دۆلىتىمىزنىڭ 2025 - يىللىق ئادەملىك ئالەم كېمىسىنى قويۇپ بېرىش ۋەزىپىسى مۇۋەپپەقىيەتلىك تاماملاندى
10 - ئاينىڭ 31 - كۈنى كەچتە، شېنجوۋ 21 - نومۇرلۇق ئادەملىك ئالەم كېمىسىنى ئېلىپ ماڭغان چاڭجېڭ 2 - نومۇرلۇق F تىپلىق يىراقتىن تىزگىنلىنىدىغان 21 بەلگىلىك توشۇغۇچى راكېتا جيۇچۈەن سۈنئىي ھەمراھ قويۇپ بېرىش مەركىزىدە ئوت يېقىلىپ قويۇپ بېرىلدى.□ شىنخۇا ئاگېنتلىقى مۇخبىرى لى جىپېڭ فوتوسى
شىنخۇا ئاگېنتلىقى، جيۇچۈەن، 10 - ئاينىڭ 31 - كۈنى تېلېگراممىسى (مۇخبىرلار لى گولى، خۇاڭ يىچېن) دۆلىتىمىز 10 - ئاينىڭ 31 - كۈنى كەچتە شېنجوۋ 21 - نومۇرلۇق ئادەملىك ئالەم كېمىسىنى مۇۋەپپەقىيەتلىك قويۇپ بەردى، 2025 - يىللىق ئادەملىك ئالەم كېمىسىنى قويۇپ بېرىش ۋەزىپىسى مۇۋەپپەقىيەتلىك تاماملاندى.
شۇ كۈنى سائەت 23تىن 44 مىنۇت ئۆتكەندە، شېنجوۋ 21 - نومۇرلۇق ئادەملىك ئالەم كېمىسىنى ئېلىپ ماڭغان چاڭجېڭ 2 - نومۇرلۇق F تىپلىق يىراقتىن تىزگىنلىنىدىغان 21 بەلگىلىك توشۇغۇچى راكېتا جيۇچۈەن سۈنئىي ھەمراھ قويۇپ بېرىش مەركىزىدە ئوت يېقىلىپ قويۇپ بېرىلدى، تەخمىنەن ئون مىنۇتتىن كېيىن، ئالەم كېمىسى راكېتادىن مۇۋەپپەقىيەتلىك ئايرىلىپ، ئالدىن بەلگىلەنگەن ئوربىتىغا كىردى، ئالەم ئۇچقۇچىلىرى گۇرۇپپىسىدىكىلەرنىڭ ئەھۋالى ياخشى بولۇپ، قويۇپ بېرىش تولۇق مۇۋەپپەقىيەتلىك بولدى.
جۇڭگو ئادەملىك ئالەم قاتنىشى قۇرۇلۇشى ئىشخانىسىنىڭ تونۇشتۇرۇشىچە، ئالەم كېمىسى ئوربىتىغا كىرگەندىن كېيىن، ئالدىن بەلگىلەنگەن تەرتىپ بويىچە ئالەم بوشلۇقى پونكىتى بىرىكمە گەۋدىسى بىلەن ئۆز ئالدىغا تېز سۈرئەتتە ئۇچرىشىپ ئۇدۇللىشىدىكەن، شېنجوۋ 21 - نومۇرلۇق ئالەم كېمىسىنىڭ ئالەم ئۇچقۇچىلىرى گۇرۇپپىسى شېنجوۋ 20 - نومۇرلۇق ئالەم كېمىسىنىڭ ئالەم ئۇچقۇچىلىرى گۇرۇپپىسى بىلەن ئوربىتىدا نۆۋەت ئالمىشىدىكەن. ئالەم بوشلۇقى پونكىتىدا تۇرغان مەزگىلدە، شېنجوۋ 21 - نومۇرلۇق ئالەم كېمىسىنىڭ ئالەم ئۇچقۇچىلىرى گۇرۇپپىسى ئالەم بوشلۇقىدىكى ھاياتلىق ۋە ئادەم بەدىنى تەتقىقاتى، مىكرو ئېغىرلىق كۈچى فىزىكىسى ئىلمى، بوشلۇق يېڭى تېخنىكىسى قاتارلىق ساھەلەرگە ئالاقىدار كۆپ تۈر بويىچە تەجرىبە (سىناق) قىلىش ۋە قوللىنىشنى قانات يايدۇرىدىكەن، كۆپ قېتىم بۆلۈمچىدىن چىقىپ ھەرىكەت قىلىپ، ئالەم بوشلۇقى پونكىتى بوشلۇقىدىكى ئۇچۇپ يۈرگەن جىسىملاردىن مۇداپىئەلىنىش قۇرۇلمىسىنى قۇراشتۇرۇش ھەم بۆلۈمچىنىڭ ئىچى - سىرتىدىكى ئۈسكۈنىلەرنى قۇراشتۇرۇش، تەڭشەش، ئاسراش، رېمونت قىلىش قاتارلىق ۋەزىپىلەرنى تاماملايدىكەن.
بۇنىڭ بىلەن، دۆلىتىمىزنىڭ 2025 - يىللىق ئادەملىك ئالەم كېمىسىنى قويۇپ بېرىش ۋەزىپىسى مۇۋەپپەقىيەتلىك تاماملاندى. بۇ قېتىمقى ۋەزىپە قۇرۇلۇش بوشلۇق پونكىتىدىن پايدىلىنىش ۋە ئۇنى تەرەققىي قىلدۇرۇش باسقۇچىغا كىرگەندىن بۇيانقى 6 - قېتىملىق ئادەملىك ئۇچۇش ۋەزىپىسى، شۇنداقلا قۇرۇلۇش تۈرى تۇرغۇزۇلۇپ يولغا قويۇلغاندىن بۇيانقى 37 - قېتىملىق قويۇپ بېرىش ۋەزىپىسى. ھازىرغىچە، دۆلىتىمىزدە 28 نەپەر ئالەم ئۇچقۇچىسى، 44 ئادەم قېتىم ئالەم بوشلۇقىغا چىقىپ ئۇچۇش ۋەزىپىسىنى ئىجرا قىلدى.
بۇ قېتىمقى ۋەزىپە چاڭجېڭ يۈرۈشلۈك توشۇغۇچى راكېتانىڭ 604 - قېتىملىق ئۇچۇشى، شېنجوۋ ئالەم كېمىسىنىڭ 21 - قېتىملىق ئۇچۇشى ھېسابلىنىدۇ.
