نەق مەيدان خەۋىرى | قاراسۇ كەنتى ئاھالىلىرى ئەتكەن ھورى چىقىپ تۇرغان پولۇ تەييار بولدى

 1-ئاينىڭ 23-كۈنى، ئۇچتۇرپان ناھىيەسى يامانسۇ قىرغىز مىللىي يېزىسىنىڭ قاراسۇ كەنتىدە، شۇ جايدىكى كادىرلار پولو ئەتمەكتە.

تىيانشان تورى-شىنجاڭ گېزىتى مۇخبىرى ليۇ يى فوتوسى

    1-ئاينىڭ 23-كۈنى سائەت 2دىن 9 مىنۇت ئۆتكەندە، شىنجاڭ ئاقسۇ ۋىلايىتىنىڭ ئۇچتۇرپان ناھىيەسىدە 7.1 بال يەر تەۋرىدى. ئۇچتۇرپان ناھىيەسىنىڭ يامانسۇ قىرغىز يېزىسى قاراسۇ كەنتى يەر تەۋرەش مەركىزىدىن 20 نەچچە كىلومېتىر يىراقلىقتا بولسىمۇ، يەر تەۋرەشنىڭ كۈچلۈك بۇزغۇنچىلىق كۈچى يەنىلا بۇ كەنتنى ئاز بولمىغان بۇزغۇنچىلىققا ئۇچراتتى.

   قاراسۇ كەنتى جايلاشقان رايون يەر تەۋرەش كۆپ يۈزبېرىدىغان رايون بولۇپ، تارىخىي سانلىق مەلۇماتلاردا كۆرسىتىلىشىچە، يەر تەۋرەش مەركىزىنىڭ ئەتراپىدىكى 200 كىلومېتىر دائىرىدە يېقىنقى بەش يىلدىن بۇيان يۈز قېتىمدىن ئارتۇق ئۈچ بالدىن يۇقىرى يەر تەۋرىگەن، ئەمما تەۋرەش دەرىجىسى بۇنداق كۈچلۈك بولغان يەر تەۋرەش يۈز بېرىپ باقمىغان.

    «ئۆيىمىزنىڭ تاملىرىغا چاك كېتىپتۇ، قالدۇق يەر تەۋرەشنىڭ يەنە بۇزغۇنچىلىق پەيدا قىلىشىدىن ئەنسىرەپ، ئاپام ئىككىمىز كەنت كادىرلىرىنىڭ ياردىمىدە كەنت كومىتېتىغا تەسىس قىلىنغان ئورۇنلاشتۇرۇش نۇقتىسىغا كۆچۈپ كەلدۇق.» قاراسۇ كەنتىدىكى دېھقان گۈلباھار ھەسەن مۇنداق دېدى: يەر تەۋرەشنىڭ بۇزغۇنچىلىقى كۈچلۈك بولسىمۇ، ھۆكۈمەتنىڭ تەرتىپلىك ئورۇنلاشتۇرۇش خىزمىتى بىر ئائىلە كىشىلىرىنىڭ ۋاقىتلىق قىيىنچىلىقنى ئورتاق يېڭىشىمىزگە ئىشەنچ ئاتا قىلدى.

    30 مىنۇتتا ئۆينىڭ بىخەتەرلىك ئەھۋالىنى بىرمۇبىر تەكشۈرۈش تۈگىدى، بىر سائەت ئىچىدە ئورۇنلاشتۇرۇش-خەتەردىن ساقلىنىش تاماملاندى، ئەتىگەن سائەت 9دا ۋاقتىدا ناشتا قىلدى، ئورۇنلاشتۇرۇش نۇقتىسىدا سۇ، توك، ئىسسىق تاماق، مەش بار... گۈلباھار ئۆتكەن بىر كېچىدە يۈز بەرگەن ئىشلارنى تەمكىنلىك بىلەن ئەسلىدى، ئۇ يەر تەۋرەش ئاپىتىنىڭ تەسىرىگە ئۇچرىغان بولسىمۇ، ئۆزىنى يوقىتىپ قويمىغان ئىدى.

   بۇ تەمكىنلىك ئاساسەن شۇ جايدىكى كادىرلارنىڭ تىرىشچانلىقىدىن كەلگەن. يەر تەۋرىگەندىن كېيىن، شۇ جايدىكى ناھىيە، يېزا، كەنت ئۈچ دەرىجىلىك كادىرلار دەرھال يەر تەۋرەشكە تاقابىل تۇرۇپ، ئاپەتتىن قۇتقۇزۇش خىزمىتىگە ئاتلاندى. يامانسۇ قىرغىز مىللىي يېزىلىق پارتىيە كومىتېتىنىڭ ئەزاسى گۈلبوستان ساۋۇت مۇنداق دېدى: ئورۇنلاشتۇرۇش نۇقتىسىغا كەلگەن كەنت ئاھالىلىرىنىڭ قىش سوغۇقىدا قالماسلىقى ئۈچۈن، يەرلىكتىكى ھەر دەرىجىلىك كادىرلار كېچىلەپ ھەرىكەتكە كېلىپ، ئۆيمۇئۆي كىرىپ، يوشۇرۇن خەۋپ-خەتەرنى بىرمۇبىر تەكشۈردى، ئاپەتكە ئۇچرىغان ئاممىنى ۋاقتىدا يۆتكىدى ھەمدە يېتەرلىك زاپاس ماددىي ئەشيالارنى يۆتكەپ كەلدى، سوغۇقتىن مۇداپىئەلىنىش كىيىملىرىنى تولۇق تەييارلىدى.

   «تەييار يېمەكلىكلەر بار بولۇپلا قالماي، بىز يەنە ئاشپەزلەرنى تەكلىپ قىلىپ، كەنت ئاھالىلىرىگە نەق مەيداندا مەززىلىك ئىسسىق تاماق ئېتىپ بەردۇق.» گۈلبوستان مۇنداق دېدى: ئورۇنلاشتۇرۇش نۇقتىسىدا زاپاس ساقلانغان تۈرلۈك يېمەكلىك ماتېرىياللىرى ۋە يېمەكلىكلەر ئۈچ كۈنلۈك ئېھتىياجنى قاندۇرالايدۇ، كادىرلار كېيىن يەنە تۈرلۈك كاپالەت خىزمىتىنى ياخشى ئىشلەپ، ئاددىي ئۆي تامىقى ئارقىلىق ئائىلىنىڭ ئىللىقلىقىنى ھېس قىلدۇرىدۇ.

   نۆۋەتتە، قاراسۇ كەنتىنىڭ كەنت ئاھالە كومىتېتىدىكى ئورۇنلاشتۇرۇش نۇقتىسىدا تۈرلۈك ئورۇنلاشتۇرۇش خىزمەتلىرى يەنىلا جىددىي ئىشلەنمەكتە. ھەرقايسى يوللاردىكى قۇتقۇزۇش كۈچلىرى ئارقا- ئارقىدىن يېتىپ كەلدى، پۈتۈن كەنتتىكى ئاپەتكە ئۇچرىغان ئامما مۇۋاپىق ئورۇنلاشتۇرۇلدى، ئورۇنلاشتۇرۇش نۇقتىسىدىكى 25 چېدىر پۈتتى، سۇ، توك، پار قاتارلىق ئۇل ئەسلىھە كاپالىتى تەدرىجىي مۇكەممەللەشتى.