېگىيەلىك قىممەتكە ۋە يەرشارىۋى ئەھمىيەتكە ئىگە. بۇ يىل 5 - ئايدا، بىز جۇڭگو - فىرانسىيە مۇناسىۋىتىنىڭ «يېڭى 60 يىلى»غا نەزەر سالدۇق ھەم يەرشارىۋى خىرىس ۋە قىزىق نۇقتا مەسىلىلىرى توغرىسىدا ئورتاق پوزىتسىيە بىلدۈرۈپ، خەلقئارادا كەڭ ئىجابىي تەسىر پەيدا قىلدۇق. ھازىر، خەلقئارا ۋەزىيەتتە نۇرغۇن يېڭى ئۆزگىرىش بولۇۋاتىدۇ، خەلقئارا جەمئىيەتنى يەرشارىۋى خىرىسقا ئىتتىپاقلىشىپ تاقابىل تۇرۇشقا يېتەكلەش جۇڭگو بىلەن فىرانسىيە ئورتاق زىممىگە ئالىدىغان چوڭ دۆلەت مەسئۇلىيىتى. ئىككى تەرەپ ئىستراتېگىيەلىك پىكىر ئالماشتۇرۇشنى چوڭقۇرلاشتۇرۇپ، ئۆزئارا قوللاشنى كۈچەيتىپ، جۇڭگو - فىرانسىيە مۇناسىۋىتىنىڭ مۇقىم، ساغلام، ئاكتىپ تەرەققىيات ۋەزىيىتىنى ساقلاپ، جۇڭگو − ياۋروپا مۇناسىۋىتىنىڭ ياخشى تەرەققىي قىلىشى ۋە دۇنيانىڭ تىنچلىقى، مۇقىملىقى ئۈچۈن تېخىمۇ زور تۆھپە قوشۇشى كېرەك.
شى جىنپىڭ مۇنداق تەكىتلىدى: جۇڭگو تەرەپ فىرانسىيە تەرەپ بىلەن يۇقىرى قاتلام ئالاقىسىنى داۋاملىق قويۇقلاشتۇرۇپ، مەدەنىيەت، مائارىپ، يەرلىك، ياشلار قاتارلىق ئادىمىيەت ساھەسىدىكى ئالماشتۇرۇش ۋە ھەمكارلىقنى سىجىل چوڭقۇرلاشتۇرۇپ، جۇڭگو - فىرانسىيە خەلق رىشتىنى تۇتاشتۇرۇشنى ئىلگىرى سۈرۈشنى خالايدۇ. جۇڭگو كوممۇنىستىك پارتىيەسى 20 - نۆۋەتلىك مەركىزىي كومىتېتىنىڭ 3 - ئومۇمىي يىغىنى جۇڭگونىڭ يېڭى بىر نۆۋەتلىك ئىسلاھات - ئېچىۋېتىش مۇساپىسىنى باشلىدى، بۇ، جۇڭگو - فىرانسىيە ھەمكارلىقىنى يېڭى پۇرسەت بىلەن تەمىنلەيدۇ، ئىككى تەرەپنىڭ ئەمەلىي ھەمكارلىق ئىستىقبالى پارلاق. ئىككى تەرەپنىڭ يۇقىرى دەرىجىلىكلەر ئىقتىساد، مالىيە، پۇل مۇئامىلە سۆھبىتى، ئىقتىساد - سودا ئارىلاشما كومىتېتى قاتارلىق مېخانىزملاردىن ياخشى پايدىلىنىپ، ھەمكارلىق يوشۇرۇن كۈچىنى چوڭقۇر قېزىپ، ئەۋزەللىكلەر ئارقىلىق بىر - بىرىنى تولۇقلاشنى كۈچەيتىپ، ئىختىلاپلارنى مۇۋاپىق ھەل قىلىپ، ئۆزئارا مەنپەئەت يەتكۈزۈپ، ئورتاق پايدا ئېلىشنى ئىشقا ئاشۇرۇشىنى ئۈمىد قىلىمەن.
