مەنبە: تىيانشان تورى-شىنجاڭ گېزىتى ئىجادىيىتى
تىيانشان تورى-شىنجاڭ گېزىتى مۇخبىرىمىز ۋاڭ شىنخۇڭ، ئىختىيارىي مۇخبىرىمىز جاڭ ۋېيمىن
چاي دەملەش، سۈت قۇيۇش، تۇز سېلىش ... 8-ئاينىڭ 16-كۈنى ئەتىگەندىلا، بازارگۈل لەخەن ئۆزىنىڭ ئائىلىۋى مېھمانخانىسىدا مېھمانلارغا ئەتكەنچاي دەملەش بىلەن ئالدىراش بولۇپ كەتتى، ئۇزاق ئۆتمەي، ئۆي ئىچى قويۇق ئەتكەنچاينىڭ مەززىلىك ھىدى بىلەن تولدى.
بازارگۈل نىلقا ناھىيەسى نىلقا بازىرى دوربۇجىن كەنتىنىڭ ئاھالىسى، شۇنداقلا «بازارگۈل ئەتكەنچايخانىسى»نىڭ ئىگىسى. بۇلتۇر 3-ئايدا ئۇنىڭ ئەتكەنچايخانىسى تىجارەت باشلىدى، نارىن، سۇدا پىشۇرۇلغان قوي گۆشى، كاۋاپ قاتارلىق خاس تائاملار ھەمدە قىزغىن، ئەتراپلىق توي زىياپىتى مۇلازىمىتى بىلەن تىجارىتى كۈندىن-كۈنگە روناق تاپتى.

نىلقا ناھىيەسى نىلقا بازىرى دوربۇجىن كەنتىدىكى ئائىلىۋى مېھمانخانىدا ئورۇنلىنىۋاتقان ناخشا-ئۇسسۇل نومۇرلىرى. جاڭ ۋېيمىن فوتوسى
2022-يىلى قىشتا، دوربۇجىن كەنتى پارتىيە ياچېيكىسى بىلەن نىلقا ناھىيەلىك پارتىيە كومىتېتى تەشكىلات بۆلۈمىنىڭ كەنتتە تۇرۇشلۇق خىزمەت ئەترىتىنىڭ بىر قېتىملىق ئائىلە زىيارىتى ئۇنىڭ تۇرمۇشىنى ئۆزگەرتتى.
«ئۆيىڭىز يول بويىدا ئىكەن، يەنە 30 قويىڭىزمۇ بار ئىكەن، ھويلىنى ئۆزگەرتىپ، ئەتكەنچايخانا ئاچسىڭىز، ساياھەتچىلەر كەلسە ھەم ئەتكەنچاي ئىچەلەيدۇ، ھەم ياتاقتا يېتىپ تاماق يېيەلەيدۇ، يامان ئەمەس كىرىم قىلالايسىز.» بازارگۈلنىڭ ئۆيىدىكى كاڭدا ئولتۇرۇپ، خىزمەت ئەترىتىنىڭ كادىرلىرى تەكلىپ بەردى.
«مەن پەقەت قۇرۇت ياساشنىلا بىلىمەن، سودا قىلىشنى بىلمەيمەن» دېدى بازارگۈل. ئۇنىڭ جاۋابىنى ئاڭلىغاندىن كېيىن، خىزمەت ئەترىتىدىكى كادىرلار ئۇنى زورلىمىدى، لېكىن ۋاز كەچمىدى. ئۇلار كەنتتە چوڭقۇر تەكشۈرۈپ تەتقىق قىلغاندىن كېيىن، يەنە بىر قېتىم ئۇنىڭ ئۆيىگە بېرىپ، ئۇنى ساياھەتچىلىك بىلەن شۇغۇللىنىشقا ئىلھاملاندۇردى.
