شىنخۇا ئاگېنتلىقى، بېيجىڭ، 7 - ئاينىڭ 27 - كۈنى تېلېگراممىسى 7 - ئاينىڭ 27 - كۈنى چۈشتىن بۇرۇن، دۆلەت رەئىسى شى جىنپىڭ كېلىشكىنى بويىچە بىرازىلىيە زۇڭتۇڭى لۇلا بىلەن تېلېفونلاشتى.
شى جىنپىڭ مۇنداق كۆرسەتتى: يېقىنقى يىللاردىن بۇيان، جۇڭگو بىلەن بىرازىلىيە تەقدىر ئورتاق گەۋدىسى قۇرۇلۇشى ۋە ئىككى دۆلەتنىڭ تەرەققىيات ئىستراتېگىيەسىنى ئۇدۇللاشتۇرۇشتا پائال ئىلگىرىلەشلەرنى قولغا كەلتۈرۈپ، جۇڭگو بىلەن بىرازىلىيە ئىككى دۆلەتنىڭ تەرەققىياتى ۋە ئىككى دۆلەت خەلقىنىڭ بەخت - سائادىتىنى ئىلگىرى سۈرۈشتە مۇھىم رولىنى جارى قىلدۇردى، شۇنداقلا داۋالغۇپ تۇرۇۋاتقان خەلقئارا ۋەزىيەتكە قىممەتلىك مۇقىملىق قوشتى. بۇ يىل جۇڭگو كوممۇنىستىك پارتىيەسى قۇرۇلغانلىقىنىڭ 105 يىللىقى ۋە جۇڭگونىڭ «15 - بەش يىل»ىنىڭ باشلىنىش يىلى، بىرازىلىيەمۇ دۆلەت ئىچىدىكى مۇھىم سىياسىي قارالمىلارنى كۈتۈۋالىدۇ. جۇڭگو تەرەپ بىرازىلىيە تەرەپ بىلەن ئىككى تەرەپلىك ۋە كۆپ تەرەپلىك ئىستراتېگىيەلىك ھەمكارلىقنى يەنىمۇ كۈچەيتىپ، ئىككى دۆلەت تەقدىر ئورتاق گەۋدىسى قۇرۇلۇشىنىڭ ياخشى ۋەزىيىتىنى داۋاملاشتۇرۇشنى خالايدۇ.
شى جىنپىڭ مۇنداق تەكىتلىدى: يېڭى ۋەزىيەت، يېڭى خىرىس ئالدىدا، جۇڭگو بىلەن بىرازىلىيە يەرشارىنىڭ جەنۇبىدىكى مۇھىم ئەزا دۆلەت بولۇش سۈپىتى بىلەن، قەتئىي تۈردە تارىخنىڭ توغرا تەرىپى ۋە مەدەنىيلىكنىڭ تەرەققىياتى تەرىپىدە تۇرۇپ، دۇنياۋى ئىدارە قىلىش سىستېمىسىنى ئىسلاھ قىلىش، مۇكەممەللەشتۈرۈش، خەلقئارا ئادىللىق، ھەققانىيلىقنى قوغداش ئۈچۈن تېخىمۇ زور ئىجابىي رولىنى جارى قىلدۇرۇشى كېرەك. ئىككى تەرەپ قول تۇتۇشۇپ «چوڭ كېسەك ئالتۇن دۆلەتلىرى ھەمكارلىقى»نىڭ يۇقىرى سۈپەتلىك تەرەققىياتىغا تۈرتكە بولۇپ، ھەمكارلىق يۆنىلىشىنى دەل جايىدا ئىگىلەپ، ئىتتىپاقلىشىش ۋەزىيىتىنى قوغداپ، تېخىمۇ كۆپ نەتىجىلەرنى يارىتىپ، يەر شارىنىڭ جەنۇبىنىڭ ئىتتىپاقلىشىپ ئۆزىنى قۇدرەت تاپتۇرۇش يېڭى سەھىپىسىنى پۈتۈشى كېرەك. جۇڭگو تەرەپ بىرازىلىيە تەرەپنىڭ خەلقئارادىكى ئورنى ۋە مۇھىم تەسىر كۈچىگە يۈكسەك ئەھمىيەت بېرىدۇ، بىرازىلىيەنىڭ ئۆزىنىڭ ئىگىلىك ھوقۇقى، مۇستەقىللىقىنى قوغداپ، تاشقى كۈچلەرنىڭ ئارىلىشىشىغا قارشى تۇرۇشىنى ھەم رايون ۋە دۇنيانىڭ تىنچلىقى، مۇقىملىقىنى قوغداش ئۈچۈن بىرازىلىيە تەرەپنىڭ تۆھپىسىنى قوشۇشىنى قوللايدۇ.
