ئانار بۇلۇت \ شىنجاڭ گېزىتى خەۋىرى (مۇخبىر ئۆتكۈر نىجات خەۋىرى، فوتوسى) «ئەنجۈر ماكانى» دەپ نام ئالغان ئاتۇش شەھىرىنىڭ ئەنجۈر ئۆستۈرۈش تارىخى ئۇزاق، شۇ جاينىڭ كىلىمات شارائىتى ۋە تىيانشاننىڭ قار سۈيىنىڭ ئوزۇقلاندۇرۇشىنىڭ نەتىجىسىدە، بۇ يەر ئەنجۈر ئۆستۈرىدىغان ئەڭ ياخشى رايونغا ئايلانغان. بۈگۈنكى كۈندە، ئاتۇش شەھىرىنىڭ شېنتيەن دەرۋازىسى، ئەنجۈر كەسپى مەدەنىيەت بىلەن ساياھەتنى يۇغۇرۇشتىن ئىبارەت چوڭ سەھىپىنى پۈتۈپ چىقماقتا.
9-ئاينىڭ 16-كۈنى، «گۈزەل شىنجاڭغا كىرىش» مەملىكەت بويىچە ئۆلكە دەرىجىلىك تاراتقۇلارنىڭ زىيارەت قىلىش پائالىيىتى زىيارەت ئۆمىكىنىڭ مۇخبىرلىرى ئاتۇش تيەنمېن مەنزىرە رايونىدا فىرانسىيەدىن كەلگەن ساياھەتچىلەرنى زىيارەت قىلماقتا.
9-ئاينىڭ 16-كۈنى، «گۈزەل شىنجاڭغا كىرىش» مەملىكەت بويىچە ئۆلكە دەرىجىلىك تاراتقۇلارنىڭ زىيارەت قىلىش پائالىيىتى زىيارەت ئۆمىكى ئاتۇش شەھىرىگە كېلىپ، يېزا ئىگىلىكى-مەدەنىيەت-ساياھەتتىن ئىبارەت «ئۈچ زەنجىر»نىڭ يۇغۇرما تەرەققىيات ئەھۋالىنى ئىگىلىدى. يېقىنقى يىللاردىن بۇيان، ئاتۇش شەھىرى «جۇڭگو ئەنجۈر يۇرتى» بولۇشتەك بايلىق ئەۋزەللىكىگە تايىنىپ، پەن-تېخنىكا كۈچلىرىنى كىرگۈزۈش، كەسىپ زەنجىرى بەرپا قىلىش، مەدەنىيەت-ساياھەت بايلىقىنى يۇغۇرۇش ئارقىلىق، ئەنجۈر كەسپىنى ئەنئەنىۋى تېرىقچىلىقتىن زامانىۋىلاشتۇرۇش، كۆلەملەشتۈرۈش، ماركىلاشتۇرۇش تەرەققىيات يولىغا يۈزلەندۈرۈپ، شۇ جاينىڭ يېزا-كەنتلەرنى گۈللەندۈرۈشتىكى مۇھىم موتورىغا ئايلاندۇردى.
ئاتۇش ئەنجۈر 3-كەسىپ يۇغۇرما پەن-تېخنىكىدا يېڭىلىق يارىتىش باغچىسىنىڭ پارنىكىدا ئۆستۈرۈلگەن «بوجىخۇڭ» سورتلۇق ئەنجۈرى. (9-ئاينىڭ 16-كۈنى تارتىلغان )
2023-يىلى 4-ئايدا، قىزىلسۇ ئوبلاستى سودىگەر چاقىرىپ مەبلەغ جەلپ قىلىش ئارقىلىق خەيدېكۇن شىركىتىنى كىرگۈزدى، بۇ شىركەت كۆپ يىللىق ئەنجۈر ئۈستىدە ئىزدىنىش تەجرىبىسى، نەچچە ئون تۈرلۈك پەن تەتقىقات پاتېنتى ۋە سەرخىل باشقۇرۇش كوللېكتىپىنى ئېلىپ ئاتۇش شەھىرىگە كېلىپ، جۇڭگو دورىگەرلىك داشۆسى، جياڭسۇ يېزا ئىگىلىك پەنلەر ئاكادېمىيەسى، تارىم داشۆ، شىخەنزە داشۆ قاتارلىق مۇتەخەسسىسلەر كوللېكتىپى بىلەن بىرلىشىپ، سورت يېتىشتۈرۈش ۋە ئۆستۈرۈش تېخنىكىسىدا زور بۆسۈش ھاسىل قىلدى. 17 خىل يېڭى سورتنى كىرگۈزدى، ئاساسلىق سورت بولغان «بوجىخۇڭ» سورتى كېسەلگە تاقابىلچانلىقى كۈچلۈك، مەھسۇلات مىقدارى يۇقىرى بولۇشتەك ئالاھىدىلىككە ئىگە بولۇپ، بۇنى تۆت پەسىلنىڭ ھەممىسىدە بازارغا سالغىلى بولىدۇ، يەنە يەرلىك سورت «شىنجاڭ زاۋخۇاڭ»نى قىشتا ئۆستۈرۈش ئاچقۇچلۇق تېخنىكىسىدا بۆسۈش ھاسىل قىلىپ، قىشتا بۇ سورتنىڭ ھۆل مېۋىسى بولماسلىق تارىخىغا خاتىمە بەردى.
