ما شىڭرۇي، ئەركىن تۇنىياز مۇخبىرلارنىڭ سوئالىغا جاۋاب بەردى، شۆھرەت زاكىر، زۇمرەت ئوبۇل، شەۋكەت ئىمىن، لى يىفېي قاراپ چىقىشقا قاتناشتى
شىنجاڭ گېزىتى، بېيجىڭ، 3 ـ ئاينىڭ 7 ـ كۈنى خەۋىرى ئانار بۇلۇت\شىنجاڭ گېزىتى مۇخبىرلىرى ۋاڭ شىڭرۇي، ياۋ تۇڭ خەۋەر قىلىدۇ: ئىسلاھات، تەرەققىيات، مۇقىملىقتىكى يېڭى نەتىجىلەر نامايان قىلىندى، ئېچىۋېتىلگەن، سەمىمىي، ئۆزىگە ئىشىنىدىغان يېڭى كەيپىيات ئېنىق نامايان قىلىندى. 3 ـ ئاينىڭ 7 ـ كۈنى چۈشتىن بۇرۇن، 14 ـ نۆۋەتلىك مەملىكەتلىك خەلق قۇرۇلتىيى 2 ـ يىغىنىغا قاتنىشىۋاتقان شىنجاڭ ۋەكىللەر ئۆمىكى خەلق سارىيىنىڭ شىنجاڭ زالىدا ئومۇمىي يىغىن ئۆتكۈزۈپ، ھۆكۈمەت خىزمىتىدىن دوكلاتنى داۋاملىق قاراپ چىقتى، پىلان دوكلاتى ۋە خامچوت دوكلاتىنى تەكشۈردى ھەم جۇڭگو ـ چەت ئەل تاراتقۇلىرىغا ئېچىۋەتتى. مەملىكەتلىك خەلق قۇرۇلتىيى ۋەكىللىرىدىن ما شىڭرۇي، ئەركىن تۇنىياز قاراپ چىقىشقا قاتناشتى ھەم مۇخبىرلارنىڭ سوئالىغا جاۋاب بەردى، مەملىكەتلىك خەلق قۇرۇلتىيى ۋەكىللىرىدىن شۆھرەت زاكىر، زۇمرەت ئوبۇل، شەۋكەت ئىمىن، لى يىفېي قاراپ چىقىشقا قاتناشتى.
دۆلەت تەرەققىيات ۋە ئىسلاھات كومىتېتى، مالىيە مىنىستىرلىقى ۋە يىغىن كاتىبات باشقارمىسىدىكى ئالاقىدار يولداشلار يىغىنغا كېلىپ پىكىرلەرنى ئاڭلىدى.
14 ـ نۆۋەتلىك مەملىكەتلىك خەلق قۇرۇلتىيى 2 ـ يىغىنى يۇقۇمنىڭ ئالدىنى ئېلىش ـ تىزگىنلەش تىنچ باسقۇچقا ئۆتكەندىن كېيىن، ئۆمەك، گۇرۇپپىلارنى ئېچىۋېتىش پائالىيىتى ئۆتكۈزۈشنى ئەسلىگە كەلتۈردى. ئۆتكەن بىر يىلدا، شىنجاڭنىڭ جەمئىيەت ئومۇمىي ۋەزىيىتى مۇقىم بولۇشنى ساقلىدى، ئىقتىسادىي تەرەققىيات كۆرۈنەرلىك تېزلەشتى، تەرەققىيات نەتىجىلىرى ئارقىلىق خەلق تۇرمۇشىغا نەپ يەتكۈزۈش نەتىجىلىرى تېخىمۇ كۆرۈنەرلىك بولدى، بۇ، يېقىنقى يىللاردىن بۇيان ئىقتىساد، جەمئىيەت تەرەققىياتىنىڭ سۈپىتى، ئۈنۈمى ئەڭ ياخشى بولغان بىر يىل بولدى. تىنچ ـ ئىناق، گۈللەنگەن، تەرەققىي قىلغان، ئېچىۋېتىلگەن، ئۆزىگە ئىشىنىدىغان شىنجاڭ دۆلەت ئىچى ـ سىرتىدىكى تاراتقۇلارنىڭ يۈكسەك دىققىتىنى قوزغىدى، شىنجاڭ زالىنىڭ تاراتقۇلار رايونىدا بىرمۇ بوش ئورۇن قالمىدى، جۇڭگو ـ چەت ئەلدىكى 64 تاراتقۇدىن كەلگەن 125 مۇخبىر پائال قاتناشتى، بەس ـ بەستە سوئال سورىدى.