2024-يىلى ئەتىيازدا، بازارگۈلنىڭ ماقۇللۇقىنى ئالغاندىن كېيىن، خىزمەت ئەترىتىنىڭ كادىرلىرى ئاۋۋال ئۇنى نىلقا ناھىيەلىك تېخنىك ئىشچىلار مەكتىپىگە بېرىپ تاماق ئېتىشنى ئۆگىنىشكە تونۇشتۇردى، يەنە لايىھىلىگۈچىلەرنى ئۇنىڭ ئۆيىگە بېرىپ ئۆينى ئائىلىۋى مېھمانخانا قىلىپ ئۆزگەرتىشكە تەكلىپ قىلدى —— ئەسلىدىكى كېرەكسىز نەرسىلەر دۆۋىلىنىپ كەتكەن بۇلۇڭ-پۇچقاقلارغا ئۈزۈم بارىڭى ياسالدى، ئاشخانىنىڭ تېمىغا قىزىنىڭ كىگىز كەشتە ئەسىرى ئېسىلدى.
ئەتكەنچايخانا تىجارەت باشلىغان تۇنجى ئايدىلا 20 مىڭ يۈەندىن ئارتۇق پۇل تاپتى. بازارگۈل خۇشاللىقىدىن قىن-قىنىغا پاتماي قالدى، ئەتكەنچاي ئەتكەندە تېخىمۇ بەكرەك كۆڭۈل قويدى. بۇلتۇر ئۇنىڭ ئائىلىسىنىڭ ساپ كىرىمى 200 مىڭ يۈەندىن ئاشتى.
بازارگۈل ئەتكەنچايخانىسى. جاڭ ۋېيمىن فوتوسى
«بازارگۈل ئەتكەنچايخانىسى»نىڭ ئاۋاتلىشىپ كېتىشى كەنت ئاھالىلىرىنىڭ ئىگىلىك تىكلەش قىزغىنلىقىنى ئۇرغۇتتى. دوربۇجىن كەنتى «ئىككى كومىتېت»ى ۋە خىزمەت ئەترىتى تۆمۈرنى قىزىقىدا سوقۇپ، «ھەرە كۆنىكىدىكى شېرىن پاراڭلار شېرىن كىچىك بازار» باش تېما قىلىنغان خاس خەلق ئۆرپ-ئادەت كوچىسى بەرپا قىلىش تەرەققىيات يۆنىلىشىنى بېكىتىپ، كەنتتىكى شارائىتى ھازىرلانغان دېھقانلارنىڭ دېھقانلار ئارامگاھىنى تەرەققىي قىلدۇرۇشىغا پۈتۈن كۈچى بىلەن ياردەم بەردى.
ناھايىتى تېزلا، كەنتتىكى كونا جۇۋازخانا «دودو . شىگۇاڭلى» مەززىلىك تائاملار مەيدانىغا ئايلاندى. ئۆمۈربويى نان يېقىپ كەلگەن توختى روزى بۇ يەرگە تونۇر سالدى، ئۇ ياققان ياڭاق نان ساياھەتچىلەرنىڭ چوقۇم ئېلىۋالىدىغان ھەمراھى بولۇپ قالدى. باچكا كاۋىپى، لازىجى، سالمون بېلىقى، ئۆي لەڭمىنى ... 20 نەچچە يايما ئورنىنىڭ ھەرقايسىسىنىڭ ئۆز ئالدىغا ئالاھىدە تامىقى بار بولۇپ، ئەتراپنى ئوخشاش بولمىغان تاماقلارنىڭ مەززىلىك ھىدى بىر ئالدى.
تېخىمۇ تەرىپلەشكە ئەرزىيدىغىنى شۇكى، كەنت مەدەنىيەتنى مەززىلىك تائاملار مەيدانىغا سىڭىشتۈردى. ھەپتە ئاخىرىدىكى يېزا-كەنت مۇزىكا كېچىلىكىدە، ئات باشلىق غېجەك بىلەن گىتار بىرلىكتە ئىناق ئاھاڭنى ئورۇنلىدى؛ كۆڭۈل ئىزھار قىلىش ھەپتىلىكىدە، ياشلار يۈز يىللىق قارىياغاچ ئاستىغا مۇھەببەت سۆزلىرى يېزىلغان ياغاچ تاختىنى ئېسىپ قويدى؛ ھەسەل ساتىدىغان يايما ئورنى ئالدىدىمۇ «ھەسەل ھەرىسى ئۇسسۇل ئويناش ئارقىلىق ئۇچۇر يەتكۈزىدۇ» دېگەن ھېكايە سۆزلەندى.