9-ئاينىڭ 16-كۈنى، «گۈزەل شىنجاڭغا كىرىش» مەملىكەت بويىچە ئۆلكە دەرىجىلىك تاراتقۇلارنىڭ زىيارەت قىلىش پائالىيىتى زىيارەت ئۆمىكى مۇخبىرلىرى ئاتۇش ئەنجۈر 3-كەسىپ يۇغۇرما پەن-تېخنىكىدا يېڭىلىق يارىتىش باغچىسىدا زىيارەت قىلماقتا.
كەسىپ زەنجىرىنى ئۇزارتىش جەھەتتە، ئاتۇش ئەنجۈر 3-كەسىپ يۇغۇرما پەن-تېخنىكىدا يېڭىلىق يارىتىش باغچىسى «ئۆستۈرۈش — پىششىقلاش — مەدەنىيەت-ساياھەت» يېپىق ھالقىلىق ئېكولوگىيەنى بەرپا قىلىۋاتىدۇ. 1-كەسىپ جەھەتتە، 3000 ئائىلىلىك دېھقاننىڭ ئۆيىنىڭ ئالدى-كەينىدىكى بوشلۇقتىن پايدىلىنىپ ئەنجۈر تېرىشىغا تۈرتكە بولۇپ، دېھقانلارنىڭ كىرىمىنى قوش يول ئارقىلىق ئاشۇردى. ئازغان ئەنجۈر خەلق ئۆرپ-ئادەت مەدەنىيەت-ساياھەت مەنزىرە رايونىدا، ساياھەتچىلەر بۇ يەرنىڭ خاس ئۆرپ-ئادىتىنى ھېس قىلالايدۇ. بۇ مەنزىرە رايونى «يېمەك-ئىچمەك، تۇرالغۇ، قاتناش، ساياھەت، مال سېتىۋېلىش، كۆڭۈل ئېچىش»تىن ئىبارەت پۈتۈن ئامىللىق ئېچىشقا تايىنىپ، يىلىغا 400 مىڭ ئادەم قېتىمدىن ئارتۇق ساياھەتچىنى كۈتۈۋالدى. ئۆرپ-ئادەت كوچىسىدا ھازىر 70تىن ئارتۇق تىجارەتچى بار بولۇپ، كەلگۈسىدە 200گە كېڭەيتىلىپ، 700دىن ئارتۇق كىشىنىڭ ساياھەت تىجارىتىگە قاتنىشىشىغا بىۋاسىتە تۈرتكە بولىدۇ. بۈگۈنكى كۈندە، «ئەنجۈر +»نىڭ يۇغۇرما يولى «شېكەر مانتا»نى خەلقنى بېيىتىپ، كەنتنى گۈللەندۈرىدىغان يېڭى مېۋىگە ئايلاندۇردى.
9-ئاينىڭ 16-كۈنى، ئاتۇش شەھىرى سۇنتاغ بازىرىغا جايلاشقان ئازغان ئەنجۈر خەلق ئۆرپ-ئادەت مەدەنىيەت-ساياھەت مەنزىرە رايونىدىن بىر كۆرۈنۈش.
كېيىنكى قەدەمدە، ئاتۇش شەھىرى ساياھەت ئۇل ئەسلىھەلىرىنى داۋاملىق ياخشىلاپ، «يېزا ئىگىلىكى + مەدەنىيەت + ساياھەت» ئىستېمال يېڭى ئەندىزىسىنى ئېچىپ، يېزا-كەنتلەرنىڭ چوڭقۇر قاتلاملىق قىممىتىنى چوڭقۇر قېزىپ، يېزا ئىگىلىك كەسىپلىرىنى ئەنئەنىۋى كەسىپلەر چېگراسىدىن ھالقىتىپ، يېزا-كەنتلەرنىڭ ئەسلىي ھالىتى ئاساسىدا يېڭىلىق يارىتىدۇ. ئەنجۈرنى تۆت پەسىلنىڭ ھەممىسىدە سېتىشنى ئىشقا ئاشۇرىدۇ. «ساياھەت ئارقىلىق يېزا ئىگىلىكىنى گۈللەندۈرۈش، يېزا ئىگىلىكى-مەدەنىيەت-ساياھەت ئۆزئارا مەنپەئەت يەتكۈزۈپ تەڭ نەپ ئېلىش»تىن ئىبارەت يېزا-كەنتلەرنى گۈللەندۈرۈش ئەندىزىسى ئارقىلىق، 1-، 2-، 3-كەسىپنىڭ چوڭقۇر يۇغۇرما تەرەققىياتىنى ئالغا سىلجىتىپ، ئاتۇش شەھىرىنىڭ ئىقتىسادىي تەرەققىياتىدىكى «يېڭى موتور»نى ئوت ئالدۇرۇپ، ھەرقايسى جايلاردىن كەلگەن ساياھەتچىلەرنىڭ تيەنمېن مەنزىرىسىنى تاماشا قىلىش، خاس مەززىلىك تائاملارغا ئېغىز تېگىش، پامىردا بەھۇزۇر ساياھەت قىلىشىغا ئازادە ساياھەت مۇھىتى يارىتىپ بېرىدۇ.
