شىنجاڭ گېزىتى پۈتۈن تاراتقۇ مۇخبىرى ما يىنىڭ خەۋەر قىلىدۇ: 2016 - يىلىدىكى 223 نۆۋەت قاتناشتىن 2019 - يىلىدىكى 1102 نۆۋەت قاتناشقىچە، «13 - بەش يىل» مەزگىلىدە، شىنجاڭدىن يولغا چىققان جۇڭگو - ياۋروپا نۆۋەتچى پويىزى يىلىغا ئوتتۇرىچە ％170لىك ئېشىش سۈرئىتى بىلەن، چىرايلىق ئۆرلەش ئەگرى سىزىقىنى ياراتتى.
2014 - يىلى 3 - ئايدا، ئۈرۈمچى − ئالماتا يۈك توشۇش نۆۋەتچى پويىزى قاتنىدى، شىنجاڭ چۇڭچىڭ، خۇبېي، سىچۇەن، خېنەن، شەنشىدىن كېيىن، غەربكە قاتنايدىغان خەلقئارا يۈك توشۇش نۆۋەتچى پويىزى قاتناش سېپىگە رەسمىي كىردى.
2016 - يىلى 5 - ئايدا، جۇڭگو - ياۋروپا نۆۋەتچى پويىزى ئۈرۈمچى يىغىلىش مەركىزى پۈتۈپ ئىشقا كىرىشتۈرۈلۈپ، يىغىپ توپلاش - يىغىپ توشۇش ئەندىزىسىنى قوللىنىش ئۈستىدە ئىزدىنىشكە باشلىدى. 11 - ئايدا، شىنجاڭ جۇڭگو - ياۋروپا نۆۋەتچى پويىزى (شىنجاڭ − ئوتتۇرا ئاسىيا)نىڭ قاتناش كۆلىمى كۈنىگە بىر نۆۋەتكە يەتتى، پۈتۈن مەملىكەتنىڭ ھەرقايسى جايلىرىدىن كەلگەن ئوتتۇرا ئاسىياغا توشۇلىدىغان ماللار ئاساسلىقى ئۈرۈمچىدە يىغىلىپ توشۇلدى.
2017 - يىلى 11 - ئايغىچە، شىنجاڭ جۇڭگو - ياۋروپا نۆۋەتچى پويىزى جەمئىي 1000 نۆۋەت قاتناش چوڭ ئۆتكىلىنى بۆسۈپ ئۆتتى؛ 2018 - يىلى 10 - ئايغىچە، شىنجاڭ جۇڭگو - ياۋروپا نۆۋەتچى پويىزى جەمئىي 2000 نۆۋەت قاتناپ، شۇ يىللىق قاتناش نۆۋەت سانى تۇنجى قېتىم 1000 نۆۋەتنى بۆسۈپ ئۆتتى، «جۇڭگو - ياۋروپا نۆۋەتچى پويىزى يىغىپ توپلاش - يىغىپ توشۇش ئەندىزىسى» ئەركىن سودا سىناق رايونى ئىسلاھاتىنى نۇقتىدا سىناق قىلىش تەجرىبىسى سۈپىتىدە مەملىكەت دائىرىسىدە كۆپەيتىلىپ كېڭەيتىلدى؛ 2020 - يىلى 8 - ئاينىڭ ئاخىرىغىچە، شىنجاڭ جۇڭگو - ياۋروپا نۆۋەتچى پويىزى جەمئىي 3903 نۆۋەت قاتنىدى، جۇڭگو - ياۋروپا نۆۋەتچى پويىزى ئۈرۈمچى يىغىلىش مەركىزىنىڭ قاتناش لىنىيەسى 21گە يېتىپ، ئوتتۇرا ئاسىيا ھەم ياۋروپادىكى 23 دۆلەت ۋە رايونغا تۇتاشتۇرۇلدى.
جۇڭگو - ياۋروپا نۆۋەتچى پويىزى زىچلاشتۇرۇلۇپ، دائىملاشتۇرۇلۇپ قاتناپ، تېخىمۇ كۆپ كارخانىنىڭ شىنجاڭدا ماكانلىشىشىغا تۈرتكە بولۇپ، شىنجاڭنىڭ «يول ئىقتىسادى»دىن «كەسىپ ئىقتىسادى»غا قاراپ تىپنى ئۆزگەرتىپ دەرىجىنى ئۆستۈرۈشىگە تۈرتكە بولدى.