ماكرون مۇنداق بىلدۈردى: بۇ يىل 5 - ئايدا رەئىس شى جىنپىڭ فىرانسىيەدە مۇۋەپپەقىيەتلىك زىيارەتتە بولدى، بىز ئورتاق ھالدا فىرانسىيە بىلەن جۇڭگونىڭ دىپلوماتىك مۇناسىۋەت ئورناتقانلىقىنىڭ 60 يىللىقىنى داغدۇغىلىق تەبرىكلىدۇق. بۈگۈنكى دۇنيا تۈرلۈك مۇقىمسىز، ئېنىقسىز ئامىللار بىلەن تولغان. فىرانسىيە تەرەپ جۇڭگو تەرەپ بىلەن ئىككى دۆلەتنىڭ دۆلەت باشلىقلىرى ھاسىل قىلغان ئورتاق تونۇشنى ئەستايىدىل ئەمەلىيلەشتۈرۈپ، يۇقىرى قاتلام ئالاقىسىنى داۋاملىق قويۇقلاشتۇرۇپ، ئادىمىيەت جەھەتتىكى ئالاقىنى كۈچەيتىپ، ئەنئەنىۋى دوستلۇقنى داۋاملاشتۇرۇپ، يېڭىچە دۆلەتلەر ئارا مۇناسىۋەت بەرپا قىلىشنى خالايدۇ. فىرانسىيە ئىستراتېگىيە جەھەتتە ئۆزىگە ئۆزى ئىگە بولۇشتا چىڭ تۇرۇپ، ئۆزئارا ھۆرمەت قىلىش روھىغا ئەمەل قىلىپ جۇڭگو تەرەپ بىلەن سۆھبەتلىشىش، ھەمكارلىشىشنى قانات يايدۇرۇپ، ئىقتىساد - سودا تالاش - تارتىشلىرىنى جايىدا بىر تەرەپ قىلىپ، ئىككى تەرەپ ئىقتىساد - سودا مۇناسىۋىتىنىڭ ساغلام، مۇقىم تەرەققىياتىنى قوغداپ، كىلىمات ئۆزگىرىشىگە تاقابىل تۇرۇش، سۈنئىي ئەقلىي ئىقتىدار يەرشارىۋى ئىدارە قىلىش قاتارلىق ساھەلەردىكى ھەمكارلىقنى كۈچەيتىشنى خالايدۇ.
ئىككى تەرەپ ئۇكرائىنا كىرىزىسى توغرىسىدا پىكىر ئالماشتۇردى. شى جىنپىڭ مۇنداق كۆرسەتتى: جۇڭگو تەرەپنىڭ ئۇكرائىنا كىرىزىسى مەسىلىسىدىكى مەيدانى ئىزچىل بولۇپ، توقۇنۇش ۋەزىيىتىنىڭ پەسىيىشىنى ئۈمىد قىلىدۇ، كىرىزىسنىڭ سىرتقا يامرىشىنى، ئۇرۇشنىڭ كۈچىيىپ كېتىشىنى كۆرۈشنى خالىمايدۇ، داۋاملىق ئۆزىنىڭ ئۇسۇلى ئارقىلىق ئۇرۇش توختىتىش ئۈچۈن ئىجابىي رولىنى جارى قىلدۇرىدۇ.
سەي چى، ۋاڭ يى قاتارلىقلار كۆرۈشۈشكە قاتناشتى.
شىنخۇا ئاگېنتلىقى، رىئودې ژانېيرو، 11 - ئاينىڭ 19 - كۈنى تېلېگراممىسى (مۇخبىرلار شاڭ ياڭ، جياڭ بياۋ) شۇ جاي ۋاقتى 11 - ئاينىڭ 19 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتناشقان مەزگىلىدە بولىۋىيە زۇڭتۇڭى ئارسې بىلەن كۆرۈشتى.