2022 ـ يىلى ۋە 2023 ـ يىلى، باش شۇجى شى جىنپىڭ ئۇدا ئىككى يىل شىنجاڭغا كېلىپ، مۇھىم سۆز قىلىپ، شىنجاڭنىڭ تەرەققىياتى ئۈچۈن يول كۆرسىتىپ يېتەكلىدى، ئۇلۇغۋار پىلان تۈزۈپ بەردى. جۇڭگو خەلقئارا تېلېۋىزىيە ئىستانسىسىنىڭ مۇخبىرى بۇ ئارقا كۆرۈنۈشنى چۆرىدەپ، «قانداق قىلىپ يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى تولۇق، دەل جايىدا، ئومۇميۈزلۈك ئىزچىللاشتۇرۇش» توغرىسىدا ۋەكىل ما شىڭرۇيدىن سوئال سورىدى.
ۋەكىل ما شىڭرۇي مۇخبىر دوستلارنىڭ شىنجاڭغا كۆڭۈل بۆلگەنلىكىگە، دىققەت قىلغانلىقىغا رەھمەت ئېيتتى. ئۇ مۇنداق دېدى: پارتىيە 18 ـ قۇرۇلتىيىدىن بۇيان، يولداش شى جىنپىڭ يادرولۇقىدىكى پارتىيە مەركىزىي كومىتېتى شىنجاڭ خىزمىتىگە يۈكسەك ئەھمىيەت بەردى، باش شۇجى شى جىنپىڭ ئۆزى پىلانلاپ، ئۆزى ئورۇنلاشتۇرما قىلىپ، ئۆزى تۈرتكە بولۇپ، يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى ئورناتتى. ئاپتونوم رايونلۇق پارتىيە كومىتېتى شى جىنپىڭ يېڭى دەۋر جۇڭگوچە سوتسىيالىزم ئىدىيەسى، بولۇپمۇ يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى چوڭقۇر ئۆگىنىش، تولۇق ئۆزلەشتۈرۈشنى 1 ـ دەرىجىلىك چوڭ ئىش قىلىپ، باش شۇجى شى جىنپىڭنىڭ شىنجاڭنى كۆزدىن كەچۈرگەندە، ئاپتونوم رايون ۋە بىڭتۇەننىڭ خىزمەت دوكلاتىنى ئاڭلىغاندا قىلغان مۇھىم سۆزىنىڭ روھىنى چوڭقۇر ئۆگىنىش، ئىزچىللاشتۇرۇشقا بىرلەشتۈرۈپ، باش شۇجىنىڭ ۋە پارتىيە مەركىزىي كومىتېتىنىڭ شىنجاڭ خىزمىتى توغرىسىدىكى چوڭقۇر ئويلىنىشى ۋە مۇھىم ئورۇنلاشتۇرمىلىرىنى چوڭقۇر ھېس قىلىپ، دىققەتنى جەمئىيەت مۇقىملىقى ۋە ئەبەدىي ئەمىنلىك باش نىشانىغا مەركەزلەشتۈرۈپ، شىنجاڭنى قانۇن بويىچە ئىدارە قىلىش، شىنجاڭنى ئىتتىپاقلىشىپ مۇقىم قىلىش، شىنجاڭنى مەدەنىيەت ئارقىلىق ئوزۇقلاندۇرۇش، خەلقنى بېيىتىپ شىنجاڭنى روناق تاپقۇزۇش، شىنجاڭنى ئۇزاققىچە گۈللەندۈرۈشنى بىرتۇتاش پىلانلاپ ئالغا سىلجىتىپ، جۇڭگوچە زامانىۋىلاشتۇرۇش مۇساپىسىدە جاسارەت بىلەن گۈزەل شىنجاڭ قۇرۇپ چىقتى.
