تىيانشان تورى   ›   خەۋەر مەركىزى   ›   مەملىكەت

تەتقىقاتتا بايقىلىشىچە، پۈتۈن يەر شارىدىكى دېڭىز-ئوكيانلاردا 170 تىرىليون سولياۋ مىكرو زەررىچىسى بار ئىكەن

فىرانسىيە ئاخبارات ۋاستىلىرىنىڭ شۇ يەر ۋاقتى 3-ئاينىڭ 10-كۈنى خەۋەر قىلىشىچە، بىر تۈرلۈك ئەڭ يېڭى تەتقىقاتتا كۆرسىتىلىشىچە، سولياۋ ئەخلەتلىرىنىڭ بۇلغىشىنىڭ تەسىرىدە، 2019-يىلىغىچە، پۈتۈن يەر شارىدىكى دېڭىز-ئوكيانلاردا لەيلەپ يۈرگەن سولياۋ مىكرو زەررىچىلەر تەخمىنەن 170 تىرىليونغا يېتىپ، دېڭىز-ئوكيانلارنىڭ سولياۋدىن بۇلغىنىشى بارغانسېرى ئېغىرلىشىپ كەتكەن.

شۇ جاي ۋاقتى 3-ئاينىڭ 8-كۈنى، خەلقئارالىق ژۇرنال «ئاممىۋى ئىلىم-پەن كۇتۇپخانىسى»دا ئېلان قىلىنغان بىر تۈرلۈك تەتقىقاتتا كۆرسىتىلىشىچە، 2019-يىلىغىچە، پۈتۈن يەر شارىدىكى دېڭىز-ئوكيانلاردا لەيلەپ يۈرگەن سولياۋ مىكرو زەررىچىلەر 170 تىرىليون يەتكەن بولۇپ، ئومۇمىي ئېغىرلىقى تەخمىنەن 2 مىليون 300 مىڭ توننا كېلىدىكەن. دىققەت قىلىشقا تېگىشلىكى شۇكى، تەتقىقاتچىلار 1979-يىلىدىن 2019-يىلىغىچە بولغان بۇ 40 يىلدا ئاتلانتىك ئوكيان، تىنچ ئوكيان، ھىندى ئوكيان ۋە ئوتتۇرا دېڭىزنىڭ بۇلغىنىش ئەھۋالىنى تەھلىل قىلىپ، 1990-يىلدىن بۇرۇن سولياۋ ئەخلەتلەرنىڭ روشەن كۆپىيىش يۈزلىنىشى كۆرۈلمىگەنلىكىنى بايقىغان. 1990-يىلىدىن 2005-يىلىغىچە بولغان ئارىلىقتا داۋالغۇش كۆرۈلۈپ، 2005-يىلىدىن كېيىن بولسا تېز كۆپىيىشكە باشلىغان.

    تەتقىقاتتا كۆرسىتىلىشىچە، كۆپ قىسىم دېڭىز-ئوكيان سولياۋ ئەخلەتلىرى بېلىق تورى ۋە فۇپياۋ قاتارلىق بېلىقچىلىق سايمانلىرى ئىكەن، ئۇنىڭدىن قالسا، كىيىم-كېچەك، ئاپتوموبىل بالونى ۋە بىر قېتىملىق سولياۋدىن ياسالغان بۇيۇملار قاتارلىقلار ئىكەن. تەتقىقاتتا دېيىلىشىچە، بۇ سولياۋلار دېڭىز-ئوكيانغا ئېقىپ كىرگەندىن كېيىن پارچىلىنىپ تېخىمۇ كىچىك سولياۋ دانىچىلىرىغا ئايلانغان، بىر قىسىم دېڭىز-ئوكيان جانلىقلىرى ئۇلارنى خاتا ھالدا ئوزۇق دەپ بىلىپ يۇتۇۋالغان، بۇنىڭ بىلەن بەزى دېڭىز-ئوكيان جانلىقلىرىنىڭ ئۆلۈشىنى كەلتۈرۈپ چىقارغان.

    ئۇنىڭدىن باشقا، ئىقتىسادشۇناسلار ئاقىللار ئامبىرى ۋە ياپونىيەنىڭ پايدا ئالمايدىغان ئورگىنى «ياپونىيە مالىيە گۇرۇھى»نىڭ بىرلىكتە ئېلان قىلغان دوكلاتىغا ئاساسلانغاندا، نۆۋەتتىكى ۋەزىيەتتىن قارىغاندا، 2050-يىلىغا بارغاندا، 20 دۆلەت گۇرۇھى دۆلەتلىرىنىڭ يىللىق سولياۋ ئىشلىتىش مىقدارى 2019-يىلىدىكىنىڭ ئىككى ھەسسىسىگە باراۋەر كېلىدىغان بولۇپ، 451 مىليون توننىغا يېتىدىكەن. دوكلاتتا دېيىلىشىچە، ئەگەر تەدبىر قوللىنىپ تىزگىنلەنمىسە، پۈتۈن يەر شارىدىكى سولياۋ ئەخلەتلەر يەنىمۇ كۆپىيىپ، دېڭىز-ئوكياننىڭ بۇلغىنىشىنى ئېغىرلاشتۇرۇۋېتىدىكەن.

​مەنبە: مەركىزىي تېلېۋىزىيە ئىستانسىسى ئاخبارات تېرمىنالى

«ئانار بۇلۇت»تىن ئېلىپ تەرجىمە قىلىندى

مەسئۇل مۇھەررىر : ھەلىمە قۇربان

ئەسكەرتىش:

تورىمىزدىكى ئەسەرلەرنىڭ نەشر ھوقۇقى شىنجاڭ گېزىتخانىسى(شىنجاڭ گېزىتچىلىك ـ تاراتقۇ <گۇرۇھ> چەكلىك شىركىتى)گە تەۋە. نەشر ھوقۇقىغا ئىگە ئەسەر ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ.