باھار بايرىمىلىق يولۇچى توشۇش قايتىش سەپىرىنىڭ يۇقىرى پەللىسىدە تۇرماقتا، ئەگەر سىز ئالدىراشچىلىقتا سۇپىدىن پويىز بېلىتىنى خاتا سېتىۋېلىپ قالغان ياكى خاتا مەشغۇلات قىلىپ قويغان بولسىڭىز قانداق قىلىسىز؟ ئالدىرىماڭ، بۇ يىل تۆمۈريول 12306 سۇپىسى بېلەتنى خاتا سېتىۋالسا چەكلىك ۋاقىت ئىچىدە بېلەتنى ھەقسىز قايتۇرۇش يېڭى تەدبىرىنى يولغا قويدى. بەلگىلەنگەن ۋاقىت ئىچىدە، سىزنى «نۆل تەننەرخ» بىلەن خاتا سېتىۋالغان بېلەتنى قايتۇرۇش ئىمكانىيىتىگە ئىگە قىلىدۇ، بۇ تەدبىر بۇنىڭدىن كېيىنمۇ دائىملىق يولغا قويۇلىدۇ.
بېلەتنى خاتا سېتىۋالسا چەكلىك ۋاقىت ئىچىدە ھەقسىز بېلەت قايتۇرۇش يېڭى تەدبىرى مۇلازىمىتى تۆمۈريول 12306 سۇپىسى (تور بېكىتى، Appسى، جىفۇباۋ كىچىك پىروگراممىسىنى ئۆز ئىچىگە ئالىدۇ) ئېلېكتىرونلۇق چىقىم قىلىش ياكى جۇغلانما نومۇر ئارقىلىق سېتىۋېلىنغان تۆمۈريول بېلىتىنى ئۆز ئىچىگە ئالىدۇ، پويىزغا چىقىش ۋاقتى ئۆزگەرتىلگەن بېلەت، قېتىم سانى ھېسابلىنىدىغان بېلەت، قەرەللىك بېلەت، تۆمۈريول e كارتىسى بېلىتى، ئالدىن كېلىشىپ سېتىۋېلىغان بېلەت، تولۇقلاپ سېتىۋېلىغان بېلەت، ئاۋىياتسىيە-تۆمۈريول بىرلەشمە تىرانسپورتى بېلىتى، تۆمۈريول-سۇ يولى بىرلەشمە تىرانسپورتى بېلىتى ۋە كوللېكتىپ بېلەتنى ئۆز ئىچىگە ئالمايدۇ. قاپلىغان پويىز دائىرىسى چېگرا ئىچىدىكى يولۇچىلار پويىزى ۋە شياڭگاڭ غەربىي جيۇلۇڭ ۋوگزالىدىن يولغا چىقىدىغان ياكى بۇ ۋوگزالغا بارىدىغان پاسىل ھالقىغان يولۇچىلار پويىزىنى ئۆز ئىچىگە ئالىدۇ.
دىققەت قىلىشقا تېگىشلىكى شۇكى، ئوخشاش بىر بېلەت سېتىۋالغۇچى بىر تەبىئىي كۈن ئىچىدە، پەقەت بىرلا زاكازدىكى خاتا سېتىۋالغان بېلەتنى ھەقسىز قايتۇرۇش رەسمىيىتىنى بېجىرەلەيدۇ.
بېلەت زاكاز قىلىش تەپسىلىي ئەھۋالى بېتىدىكى ئەسكەرتىشكە ئاساسەن بېلەت قايتۇرۇش مەشغۇلاتى مۇۋەپپەقىيەتلىك بولغاندىن كېيىن، «خاتا سېتىۋېلىنغان بېلەتنى قايتۇرۇش» رەسمىيەت ھەققى 0 يۈەن دەپ كۆرۈنىدۇ. ئەگەر سىز ئېلېكتىرونلۇق پۇل تۆلەپ بېلەت سېتىۋالغان بولسىڭىز، بېلەت پۇلى ئەسلىدىكى يول بويىچە قايتۇرۇلىدۇ. ئەگەر جۇغلانما نومۇر ئارقىلىق بېلەت سېتىۋالغان بولسىڭىز، ئەسلىدىكى يول بويىچە جۇغلانما نومۇر قايتۇرۇلىدۇ، قايتۇرۇلغان جۇغلانما نومۇرنىڭ كۈچكە ئىگە مۇددىتى ئۆزگەرمەيدۇ.
ئەگەر يولۇچىلار تور سىرتىدىكى كۆزنەكتە بېلەتنى خاتا سېتىۋالغان بولسا، نەق مەيداندا خىزمەتچى خادىملاردىن ياردەم تەلەپ قىلسا بولىدۇ، نەق مەيداندىكى خادىملار ياردەملىشىپ يېڭى بېلەتكە ئالماشتۇرۇپ بېرىدۇ.
دۆلەت تۆمۈريولى نەنچاڭ ئىدارىسى يىڭتەن شىمالىي ۋوگزالىنىڭ بېلەت سېتىش نۆۋەتچى خادىمى چيۇ يىيۈن مۇنداق دېدى: يولۇچىلار 12306 Appسى ياكى باشقۇرغۇچى تەرەپ تورىدا بېلەت سېتىۋالسا، پۇل تۆلەش مۇۋەپپەقىيەتلىك بولغان 30 مىنۇت ئىچىدە ھەمدە پويىز قوزغىلىشتىن تۆت سائەت بۇرۇن، بىۋاسىتە «مېنىڭ زاكازىم»دىن مۇناسىپ بېلەتنى تاپالايدۇ، بېلەت قايتۇرۇشنى چەكسىلا بىر كۇنۇپكا بىلەن ھەقسىز بېلەت قايتۇرۇش رەسمىيىتىنى بېجىرەلەيدۇ، بېلەت پۇلى ۋە جۇغلانما نومۇر ئەسلىدىكى يول بىلەن قايتىدۇ، كۆزنەككە بارمىسىمۇ بولىدۇ، ناھايىتى قولايلىق.
مەنبە: 央视新闻客户端
«ئانار بۇلۇت»تىن ئېلىپ تەرجىمە قىلىندى
