10-ئاينىڭ 29-كۈنى، زىيارەت ئۆمىكىدىكىلەر تۇرپان شەھىرى ئىدىقۇت رايونىنىڭ زامانىۋىلاشقان ئېكولوگىيە ئەسلىھەلىك يېزا ئىگىلىكىدە بېلىق بىلەن ئوت-چۆپنى بىللە يېتىشتۈرۈش كەسىپى ئۈلگە كۆرسىتىش رايونىغا بېرىپ زىيارەت قىلماقتا.
تىيانشان تورى-شىنجاڭ گېزىتى خەۋىرى (مۇخبىر لى رۇي فوتوسى، خەۋىرى) 10-ئاينىڭ 29-كۈنى، 2024-يىللىق ئاپتونوم رايوننىڭ يۇقىرى سۈپەتلىك تەرەققىياتنى تەكشۈرۈپ تەتقىق قىلىش سەپىرى باش تېمىسىدىكى زىيارەت ئۆمىكى تۇرپان شەھىرى ئىدىقۇت رايونىنىڭ زامانىۋىلاشقان ئېكولوگىيە ئەسلىھەلىك يېزا ئىگىلىكىدە بېلىق بىلەن ئوت-چۆپنى بىللە يېتىشتۈرۈش كەسپى ئۈلگە كۆرسىتىش رايونىغا بېرىپ، بېلىق بىلەن ئوت-چۆپنى بىللە يېتىشتۈرۈش تۈرىنىڭ يولغا قويۇلۇش ئەھۋالىنى ئىگىلەپ، يېشىل ئايلانما يېزا ئىگىلىكىنىڭ تەرەققىيات ئىستىقبالى ئۈستىدە ئىزدەندى.
10-ئاينىڭ 29-كۈنى، زىيارەت ئۆمىكىنىڭ ئەزالىرى تۇرپان شەھىرىنىڭ ئىدىقۇت رايونىدىكى زامانىۋىلاشقان ئېكولوگىيە ئەسلىھەلىك يېزا ئىگىلىكىدە بېلىق بىلەن ئوت-چۆپنى بىللە يېتىشتۈرۈش كەسپى ئۈلگە كۆرسىتىش رايونىدا سۈرەتكە تارتماقتا.
بۇ تۈردە 2023-يىلى 9-ئايدا ئىش باشلىنىپ، 2024-يىلى 6-ئايدا پۈتۈپ ئىشقا كىرىشتۈرۈلدى، ئىگىلىگەن يەر كۆلىمى تەخمىنەن 40 مو بولۇپ، 47 مىليون 330 مىڭ يۈەن مەبلەغ سېلىندى. بېلىق بىلەن ئوت-چۆپنى بىللە يېتىشتۈرۈش تۈرى باقمىچىلىق رايونى ۋە ئۆستۈرۈش (يېتىشتۈرۈش) رايونىغا ئايرىلغان بولۇپ، باقمىچىلىق رايونىدا ئۆلچەملەشكەن بېلىق كۆلچىكىدىن 23ى بار، ھەربىر بېلىق كۆلچىكىدە 3 توننا ئەتراپىدا ئوكۇن بېلىقى باققىلى بولىدۇ، يىللىق مەھسۇلات قىممىتى تەخمىنەن 3 مىليون 500 مىڭ يۈەنگە يېتىدۇ. ئۆستۈرۈش (يېتىشتۈرۈش) رايونى ماس قەدەمدە بېلىق كۆلچىكىدىكى سۇ ئايلىنىش سىستېمىسىغا تايىنىپ ئارپىنى سۇغا چىلاپ پەرۋىش قىلغاندىن كېيىن ئۈنۈپ چىققان يېڭى ئوت-چۆپلەر يەم-خەشەك قىلىپ سېتىلىدۇ، ھەر كىلوگىرام ئارپا تېرىلىپ يەتتە كۈندىن كېيىن يەتتە كىلوگىرام يېڭى ئوت-چۆپ ئۈنۈپ چىقىدۇ، ئوتتۇرا ھېساب بىلەن كۈنىگە 35 توننا يېڭى ئوت-چۆپ ئىشلەپچىقىرىلىدۇ، يىللىق مەھسۇلات قىممىتى 9 مىليون يۈەنگە يېتىدۇ. بۇ تۈر ئومۇميۈزلۈك پۈتكەندىن كېيىن يىللىق مەھسۇلات قىممىتىنىڭ 35 مىليون يۈەنگە يېتىشى مۆلچەرلەنمەكتە.