ما شىڭرۇي مۇنداق دېدى: شىنجاڭ خىزمىتىنى ياخشى ئىشلەشتە، شىنجاڭغا شىنجاڭ نۇقتىسىدىنلا قاراشقا بولمايدۇ. بىز شى جىنپىڭ يېڭى دەۋر جۇڭگوچە سوتسىيالىزم ئىدىيەسىدىكى دۇنيا قاراش، مېتودولوگىيە ۋە ئۇنىڭغا سىڭدۈرۈلگەن مەيدان، نۇقتىئىنەزەر، ئۇسۇلنى چوڭقۇر ئۆگىنىپ، ئۆزلەشتۈرۈپ، بولۇپمۇ «ئالتىدە چىڭ تۇرۇش» ئۆز ئىچىگە ئالغان داۋلى، ئىلمىي نەزەرىيە، پەلسەپىۋى قائىدىلەرنى چوڭقۇر چۈشىنىپ ۋە ئىگىلەپ، ئاڭلىق ھالدا شىنجاڭ خىزمىتىنى پارتىيە ۋە دۆلەت خىزمىتى پۈتۈن ۋەزىيىتىگە قويۇپ پىلانلاپ ۋە ئالغا سىلجىتىپ، سىستېمىلىق قاراشتا چىڭ تۇرۇپ، تەرەققىيات بىلەن خەۋپسىزلىكنى، ئېچىۋېتىش بىلەن مۇقىملىقنى بىرتۇتاش پىلانلاپ، ئەبەدىي ئەمىنلىككە مۇناسىۋەتلىك نېگىزلىك، ئۇللۇق، ئۇزاق مەزگىللىك خىزمەتلەرنى پۇختا ئالغا سىلجىتتۇق. بىز شارائىتقا قاراپ ئىش كۆرۈش، ھەقىقەتنى ئەمەلىيەتتىن ئىزدەشتە چىڭ تۇرۇپ، شىنجاڭنىڭ رايون ئىچى تەرەققىياتى تەڭپۇڭ بولماسلىق، يېتەرلىك بولماسلىقتەك ئەمەلىيەتنى دەل جايىدا ئىگىلەپ، تەكشۈرۈپ تەتقىق قىلىشنى كەڭ ئەۋج ئالدۇرۇپ، ئىلمىي، دەل جايىدا تەدبىر قوللىنىپ، جەنۇبىي ـ شىمالىي شىنجاڭ، ھەرقايسى بۆلەك رايونلار، ھەرقايسى ۋىلايەت، ئوبلاست، شەھەرلەرنىڭ مەۋقەنى ئۆز بايلىق ئۈستۈنلۈكى، رايون ئورنى ئەۋزەللىكى، ھازىر بار بولغان شارائىتىغا قويۇشىغا تۈرتكە بولدۇق، مەسىلىنى توغرا تېپىپ، ئەۋزەللىكنى جارى قىلدۇرۇپ، قاراتمىلىق ھالدا «سەككىز چوڭ كەسىپ توپى» قۇرۇلۇشى قاتارلىق نۇقتىلىق خىزمەتلەرنى ئالغا سىلجىتىپ، يۇقىرى سۈپەتلىك تەرەققىياتقا تۈرتكە بولۇپ ئۈزلۈكسىز يېڭى بۆسۈشنى ئىشقا ئاشۇردۇق.
ما شىڭرۇي مۇنداق دېدى: يېڭى دەۋر، يېڭى مۇساپىدە گۈزەل شىنجاڭ قۇرۇپ چىقىشتا ئىقتىساد، جەمئىيەت تەرەققىياتىنى تېخىمۇ كۆپ سىياسىي ئەھمىيەتكە ئىگە قىلىش كېرەك. بىز شىنجاڭنىڭ تۈرلۈك خىزمەتلىرىنى قانۇنچىللىق يولىدا ئالغا سىلجىتىشتا چىڭ تۇرۇپ، جۇڭخۇا مىللىتى ئورتاق گەۋدىسى ئېڭىنى مۇستەھكەملەشتىن ئىبارەت بۇ ئاساسىي لىنىيەنى مەھكەم ئىگىلەپ، ھەر مىللەت ئاممىنىڭ كەڭ ئارىلىشىشى، ئومۇميۈزلۈك ئالماشتۇرۇشى، چوڭقۇر يۇغۇرۇلۇشىغا زور كۈچ بىلەن تۈرتكە بولۇپ، شىنجاڭدا ئىسلام دىنىنى جۇڭگوچىلاشتۇرۇشنى پۇختا ئالغا سىلجىتىپ، شىنجاڭنى مەدەنىيەت ئارقىلىق ئوزۇقلاندۇرۇش خىزمىتىنى پۇختا، ئىنچىكە ئىشلەپ، دۆلەت ئورتاق تىل ـ يېزىقىنى زور كۈچ بىلەن كېڭەيتتۇق، ئومۇملاشتۇردۇق، ئۈزلۈكسىز ھالدا يۇقىرى سۈپەتلىك تەرەققىيات جەريانىدا ئاساسىي كىشىلىك ھوقۇققا كاپالەتلىك قىلىپ، خەلق تۇرمۇشىنى كاپالەتلەندۈرۈپ ۋە ياخشىلاپ، ھەر مىللەت كادىرلار، ئاممىنى ئىتتىپاقلاشتۇرۇپ ۋە يېتەكلەپ جۇڭگوچە زامانىۋىلاشتۇرۇشنىڭ شىنجاڭ ئەمەلىيىتىنى پۇختا ئالغا سىلجىتىپ، قۇدرەتلىك دۆلەت قۇرۇش، مىللەتنى گۈللەندۈرۈشنىڭ شىنجاڭ سەھىپىسىنى جاسارەت بىلەن پۈتۈپ چىقتۇق.