شى جىنپىڭ مۇنداق كۆرسەتتى: جۇڭگو بىلەن بولىۋىيە ياخشى دوست، ياخشى قېرىنداش. يېقىنقى يىللاردىن بۇيان ئىككى دۆلەت مۇناسىۋىتى ياخشى تەرەققىيات ۋەزىيىتىنى ساقلاپ، ئىككى تەرەپ بىر - بىرىنىڭ يادرولۇق مەنپەئىتىگە مۇناسىۋەتلىك ۋە كۆڭۈل بۆلىدىغان مۇھىم مەسىلىلەردە قەتئىي ئۆزئارا قوللاپ، «بىر بەلباغ، بىر يول»نى ئورتاق بەرپا قىلىشتا مول نەتىجىلەرنى قولغا كەلتۈرۈپ، ئىككى دۆلەت خەلقىگە ئەمەلىي نەپ يەتكۈزدى. جۇڭگو تەرەپ بولىۋىيە تەرەپنىڭ ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان تەرەققىيات يولى ئۈستىدە مۇستەقىل، ئۆزىگە ئۆزى ئىگە بولغان ھالدا ئىزدىنىشىنى قوللايدۇ، كېلەر يىلى جۇڭگو بىلەن بولىۋىيە دىپلوماتىك مۇناسىۋەت ئورناتقانلىقىنىڭ 40 يىللىقىنى پۇرسەت بىلىپ، بولىۋىيە تەرەپ بىلەن ئەنئەنىۋى دوستلۇقنى ئەۋج ئالدۇرۇپ، ئىستراتېگىيەلىك ئۆزئارا ئىشىنىشنى چوڭقۇرلاشتۇرۇپ، ئۆزئارا مەنپەئەت يەتكۈزۈش ھەمكارلىقىنى كېڭەيتىپ، جۇڭگو - بولىۋىيە ئىستراتېگىيەلىك ھەمراھلىق مۇناسىۋىتىنىڭ يەنە يېڭى پەللىگە كۆتۈرۈلۈشىگە يېتەكچىلىك قىلىشنى خالايدۇ.
شى جىنپىڭ مۇنداق تەكىتلىدى: ئىككى تەرەپ ھۆكۈمەت، قانۇن چىقىرىش ئاپپاراتى، پارتىيە، يەرلىكلەر ئالاقىسىنى كۈچەيتىپ، دۆلەتنى ئىدارە قىلىش تەجرىبىلىرىنى ئالماشتۇرۇشنى چوڭقۇر قانات يايدۇرۇپ، «بىر بەلباغ، بىر يول»نى ئورتاق بەرپا قىلىش تەشەببۇسىنى بولىۋىيەنىڭ 2025 - يىللىق تەرەققىيات يىرىك پىلانى بىلەن ئۇدۇللاشتۇرۇپ، ئۇل ئەسلىھە قۇرۇلۇشى، ئېگىزلىك يېزا ئىگىلىكى، يېشىل تەرەققىيات، رەقەملىك ئىقتىساد قاتارلىق ساھەلەردىكى ھەمكارلىقنى كېڭەيتىپ، بىرلەشكەن دۆلەتلەر تەشكىلاتى، كېسەك ئالتۇن دۆلەتلىرى قاتارلىق كۆپ تەرەپلىك مېخانىزملاردىكى ھەمكارلىقنى چوڭقۇرلاشتۇرۇپ، يەرشارىنىڭ جەنۇبىدىكى دۆلەتلەرنىڭ ئىتتىپاقلىشىپ ئۆزىنى قۇدرەت تاپتۇرۇشى ۋە ئورتاق تەرەققىي قىلىشىغا تۈرتكە بولۇشى كېرەك. جۇڭگو تەرەپ لاتىن ئامېرىكىسى رايونىنىڭ بىر گەۋدىلىشىش قۇرۇلۇشىنى قوللايدۇ، بولىۋىيە تەرەپ بىلەن بىرلىكتە جۇڭگو − لاتىن ئامېرىكىسى مۇنبىرى مېخانىزمى قۇرۇلۇشىنى كۈچەيتىشنى خالايدۇ.
