□ئىختىيارىي مۇخبىرلار ئايىمگۈل، قورمانبېك
باركۆل قازاق ئاپتونوم ناھىيەسى كۆلياقا يېزىسى كۆلياقا كەنتىنىڭ كەنت ئاھالىسى جاڭ جيۇخۇا بوۋاينىڭ ئۆيىنىڭ تېمىغا ئېسىلغان ئائىلە سۈرىتى كىشىلەرنىڭ ئالاھىدە دىققىتىنى تارتاتتى. «بۇ، مەن بىر قېرىندىشىم بىلەن چۈشكەن سۈرەت، ئۇنىڭ ئىسمى قۇسايىن زىيكىن، دادىسىنىڭ ئىسمى زىيكىن يېرمەك» دېدى جاڭ جيۇخۇا.
جاڭ جيۇخۇا ئالتە - يەتتە ياش ۋاقىتلىرىدا، دادىسى ئائىلىسىدىكىلەرنى ئېلىپ كۆلياقا كەنتىگە كۆچۈپ كېلىپ ئولتۇراقلاشتى، يېڭى مۇھىتقا كېلىپ تىل بىلمىگەچكە، كەنتتىكى قازاق مىللىتىدىن بولغان كەنت ئاھالىلىرى بىلەن پىكىر ئالماشتۇرۇش بىرقەدەر تەسكە توختىدى. «يېڭى كۆچۈپ كەلگەندە ئائىلە تۇرمۇشىمىز بىرقەدەر قىيىن ئىدى، زىيكىن تاغام دادامغا نۇرغۇن ياردەم قىلدى.» جاڭ جيۇخۇا مۇنداق دېدى: ئىككى ئائىلە كىشىلىرى بىر - بىرىمىزنى پىششىق بىلىشكەندىن كېيىن ئىناق ئۆتۈپ، دائىم ئۆزئارا ياردەم بەردۇق.
جاڭ جيۇخۇا مۇنداق دېدى: «زىيكىن تاغام بىلەن دادام خۇددى بىر تۇغقان ئاكا - ئۇكىلاردەك يېقىن ئۆتتى، ئۇلارنىڭ بۇ مېھىر - مۇھەببىتىنى بىز بىر ئەۋلادمۇ داۋاملاشتۇردۇق، مەن زىيكىن تاغامنىڭ ئوغلى قۇسايىن بىلەن بىر ئائىلە كىشىلىرىدەك ئۆتىمىز. ئۇنىڭ ئۆيىدە ئىش بولسا مەن بارىمەن، مېنىڭ ئۆيۈمدە ئىش بولسا ئۇمۇ كېلىدۇ، بىز ئۆزئارا ياردەم بېرىمىز، جۇڭخۇا مىللىتى ئورتاق گەۋدىسى ئېڭى بۇرۇنلا تۇرمۇشىمىزنىڭ ھەرقايسى تەرەپلىرىگە سىڭىپ كەتتى».
بۈگۈنكى كۈندە، 74 ياشلىق جاڭ جيۇخۇا قازاق تىلىنى راۋان سۆزلىيەلەيدۇ، ئۇ قازاق مىللىتىدىن بولغان كەنت ئاھالىلىرى بىلەن پىكىر ئالماشتۇرۇشتا ھېچقانداق تىل توسالغۇسىغا ئۇچرىمايدۇ. بۇ ئىككى يىلدا، ئۇنىڭ قازاق مىللىتىدىن بولغان قېرىندىشى قۇسايىن ئاغرىپ قېلىپ ئىزچىل ئۆيىدە بولۇپ قالدى، جاڭ جيۇخۇا قۇسايىننى دائىم يوقلاپ بېرىپ، ئۇنىڭ بالدۇرراق ياخشى بولۇپ كېتىشىنى ئۈمىد قىلدى.
جاڭ جيۇخۇا كۆلياقا كەنتىدىكى ھەربىر كەنت ئاھالىسىنى باشتىن - ئاخىر ئۆز قېرىندىشىدەك كۆرۈپ كەلدى، ئۇنىڭ كىرىمى يۇقىرى بولمىسىمۇ، كەنتتە كىم قىيىنچىلىققا ئۇچرىسا تەشەببۇسكارلىق بىلەن ياردەم بەردى. مۇباك سىياجان بوۋاي جاڭ جيۇخۇانىڭ قوشنىسى بولۇپ، جاڭ جيۇخۇا مۇباك ئائىلىسىنىڭ قىيىنچىلىقتىن قۇتۇلۇشىغا ياردەم بېرىش ئۈچۈن، ئۇنى باقمىچىلىقنى تەرەققىي قىلدۇرۇشقا يېتەكلىدى.
مۇباكنىڭ كېلىنى جاڭىل قاۋىپپاي مۇنداق دېدى: «جاڭ تاغام خۇددى بىزنىڭ دادىمىزغا ئوخشاش، قىيىنچىلىقىمىز بولسا ئۇ كېلىپ ياردەم قىلىدۇ، شۇنچە يىللاردىن بۇيان بىزنى ئۆز بالىسىدەك كۆرۈپ كەلدى، بىز ئۇنىڭغا كۆپ رەھمەت ئېيتىمىز».
ئۆزىنىڭ ئائىلە تۇرمۇشى ئانچە باياشات بولمىسىمۇ، لېكىن جاڭ جيۇخۇا يەنىلا ئىرادىسىدىن قايتماي كەنت ئاھالىلىرىنىڭ بېيىشىغا ياردەم بەردى. كەلكۈنگە تاقابىل تۇرۇپ ئاپەتتىن قۇتقۇزۇشقا مەبلەغ ۋە كۈچ چىقاردى، ئۆزىنىڭ قوي - كالىلىرىنى قىيىنچىلىقى بار قوشنىلىرىغا بەردى، يۇرتداشلارنى باقمىچىلىقنى تەرەققىي قىلدۇرۇشقا يېتەكلىدى... جاڭ جيۇخۇا كەنتتىكى قازاق مىللىتىدىن بولغان نۇرغۇن كەنت ئاھالىلىرىنىڭ قېرىندىشى بولۇپ قالدى.
جاڭ جيۇخۇانىڭ ئۆيىگە تۈرلۈك شەرەپ گۇۋاھنامىلىرى تىزىلغان، ئۇ ئىلگىرى - كېيىن بولۇپ مۇنەۋۋەر كوممۇنىستىك پارتىيە ئەزاسى، مىللەتلەر ئىتتىپاقلىقى - تەرەققىياتىدىكى نەمۇنىچى شەخس بولۇپ باھالاندى... بۇ شەرەپلەرنىڭ ئارقىسىدا جاڭ جيۇخۇانىڭ مۇستەھكەم ئېتىقادى بار ئىدى: «مەن بىر كوممۇنىستىك پارتىيە ئەزاسى، مىللەتلەر ئىتتىپاقلىقى خىزمىتىنى ئۆز ئەمەلىيىتىمدە كۆرسىتىپ ياخشى ئىشلىشىم كېرەك».
جاڭ جيۇخۇا مۇنداق دېدى: «مەن كۆلياقا كەنتىدە تۇرمۇش كەچۈرۈۋاتقىلى نەچچە ئون يىل بولدى، بىز بىر ئائىلە كىشىلىرى، قانچىلىك ياردەم قىلالىساق، شۇنچىلىك ياردەم قىلىمىز، مەن كوممۇنىستىك پارتىيە ئەزالىرىنىڭ نەمۇنىلىك رولىنى ياخشى جارى قىلدۇرىمەن».