سوئالغا جاۋاب بەرگەندىن كېيىن، ما شىڭرۇي يەنە جۇڭگو ـ چەت ئەل تاراتقۇ مۇخبىرلىرىنى تەكلىپ قىلدى. ئۇ مۇنداق دېدى: مىڭ ئاڭلىغاندىن بىر كۆرگەن ئەلا، كۆپچىلىكنىڭ شىنجاڭغا كېلىپ ئايلىنىپ بېقىشى، كۆرۈپ بېقىشىنى، شىنجاڭنىڭ ئالەمشۇمۇل ئۆزگىرىشلىرىنى ئىگىلەپ، شىنجاڭنىڭ جۇشقۇن، كۈچلۈك تەرەققىيات ۋەزىيىتىگە گۇۋاھ بولۇپ، شىنجاڭنىڭ كەلگۈسى تەرەققىياتىنىڭ چەكسىز يوشۇرۇن كۈچىنى ھېس قىلىشىنى قارشى ئالىمەن.
ۋەكىل ئەركىن تۇنىياز شىنخۇا ئاگېنتلىقى مۇخبىرىنىڭ شىنجاڭنىڭ يىپەك يولى ئىقتىساد بەلبېغى يادرولۇق رايونى قۇرۇش، غەربكە ئېچىۋېتىشتىكى كۆۋرۈك بېشى ئىستىھكامى بەرپا قىلىش توغرىسىدىكى سورىغان سوئالىغا جاۋاب بەردى. ئۇ مۇنداق دېدى: باش شۇجى شى جىنپىڭ «بىر بەلباغ، بىر يول»نى ئورتاق بەرپا قىلىش تەشەببۇسىنى ئوتتۇرىغا قويغاندىن بۇيان، شىنجاڭ ئۆزىنىڭ رايون خاراكتېرلىك ئېچىۋېتىش ئىستراتېگىيەسىنى دۆلەتنىڭ غەربكە ئېچىۋېتىش ئومۇمىي ئورۇنلاشتۇرمىسىغا كىرگۈزۈشتە چىڭ تۇرۇپ، «بىر پورت، ئىككى رايون، بەش چوڭ مەركەز، پورت ئىقتىساد بەلبېغى» قۇرۇلۇشىنى تۇتقا قىلىپ، سىياسەت جەھەتتە پىكىرلىشىش، ئەسلىھەلەرنى تۇتاشتۇرۇش، سودىنى راۋانلاشتۇرۇش، مەبلەغنى يۈرۈشتۈرۈش، خەلق رىشتىنى تۇتاشتۇرۇشنى سىجىل كۈچەيتىپ، يېڭى تەرەققىيات ئەندىزىسىگە پائال مۇلازىمەت قىلدى ۋە سىڭىشتى. بولۇپمۇ يېقىنقى ئىككى يىلدىن بۇيان، بىز ئىچكى ـ تاشقى ئېچىۋېتىش سالمىقىنى سىجىل زورايتىپ، ئىچكى قۇرۇقلۇقنى ئېچىۋېتىش ۋە چېگرا بويىنى ئېچىۋېتىش ئېگىزلىكى بەرپا قىلىشتا يېڭى ئۈنۈمنى قولغا كەلتۈردۇق. بىز باش شۇجى شى جىنپىڭنىڭ «بىر بەلباغ، بىر يول»نى ئورتاق بەرپا قىلىش توغرىسىدىكى مۇھىم بايانىنى چوڭقۇر ئىزچىللاشتۇرۇپ، ئەمەلىيلەشتۈرۈپ، تېخىمۇ تەشەببۇسكار بولغان ئېچىۋېتىش ئىستراتېگىيەسىنى يولغا قويۇپ، يىپەك يولى ئىقتىساد بەلبېغى يادرولۇق رايونى قۇرۇلۇشىنى يۇقىرى سۈپەتتە ئالغا سىلجىتىپ، شىنجاڭ ئەركىن سودا سىناق رايونىنى يۇقىرى باشلىنىش نۇقتىسىدىن قۇرۇپ، ئۆلكىلەر ئارا ئىقتىسادىي ھەمكارلىقنى يۇقىرى ئۆلچەمدە قانات يايدۇرۇپ، خەۋپ ـ خەتەرنىڭ ئالدىنى ئېلىش ۋە ئۇنى تىزگىنلەشنى يۇقىرى يۈكسەكلىكتە ياخشى ئىشلەپ، شىنجاڭنىڭ يۇقىرى سەۋىيەلىك ئېچىۋېتىش يېڭى ۋەزىيىتىنى ئۈزلۈكسىز يارىتىمىز.
