مۇھەررىر:
哈斯叶提·居玛
|
مەنبە:
تىيانشان تورى
2024/10/14 13:28
يېقىندا، شىزاڭ ئالى ۋىلايىتى رىتۇ ناھىيەسىنىڭ دوما يېزىسىدا، زاڭزۇ تىلىدا راۋان سۆزلەۋاتقان شىنجاڭلىق ياردەمچى ساقچىنىڭ ئامما ئۈچۈن مۇلازىمەت قىلىۋاتقان سىن كۆرۈنۈشى نۇرغۇن تورداشنىڭ ئالقىشىغا ئېرىشتى. نۇرغۇن تورداش ئۇنىڭ تەلەپپۇزىنى «ساپ ئالىچە تەلەپپۇز» دەپ ماختىدى، تېخىمۇ كۆپ كىشى ئۇنى ئىش ئورنىنى سۆيۈپ، كەسىپنى قەدىرلەيدىكەن، دەپ ماختىدى...
سىندىكى بۇ ئۇيغۇر يىگىتنىڭ ئىسمى ئابدۇغوپۇر راخمان. ئۇنىڭ شۇ جايدىكى ئامما بىلەن زاڭزۇ تىلىدا راۋان پىكىر ئالماشتۇرالىشى ئائىلىسىدىكى ئىككى ئەۋلادنىڭ شىزاڭغا چوڭقۇر مۇھەببەت باغلىغانلىقىدىن بولغان. ئۇنىڭ دادىسى ئىلگىرى شىزاڭنىڭ شىنجاڭ قاغىلىقتىكى ئالى ئىش بېجىرىش ئورنىنىڭ پېشقەدەم خىزمەتچىسى ئىدى، ئۇنىڭ ئاكىسى ئىلگىرى ئالى ۋىلايىتىدە گۇڭئەن خەلق ساقچىسى بولۇپ، كېيىن خىزمەت ئۈستىدە ۋاپات بولغانىدى. كېيىن ئابدۇغوپۇر يەنە ئالىدىكى بىر زاڭزۇ شوپۇر بىلەن تونۇشتى ھەم شۇ ئۇستامغا ئەگىشىپ شوپۇرلۇق تېخنىكىسىنى ئۆگەندى، بۇ ئۇنى زاڭزۇ تىلى ھەم زاڭزۇ مەدەنىيىتىگە نىسبەتەن تېخىمۇ كۆپ چۈشەنچىگە ئىگە قىلدى.
2017-يىلى، ئاكىسىغا بولغان ھۆرمەتنى قەلبىگە پۈككەن ئابدۇغوپۇر ئالى ۋىلايىتىنىڭ گۇڭئەن قوشۇنىغا كىرىپ، ياردەمچى ساقچى بولدى. شۇ جايدىكى پۇقرالار ۋە ئۆتكەن-كەچكەن شوپۇرلارغا مۇلازىمەت قىلىش جەريانىدا، ئۇ زاڭزۇ تىلىدا بارغانسېرى راۋان سۆزلەيدىغان بولۇپ كەتتى، ئۇنىڭ ئۈستىگە ئۇ ئادەتتە ھەر خىل ئۇسۇللار ئارقىلىق ئۆزلۈكىدىن تىل ئۆگەندى. بۈگۈنكى كۈندە، ئۇ ئاممىغا مۇلازىمەت قىلغاندا، دۆلەت ئورتاق تىلى، ئۇيغۇر تىلى، زاڭزۇ تىلىنى ھەر ۋاقىت ئالماشتۇرۇپ ئىشلىتەلەيدىغان بولدى. تىل ئىقتىدارىنىڭ ئۈزلۈكسىز ئېشىشى ئۇنىڭ مۇلازىمەت سەۋىيەسىنىڭ ئۆسۈشىگە بەك ياردىمى بولدى، ئۇنىڭ ئىقتىدارى كۆپچىلىكنىڭ ماختىشىغا ئېرىشتى.
(سىن مەنبەسى: ئالى يۇغۇرما تاراتقۇسى)
ئەسكەرتىش:
تورىمىزدىكى ئەسەرلەرنىڭ نەشر ھوقۇقى شىنجاڭ گېزىتخانىسى(شىنجاڭ گېزىتچىلىك ـ تاراتقۇ <گۇرۇھ> چەكلىك شىركىتى)گە تەۋە. نەشر ھوقۇقىغا ئىگە ئەسەر ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ.