ئارسې مۇنداق بىلدۈردى: بولىۋىيە بىلەن جۇڭگو ئىككى دۆلەتنىڭ قېرىنداشلارچە دوستلۇقى چوڭقۇر، جۇڭگو تەرەپنىڭ بولىۋىيەنىڭ يېڭى تىپتىكى تاجسىمان ۋىرۇس يۇقۇمى ئۈستىدىن غەلىبە قىلىپ، بولىۋىيەنىڭ ئىقتىساد، جەمئىيەت تەرەققىياتىنى ئىلگىرى سۈرۈشىگە ياردەم بەرگەنلىكىگە رەھمەت ئېيتىمەن. رەئىس شى جىنپىڭنىڭ رەھبەرلىكىدە، جۇڭگوچە زامانىۋىلاشتۇرۇشتا غايەت زور مۇۋەپپەقىيەتلەر قولغا كەلتۈرۈلۈپ، بولىۋىيە قاتارلىق دۆلەتلەرنىڭ تەرەققىياتىنى مۇھىم ئۆرنەك ۋە يېتەكچىلىك بىلەن تەمىنلىدى. رەئىس شى جىنپىڭنىڭ يېقىندا پېرۇ چيەنكەي پورتىنىڭ ئېچىلغانلىقىنى جاكارلىغانلىقىنى تەبرىكلەيمەن. بولىۋىيە تەرەپ جۇڭگو تەرەپ بىلەن بىللە كېلەر يىلى دىپلوماتىك مۇناسىۋەت ئورناتقانلىقىنىڭ 40 يىللىقىنى ئورتاق تەبرىكلەپ، يەنىمۇ ئىلگىرىلىگەن ھالدا ئىستراتېگىيەلىك ھەمراھلىق مۇناسىۋىتىنى چوڭقۇرلاشتۇرۇپ، ئۇل ئەسلىھەلەرنى ئۆزئارا تۇتاشتۇرۇش، ئۆزئارا راۋانلاشتۇرۇش قاتارلىق ساھەلەردىكى ھەمكارلىقنى كۈچەيتىپ، بولىۋىيەنىڭ دۆلەتنى تەرەققىي قىلدۇرۇشىغا كۈچ قوشۇپ، خەلقنىڭ بەخت - سائادىتىنى ئاشۇرۇشنى خالايدۇ. بولىۋىيە تەرەپ جۇڭگو تەرەپ بىلەن بىللە كېسەك ئالتۇن دۆلەتلىرى، جۇڭگو − لاتىن ئامېرىكىسى مۇنبىرى قاتارلىق كۆپ تەرەپلىك مېخانىزمدىكى ھەمكارلىقنى كۈچەيتىشنى خالايدۇ.
سەي چى، ۋاڭ يى قاتارلىقلار كۆرۈشۈشكە قاتناشتى.
شىنخۇا ئاگېنتلىقى، رىئودې ژانېيرو، 11 - ئاينىڭ 19 - كۈنى تېلېگراممىسى (مۇخبىرلار سۈن خاۋ، جۇ ۋەنجۈن) شۇ جاي ۋاقتى 11 - ئاينىڭ 19 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتناشقان مەزگىلىدە ئارگېنتىنا زۇڭتۇڭى مىلېي بىلەن كۆرۈشتى.