فىرانسىيە جۇڭگو تىل ـ يېزىقى تېلېۋىزىيە تاراتقۇ گۇرۇھى، فېڭخۇاڭ سۈنئىي ھەمراھ تېلېۋىزىيەسى، جۇڭگو گېزىتى، رۇسىيە ئىتار ـ تاس ئاگېنتلىقى، ئىيوردانىيە ئاگېنتلىقى، پېڭپەي خەۋەرلىرى، مىسىر جۇڭگو ھەپتىلىك گېزىتى مۇخبىرلىرى يەنە قار ـ مۇز ساياھىتى، شىنجاڭنىڭ «سەككىز چوڭ كەسىپ توپى» قۇرۇلۇشى، خەلق تۇرمۇشىنى كاپالەتلەندۈرۈش ۋە ياخشىلاش، چەت ئەللىك ساياھەتچىلەرنىڭ شىنجاڭغا كېلىپ ساياھەت قىلىشى، سۇ بايلىقىنى باشقۇرۇش ۋە ئۇنىڭدىن پايدىلىنىش قاتارلىق خىزمەتلەر توغرىسىدا سوئال سورىدى، شىنجاڭ ۋەكىللەر ئۆمىكىدىكى ۋەكىللەر بىر ـ بىرلەپ جاۋاب بەردى. شىنجاڭنىڭ پاختا كەسپىدە «مەجبۇرىي ئەمگەككە سېلىش» مەۋجۇتمۇ ـ يوق دېگەن سوئالغا، ئاساسىي قاتلامدىن كەلگەن ۋەكىل ئەكرەم مەمتىمىن مۇنداق ئېنىق جاۋاب بەردى: بۈگۈنكى كۈندە، كېۋەز تېرىقچىلىقىنىڭ پۈتۈن جەريانىدا ماشىنىلاشتۇرۇش ئىشقا ئاشۇرۇلدى، پاختا كەسپى شىنجاڭ خەلقىنىڭ مۇقىم ئىشقا ئورۇنلىشىشى، كىرىمىنى ئاشۇرۇپ بېيىشىدىكى بەخت گۈلى، ھەر مىللەت ئامما ئۆز يېرىنى تېرىپ، ئۆزىنىڭ پاختىسىنى يىغىپ، ئۆزىنىڭ بەختلىك تۇرمۇشىنى ئۆتكۈزۈۋاتىدۇ، ئاتالمىش «مەجبۇرىي ئەمگەككە سېلىش» پۈتۈنلەي تۇتۇرۇقسىز گەپ! ئالاقىدار ۋەكىللەر مۇنداق دېدى: ئامېرىكا «مەجبۇرىي ئەمگەككە سېلىش»نى دەستەك قىلىپ شىنجاڭنىڭ پاختا توقۇمىچىلىق كەسپىگە چەكلەش تەدبىرى يۈرگۈزدى، ماھىيەتتە شىنجاڭدا «ئىشسىز قېلىشقا مەجبۇر بولۇش» «نامراتلىشىپ كېتىشكە مەجبۇر بولۇش»نى پەيدا قىلىپ، شىنجاڭنىڭ گۈللىنىشى، مۇقىملىقىغا بۇزغۇنچىلىق قىلىش، جۇڭگونىڭ تەرەققىياتىنى توسۇشقا ئۇرۇندى. شىنجاڭدا ئاتالمىش «ئۇيغۇر مەدەنىيىتىنى يوقىتىش» ئەھۋالىنىڭ مەۋجۇت ياكى مەۋجۇت ئەمەسلىكى توغرىسىدىكى سوئالغا جاۋاب بەرگەندە، شىنجاڭ سەنئەت ئورنى مۇقام سەنئەت ئۆمىكىدىن كەلگەن ۋەكىل دىلشات پەرھات ئۆز كەچۈرمىشىنى مىسال قىلىپ، شىنجاڭنىڭ ھەرقايسى مىللەتلەرنىڭ مۇنەۋۋەر ئەنئەنىۋى مەدەنىيىتىنى قوغداش ۋە ئۇنىڭغا ۋارىسلىق قىلىشتىكى تۈرلۈك سىياسەت ـ تەدبىرلىرىنى تەپسىلىي تونۇشتۇرۇپ، شىنجاڭدىكى ھەرقايسى مىللەتلەر مەدەنىيىتىنىڭ جۇڭخۇا مەدەنىيىتى گۈلزارلىقىدا كۆزنى قاماشتۇرۇپ رەڭدارلىققا تولۇپ، زور تەرەققىيات، زور گۈللىنىش مەزگىلىنى كۈتۈۋالغانلىقىنى، ئاتالمىش «مەدەنىيەتنىڭ يوقىلىشى» ئەسلا مەۋجۇت ئەمەسلىكىنى ئېنىق كۆرسىتىپ بەردى.
چۈشتىن بۇرۇنقى قاراپ چىقىشتا، ئەركىن تۇنىياز، ۋاڭ مىڭشەن قاتارلىق ۋەكىللەر سۆز قىلىپ، شىنجاڭنىڭ ئىقتىساد، جەمئىيىتىنىڭ يۇقىرى سۈپەتلىك تەرەققىياتى، قانۇنچىل شىنجاڭ قۇرۇلۇشى، شىنجاڭنى مەدەنىيەت ئارقىلىق ئوزۇقلاندۇرۇش، مىللەتلەر ئىتتىپاقلىقى قاتارلىق خىزمەتلەرنىڭ قانات يايدۇرۇلۇش ئەھۋالىنى تونۇشتۇردى.
شۇ كۈنى چۈشتىن كېيىن، شىنجاڭ ۋەكىللەر ئۆمىكى گۇرۇپپىلارغا بۆلۈنۈپ، گوۋۇيۈەننىڭ تەشكىلىي قانۇنىنىڭ ئۆزگەرتىلگەن لايىھەسىنى قاراپ چىقتى. ۋەكىللەر مۇنداق بىلدۈردى: گوۋۇيۈەننىڭ تەشكىلىي قانۇنىغا تۈزىتىش كىرگۈزۈش پارتىيە ۋە دۆلەت ئىشلىرىنىڭ تەرەققىيات ئېھتىياجىغا تېخىمۇ ياخشى ئۇيغۇنلىشىپ، ھۆكۈمەت ئىدارە قىلىش سىستېمىسى ۋە ئىدارە قىلىش ئىقتىدارىنىڭ زامانىۋىلىشىش سەۋىيەسىنى ئۈزلۈكسىز ئۆستۈرۈشتىكى مۇھىم تەدبىر، ئۇ گوۋۇيۈەننىڭ تەشكىلىي تۈزۈمى ۋە خىزمەت تۈزۈمىنى يەنىمۇ تاكامۇللاشتۇرۇپ، توغرا سىياسىي يۆنىلىشكە ھەقىقىي كاپالەتلىك قىلىپ، ھۆكۈمەتنىڭ ئۆز قۇرۇلۇشىنى ئومۇميۈزلۈك كۈچەيتىپ، خەلق رازى بولىدىغان قانۇنچىل ھۆكۈمەت، ئىجادچان ھۆكۈمەت، پاك ھۆكۈمەت ۋە مۇلازىمەتچان ھۆكۈمەت قۇرۇشنى پۇختا قانۇنچىللىق كاپالىتى بىلەن تەمىنلەيدۇ، بۇ لايىھەگە تامامەن قوشۇلىمىز.
مەملىكەتلىك خەلق قۇرۇلتىيى ۋەكىللىرىدىن لى شيەنفا، تيەن شياڭلى، چېن ۋېيجۈن، سارقىت ئاقان، مەمتىمىن قادىر، شۆ بىن، جىن جىجېن، باتۇ، دىلشات سايىم، گاۋ جىمىڭ قاتارلىقلار يىغىنغا قاتناشتى. جياڭ شىنجۈن، دۇ خۇڭيەن قاتارلىقلار يىغىنغا سىرتتىن قاتناشتى.