بۇلتۇر كۈزدە، «دودو كەنتى» ئىستىراھەت بازىرى تۈرىدە ئىش باشلاندى. ساياھەتچىلەر يىغىلىش-تارقىلىش مەركىزىنىڭ يېنىدا، خەلق ئۆرپ-ئادىتى رايونىدىكى كىگىز ئۆيلەردە قازاق كەشتىچىلىكىنى ھېس قىلغىلى بولىدۇ، كۆڭۈل ئېچىش رايونىدىكى ئېرىق بويىدا دائىم بېلىق تۇتىدىغان بالىلار بار، دالىدا قونۇش رايونىدا كېچە ئاسمىنىنى قاپلىغان يۇلتۇزلارنى تاماشا قىلغىلى بولىدۇ. كەنت ئاھالىسى رىزۋانگۈل ئەمەت بۇ يەردە مۇلازىمەتچى بولۇپ، ھەر ئايدا 3600 يۈەن كىرىم قىلالايدۇ. «ئىلگىرى ناھىيە بازىرىدا ئىشلەمچىلىك قىلاتتىم، ھازىر پىيادە ئون مىنۇتتىلا ئىش ئورنۇمغا بارىمەن، يەنە ئۆيدىكىلەرنىڭ ھالىدىن خەۋەر ئالالايمەن» دېدى رىزۋانگۈل.
بۈگۈنكى دوربۇجىن كەنتىنىڭ تەرەققىياتى بارغانسېرى ياخشى بولماقتا. 60 نەچچە ئائىلىۋى مېھمانخانا، دېھقانلار ئارامگاھى يامغۇردىن كېيىنكى بامبۇك نوتىلىرىدەك بارلىققا كەلدى، 130دىن كۆپ كەنت ئاھالىسى يايما ئىگىسى، شوپۇر، قەھۋە ئۇستىسىغا ئايلاندى، كىشى بېشىغا توغرا كېلىدىغان كۈندىلىك ئوتتۇرىچە كىرىم 400 يۈەن بولدى. كەنتتىكى ھەسەللەر ئىلگىرى كىلولاپ سېتىلاتتى، ھازىر كىچىك قۇتىلارغا چىرايلىق قاچىلىنىپ سوۋغاتلىقلارغا ئايلاندى، باھاسى بىر ھەسسە قاتلاندى، تەمىنلەش ئېھتىياجنى قاندۇرالمىدى.
«بۇ يىل 1-ئايدىن 8-ئايغىچە، كەنتىمىز نەچچە ئون مىڭ ئادەم قېتىم ساياھەتچىنى كۈتۈۋالدى، تەتقىقات-ئۆگىنىش كوللېكتىپىدىنلا 30 نەچچىسى كەلدى» نىلقا بازىرى دوربۇجىن كەنتى پارتىيە ياچېيكىسىنىڭ شۇجىسى جاڭ جيەنيۆ شۇنداق دېدى: كەنتىمىز «شېرىن سەپەر» تۈرىنى پىلانلاۋاتىدۇ، بۇنىڭدا ساياھەتچىلەر ھەسەل ھەرىسىگە ئەگىشىپ گۈل دېڭىزىنى كۆرىدۇ، يەنە خەلق ئۆرپ-ئادىتى مەدەنىيەت كوچىسى قۇرۇشنى ئويلاۋاتىمىز، ساياھەتچىلەر كەلسە كەتكۈسى كەلمەيدۇ.