لۇلا مۇنداق بىلدۈردى: بىرازىلىيە بىلەن جۇڭگو تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتا تەقدىر ئورتاق گەۋدىسى بەرپا قىلىشتا پائال ئىلگىرىلەشلەرنى قولغا كەلتۈردى، ھەرقايسى ساھەلەردىكى ھەمكارلىق تەرەققىياتى ئۇچقاندەك تېز بولدى، ئىككى دۆلەتنىڭ سودا سوممىسىدا يەنە يېڭى سەۋىيە يارىتىلدى، «بىرازىلىيە - جۇڭگو مەدەنىيەت يىلى»دىكى تۈرلۈك پائالىيەتلەر ئىككى دۆلەت دوستلۇقىنىڭ خەلق رايى ئاساسىنى يەنىمۇ پۇختىلىدى. بىرازىلىيە تەرەپ جۇڭگو تەرەپ بىلەن سۈنئىي ئەقلىي ئىقتىدار، ئېنېرگىيە، قېزىلما بايلىق قاتارلىق ساھەلەردىكى ھەمكارلىقنى كۈچەيتىشنى ئۈمىد قىلىدۇ، تېخىمۇ كۆپ جۇڭگو كارخانىلىرىنىڭ بىرازىلىيەگە بېرىپ مەبلەغ سېلىپ، ئىككى دۆلەت ھەمكارلىقىنىڭ تېخىمۇ كۆپ خىل بولۇشى، تېخىمۇ كۆپ نەتىجىلەرنى قولغا كەلتۈرۈشىنى قارشى ئالىدۇ. بىرازىلىيە تەرەپ جۇڭگونىڭ 2026 - يىللىق دۇنيا سۈنئىي ئەقلىي ئىقتىدار يىغىنىنى مۇۋەپپەقىيەتلىك ئۆتكۈزگەنلىكىنى تەبرىكلەيدۇ، رەئىس شى جىنپىڭ ئوتتۇرىغا قويغان ئوچۇق، سىغدۇرۇشچان بولۇشتىن ئىبارەت سۈنئىي ئەقلىي ئىقتىدار خەلقئارا ھەمكارلىقى ۋە دۇنياۋى ئىدارە قىلىش ئىدىيەسىنى يۈكسەك ئالقىشلايدۇ. بىرازىلىيە تەرەپ جۇڭگو تەرەپ بىلەن كۆپ تەرەپلىك ماسلىشىشنى قويۇقلاشتۇرۇپ، بىرلەشكەن دۆلەتلەر تەشكىلاتىنىڭ نوپۇزىنى قوغداپ، كېسەك ئالتۇن دۆلەتلىرىنىڭ ئىتتىپاقلىقى، ھەمكارلىقىنى كۈچەيتىپ، كۆپ تەرەپچىلىكنى قەتئىي قوغداپ، زوراۋانلىق سىياسىيسىغا قەتئىي قارشى تۇرۇپ، قىزىق نۇقتا مەسىلىلىرىنى سۆھبەتلىشىش، كېڭىشىش ئارقىلىق ھەل قىلىشتا چىڭ تۇرۇپ، خەلقئارا ئادىللىق، ھەققانىيلىق ۋە دۇنيانىڭ تىنچلىقى، مۇقىملىقىنى ئورتاق قوغداشنى خالايدۇ.