شى جىنپىڭ مۇنداق كۆرسەتتى: جۇڭگو بىلەن ئارگېنتىنا دىپلوماتىك مۇناسىۋەت ئورناتقان يېرىم ئەسىردىن كۆپرەك ۋاقىتتىن بۇيان، ئىككى تەرەپ ئۆزئارا ھۆرمەت قىلىش، باراۋەر مۇئامىلە قىلىش، ئۆزئارا مەنپەئەت يەتكۈزۈپ ئورتاق پايدا ئېلىشتا چىڭ تۇردى. جۇڭگونىڭ ئارگېنتىناغا قاراتقان سىياسىتى باشتىن - ئاخىر ئارگېنتىنادىكى بارلىق خەلققە يۈزلەنگەن بولۇپ، جۇڭگو - ئارگېنتىنا ھەمكارلىقىمۇ بارلىق خەلققە بەخت يارىتىدۇ. بۇ يىل جۇڭگو بىلەن ئارگېنتىنانىڭ ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورناتقانلىقىنىڭ 10 يىللىقى، ئىككى دۆلەت مۇناسىۋىتى ئالدىنقىلارنىڭ ئىشلىرىغا ۋارىسلىق قىلىپ، كېيىنكىلەرگە ئىلھام بېرىدىغان، ئالدىنقىلارغا ۋارىسلىق قىلىپ، كېيىنكىلەرگە يول ئاچىدىغان مۇھىم تۈگۈندە تۇرۇۋاتىدۇ. جۇڭگو تەرەپ ئىككى دۆلەت خەلقىنىڭ ئەنئەنىۋى دوستلۇقىنى قەدىرلەيدۇ، ئارگېنتىنا تەرەپنىڭ ئىسلاھات ئارقىلىق ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان تەرەققىيات يولى ئۈستىدە ئىزدىنىشىنى قوللايدۇ، ئارگېنتىنا تەرەپ بىلەن بىرلىكتە جۇڭگو - ئارگېنتىنا ئومۇميۈزلۈك ئىستراتېگىيەلىك ھەمراھلىق مۇناسىۋىتىنى ئۇزاققىچە مۇقىم تەرەققىي قىلدۇرۇشقا تۈرتكە بولۇپ، ئۆز دۆلەتلىرىنىڭ تەرەققىياتىغا تېخىمۇ ياخشى كۈچ قوشۇشنى خالايدۇ.
شى جىنپىڭ مۇنداق تەكىتلىدى: ھازىر دۇنيا ۋەزىيىتىدە چوڭقۇر ئۆزگىرىش بولۇۋاتىدۇ، جۇڭگو بىلەن ئارگېنتىنا ئىككى تەرەپ داۋاملىق تۈردە بىر - بىرىنىڭ يادرولۇق مەنپەئىتى ۋە كۆڭۈل بۆلىدىغان مۇھىم مەسىلىلەردە ئۆزئارا قەتئىي قوللاپ، ھەرقايسى قاتلام - دەرىجىلىكلەر، ھەرقايسى ساھەلەردىكى ئالاقىنى قويۇقلاشتۇرۇپ، ئادىمىيەت جەھەتتىكى ئالماشتۇرۇش، ھەمكارلىشىشنى ئىلگىرى سۈرۈپ، جۇڭگو - ئارگېنتىنا دوستلۇقىنى كىشىلەر قەلبىدىن تېخىمۇ چوڭقۇر ئورۇن ئالدۇرۇشى كېرەك. جۇڭگو بىلەن ئارگېنتىنانىڭ ئىقتىساد - سودا قۇرۇلمىسى يۈكسەك دەرىجىدە بىر - بىرىنى تولۇقلايدۇ، ھەمكارلىق ئىستىقبالى كەڭ بولۇپ، ئارگېنتىنا تەرەپنىڭ جۇڭگونىڭ يۇقىرى سەۋىيەلىك سىرتقا ئېچىۋېتىشى ئېلىپ كەلگەن مۇھىم پۇرسەتنى چىڭ تۇتۇپ، يەنىمۇ ئىلگىرىلىگەن ھالدا جۇڭگودىكى بازار ئۈلۈشىنى كېڭەيتىشىنى قارشى ئالىدۇ. جۇڭگو تەرەپ ئارگېنتىنا تەرەپ بىلەن «بىر بەلباغ، بىر يول»نى يۇقىرى سۈپەتتە ئورتاق بەرپا قىلىشنى سىجىل ئالغا سىلجىتىپ، ئېنېرگىيە، كانچىلىق، ئۇل ئەسلىھە، يېزا ئىگىلىكى، پەن - تېخنىكىدا يېڭىلىق يارىتىش، رەقەملىك ئىقتىساد قاتارلىق ساھەلەردىكى ھەمكارلىقنى چوڭقۇرلاشتۇرۇشنى خالايدۇ. جۇڭگو تەرەپ يەنە ئارگېنتىنا تەرەپ بىلەن پۇل مۇئامىلە ھەمكارلىقىنى داۋاملىق قانات يايدۇرۇپ، ئارگېنتىنا تەرەپنىڭ ئىقتىساد، پۇل مۇئامىلە مۇقىملىقىنى قوغداشقا كۈچ قوشۇشنى خالايدۇ.
