ئانار بۇلۇت \ شىنجاڭ گېزىتى خەۋىرى (مۇخبىر زوۋ يى فوتوسى، خەۋىرى) 2-ئاينىڭ 27-كۈنى، ئۈرۈمچى خۇڭسەن تەنتەربىيە سارىيىدا، 2024-2023-يىللىق مۇسابىقە پەسلىدىكى جۇڭگو ئاياللار ۋاسكېتبول بىرلەشمە مۇسابىقىسى (WCBA)دە، شىنجاڭ ئاياللار ۋاسكېتبول كوماندىسى ئۆز مەيدانىدا 83:59 نەتىجە بىلەن فۇجيەن شيامېن ئاياللار ۋاسكېتبول كوماندىسىنى يەڭدى.
بۇ مەيدان مۇسابىقىدە شىنجاڭ ئاياللار ۋاسكېتبول كوماندىسىدىكى چەت ئەللىك ماھىر ئەنسۇنا سىتىۋېنىس ماھارىتىنى ياخشى جارى قىلدۇرۇپ 25 نومۇرغا ئېرىشتى، گاردىن قايتقان 12 توپنى ئالدى، ۋۇ يىفەن 20 نومۇرغا ئېرىشتى، گاردىن قايتقان بەش توپنى ئالدى، جۇ مېيچى، سۈن رۇيياۋ ئايرىم-ئايرىم ھالدا 10 نومۇرغا ئېرىشتى، لى يۈچيۇڭ 6 نومۇرغا ئېرىشتى، سەككىز قېتىم ياردەمچى ھۇجۇم قىلدى، گاردىن قايتقان ئالتە توپنى ئالدى. بىر قىسىم ئاساسلىق ئەزالار كەم ئەھۋالدا، شىنجاڭ ئاياللار ۋاسكېتبول كوماندىسىدىكى قىزلار باتۇرلۇق بىلەن جەڭ قىلىش ۋە ئېلىشىشقا جۈرئەت قىلىپ، چوڭ نومۇر بىلەن غەلىبىنى قولغا كەلتۈرۈپ، پۈتۈن مەيداندىكى توپ مەستانىلىرىنىڭ ئالقىشىغا ۋە مەدىتىگە ئېرىشتى.
2-ئاينىڭ 27-كۈنى، شىنجاڭ ئاياللار ۋاسكېتبول كوماندىسىنىڭ كىچىك توپ مەستانىلىرى بىلەن مەدەتچىلەر ئەترىتىنىڭ ئەزالىرى بىرلىكتە توردا ئالقىشلانغان ئۇسسۇل «كېمۇسەن»نى ئوينىماقتا.
«ئانار بۇلۇت»تىن ئېلىپ تەرجىمە قىلىندى