مىلېي مۇنداق بىلدۈردى: رەئىس شى جىنپىڭ بىلەن تونۇشقانلىقىمدىن ئىنتايىن خۇشالمەن. جۇڭگو تەرەپنىڭ ئارگېنتىنانىڭ دۆلەت ئىچى ئىقتىساد، پۇل مۇئامىلە ۋەزىيىتىنى مۇقىملاشتۇرۇشى ئۈچۈن تەمىنلىگەن قىممەتلىك ياردىمىگە رەھمەت ئېيتىمەن. ئارگېنتىنا بىلەن جۇڭگونىڭ ئەنئەنىۋى دوستلۇقى چوڭقۇر. ئارگېنتىنا جۇڭگونىڭ ئىشەنچلىك ۋە مۇقىم ھەمكارلىق ھەمراھى بولۇشنى ئۈمىد قىلىدۇ. ئارگېنتىنا تەرەپ جۇڭگو تەرەپنىڭ تەيۋەن مەسىلىسىدىكى مەيدانىنى قەتئىي قوللايدۇ، بىر جۇڭگو پىرىنسىپىغا قەتئىي ئەمەل قىلىدۇ. ئارگېنتىنا تەرەپ يەنىمۇ ئىلگىرىلىگەن ھالدا جۇڭگو بىلەن ئىقتىساد - سودا، ئېنېرگىيە، قېزىلما بايلىق، پۇل مۇئامىلە قاتارلىق ساھەلەردىكى ھەمكارلىقنى قويۇقلاشتۇرۇپ، تېخىمۇ كۆپ جۇڭگو كارخانىلىرىنىڭ ئارگېنتىناغا بېرىپ مەبلەغ سېلىپ ھەمكارلىشىشىنى قارشى ئالىدۇ، ئارگېنتىناغا مەبلەغ سالغان كارخانىلارنى ياخشى تىجارەت - سودا مۇھىتى بىلەن تەمىنلەپ، كارخانىلارنىڭ يوللۇق ھوقۇق - مەنپەئىتىنى قانۇن بويىچە كاپالەتلەندۈرۈشنى خالايدۇ. ئارگېنتىنا تەرەپ رەئىس شى جىنپىڭنىڭ 20 دۆلەت گۇرۇھى رەھبەرلىرى باشلىقلار يىغىنىدا يەرشارىۋى ئىدارە قىلىش توغرىسىدا بايان قىلغان مۇپەسسەل تەشەببۇسىنى يۈكسەك ئالقىشلايدۇ، جۇڭگو تەرەپ بىلەن پىكىر ئالماشتۇرۇش، ھەمكارلىشىشنى كۈچەيتىشنى خالايدۇ. ئارگېنتىنا تەرەپ جۇڭگو − لاتىن ئامېرىكىسى مۇنبىرىنى يەنىمۇ ياخشى ئۆتكۈزۈشنى قوللايدۇ، لاتىن ئامېرىكىسى − جۇڭگو مۇناسىۋىتىنىڭ تەرەققىياتىنى ئىلگىرى سۈرۈش ئۈچۈن ئاكتىپ رولىنى جارى قىلدۇرۇشنى خالايدۇ.
سەي چى، ۋاڭ يى قاتارلىقلار كۆرۈشۈشكە قاتناشتى.
شىنخۇا ئاگېنتلىقى، رىئودې ژانېيرو، 11 - ئاينىڭ 19 - كۈنى تېلېگراممىسى (مۇخبىرلار ياڭ يىجۈن، ما جويەن) شۇ جاي ۋاقتى 11 - ئاينىڭ 19 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتناشقان مەزگىلىدە گېرمانىيە زۇڭلىسى شولىز بىلەن كۆرۈشتى.
شى جىنپىڭ مۇنداق كۆرسەتتى: بۇ يىل 4 - ئايدا سىز جۇڭگودا زىيارەتتە بولدىڭىز، بىز سەمىمىي، چوڭقۇر، مول نەتىجىلىك پىكىر ئالماشتۇردۇق. يېرىم يىلدىن كۆپرەك ۋاقىتتىن بۇيان، ئىككى دۆلەت يېشىل تەرەققىيات، ئىمكانىيەتلىك سىجىل قاتناش، ئافرىقىغا قارىتىلغان يېزا ئىگىلىك ھەمكارلىقى قاتارلىق ساھەلەردىكى ھەمكارلىقتا مۇھىم نەتىجىلەرنى قولغا كەلتۈردى، جۇڭگو - گېرمانىيە مۇناسىۋىتى سىجىل يېڭى جۇشقۇنلۇق ۋە ھاياتىي كۈچنى ئۇرغۇتتى. ھازىر، دۇنيادا يۈز يىللىق ئۆزگىرىش ۋەزىيىتى تېز سۈرئەتتە ئۆزگىرىپ، يەرشارىۋى تەرەققىيات ئاچقۇچلۇق تۆت كوچا ئېغىزىدا تۇرماقتا. جۇڭگو بىلەن گېرمانىيە دۇنيادىكى 2 - ، 3 - چوڭ ئىقتىسادىي گەۋدە ۋە مۇھىم تەسىر كۈچكە ئىگە چوڭ دۆلەت بولۇش سۈپىتى بىلەن، جۇڭگو بىلەن گېرمانىيە ئومۇميۈزلۈك ئىستراتېگىيەلىك ھەمراھلىق مۇناسىۋىتىنى يىراق كەلگۈسى ۋە ئىستراتېگىيەلىك نۇقتىدىن مۇستەھكەملەشتە چىڭ تۇرۇپ، بىر - بىرىنى مۇۋەپپەقىيەتكە ئېرىشتۈرىدىغان ھەمكارلىق ھېكايىسىنى داۋاملىق پۈتۈشى كېرەك.
شى جىنپىڭ مۇنداق تەكىتلىدى: جۇڭگو تەرەپ گېرمانىيەگە قاراتقان سىياسىتىدە يۈكسەك مۇقىملىق ۋە سىجىللىقنى ساقلايدۇ، گېرمانىيە تەرەپ بىلەن بىرلىكتە بىر - بىرىنىڭ يادرولۇق مەنپەئىتى ۋە كۆڭۈل بۆلىدىغان مۇھىم مەسىلىلەردە ئۆزئارا ھۆرمەت قىلىشتا چىڭ تۇرۇش، ئوخشاشلىقلاردا بىرلىككە كېلىپ، پەرقلەرنى ساقلاپ قېلىش، ئالماشتۇرۇش، ئۆزئارا ئۆرنەك ئېلىشتا چىڭ تۇرۇشنى خالايدۇ. جۇڭگو بىلەن گېرمانىيەنىڭ ئىقتىسادىي مەنپەئىتى يۈكسەك دەرىجىدە ئۆزئارا يۇغۇرۇلغان، جۇڭگو - گېرمانىيە ھەمكارلىقى تەرەققىياتنى ئورتاق ئىلگىرى سۈرۈش، كەلگۈسىنى ئورتاق يارىتىشتىكى پۇرسەت. جۇڭگو تەرەپ گېرمانىيەنى جۇڭگوچە زامانىۋىلاشتۇرۇشنى ئالغا سىلجىتىشتىكى مۇھىم ھەمكارلىق ھەمراھى، دەپ قارايدۇ، گېرمانىيە كارخانىلىرىنى داۋاملىق كەڭ بازار پۇرسىتى بىلەن تەمىنلەيدۇ. ئىككى تەرەپ رەقەملەشتۈرۈش، ئەقلىي ئىقتىدارلاشتۇرۇش، تۆۋەن كاربونلاشتۇرۇشنى چۆرىدەپ، ھەمكارلىقنىڭ سۈپىتىنى ئۆستۈرۈپ دەرىجىسىنى ئاشۇرۇشقا تۈرتكە بولۇپ، قول تۇتۇشۇپ 3 - تەرەپ بازىرىنى ئېچىپ، ھەمكارلىشىپ ئورتاق پايدا ئېلىشنى ئىشقا ئاشۇرۇشى كېرەك. جۇڭگو تەرەپ ياۋروپانى كۆپ قۇتۇپلاشقان دۇنيانىڭ مۇھىم بىر قۇتۇپى، دەپ قارايدۇ، ياۋروپا بىلەن ھەمكارلىقنى قانات يايدۇرۇپ، قول تۇتۇشۇپ خىرىسقا تاقابىل تۇرۇپ، جۇڭگو − ياۋروپا مۇناسىۋىتىنىڭ سىجىل، مۇقىم، ساغلام تەرەققىياتىغا تۈرتكە بولۇشقا كۈچ چىقىرىدۇ. ياۋروپا ئىتتىپاقىنىڭ جۇڭگونىڭ توكلۇق ئاپتوموبىللىرىدىن ئېلىنىدىغان تاموژنا بېجىنى كۆپەيتىشى پۈتۈن دۇنيانىڭ دىققىتىنى قوزغىدى. جۇڭگو تەرەپ باشتىن - ئاخىر سۆھبەتلىشىش، كېڭىشىش ئارقىلىق ئىختىلاپنى ھەل قىلىشتا چىڭ تۇرىدۇ، گېرمانىيە تەرەپنىڭ بۇنىڭ ئۈچۈن داۋاملىق مۇھىم رولىنى جارى قىلدۇرۇشىنى ئۈمىد قىلىدۇ.
شولىز مۇنداق بىلدۈردى: مەن ئالدىنقى قېتىم جۇڭگودا زىيارەتتە بولغاندىن بۇيان، گېرمانىيە - جۇڭگو مۇناسىۋىتى پائال تەرەققىياتقا ئېرىشتى. ھازىرقى مۇرەككەپ خەلقئارا ۋەزىيەتتە، گېرمانىيە بىلەن جۇڭگونىڭ ئالاقە، ھەمكارلىقنى كۈچەيتىشى ئىنتايىن مۇھىم. گېرمانىيە تەرەپ جۇڭگو تەرەپ بىلەن ئومۇميۈزلۈك ئىستراتېگىيەلىك ھەمراھلىق مۇناسىۋىتىنى يەنىمۇ راۋاجلاندۇرۇپ، باراۋەر، سەمىمىي ۋە ئۆزئارا ھۆرمەت قىلىش روھى بويىچە ئىككى تەرەپلىك، كۆپ تەرەپلىك سۆھبەتلىشىش، ھەمكارلىشىشنى كۈچەيتىپ، ئىختىلاپلارنى جايىدا ھەل قىلىپ، ئۆزئارا مەنپەئەت يەتكۈزۈپ ئورتاق پايدا ئېلىشنى ئىشقا ئاشۇرۇپ، دۇنيا ئىقتىسادىنىڭ جانلىنىشى، ئېشىشى ۋە ئورتاق گۈللىنىشى ئۈچۈن تۆھپە قوشۇشنى ئۈمىد قىلىدۇ. ياۋروپا ئىتتىپاقى بىلەن جۇڭگونىڭ سۆزلىشىش، سۆھبەتلىشىش ئارقىلىق توكلۇق ئاپتوموبىل مەسىلىسىنى تېزدىن ھەل قىلىشىنى ئۈمىد قىلىدۇ، گېرمانىيە تەرەپ بۇ جەھەتتە پائال تىرىشچانلىق كۆرسىتىشنى خالايدۇ.
ئىككى تەرەپ يەنە ئۇكرائىنا كىرىزىسى، ئوتتۇرا شەرق ۋەزىيىتى قاتارلىق قىزىق نۇقتا مەسىلىلىرى توغرىسىدا پىكىر ئالماشتۇردى.
سەي چى، ۋاڭ يى قاتارلىقلار كۆرۈشۈشكە قاتناشتى.
