ئانار بۇلۇت\شىنجاڭ گېزىتى خەۋىرى ( مۇخبىر ليۇ يى خەۋەر قىلىدۇ) 8-ئاينىڭ 6-كۈنى، 2025-يىللىق شىنجاڭ ئاقىل يېزا ئىگىلىكى كۆرگەزمىسى شىنجاڭ يېزا ئىگىلىك كۆرگەزمە باغچىسىدا باشلاندى. دۆلەت ئىچىدىكى يېزا ئىگىلىكىگە ئالاقىدار 300گە يېقىن كارخانا كۆرگەزمىگە قاتنىشىپ، سورت يېتىشتۈرۈش، جابدۇق تەتقىق قىلىپ ئېچىش قاتارلىق ساھەلەردىكى پەن-تېخنىكىدا يېڭىلىق يارىتىش نەتىجىلىرىنى مەركەزلىك نامايان قىلدى ھەمدە كەسىپ تەرەققىياتى، پەن-تېخنىكىدا يېڭىلىق يارىتىش بايلىقىنى بىرىكتۈرۈش قاتارلىق ساھەلەردە چوڭقۇر ئۇدۇللىشىش، ئالماشتۇرۇش ئېلىپ بېرىپ، ھەمكارلىق يېڭى پۇرسىتى ئۈستىدە ئىزدەندى.
تونۇشتۇرۇلۇشىچە، بۇ قېتىمقى كۆرگەزمە «پەن-تېخنىكا ئارقىلىق يېزا ئىگىلىكىنى گۈللەندۈرۈشكە كۈچ قوشۇش، ھەمكارلىشىپ ئورتاق بەھىرلىنىش، يېڭى ۋەزىيەت يارىتىش»نى باش تېما قىلغان بولۇپ، زال ئىچى-سىرتى كۆرگەزمە كۆلىمى 30 مىڭ كىۋادرات مېتىرغا يېقىنلاشقان، كۆرگەزمىگە قاتناشقان كارخانىلار ئۇرۇق، يېزا ئىگىلىك ماددىي ئەشيالىرى، ماشىنا-جابدۇق قاتارلىق يېزا ئىگىلىك ئىشلەپچىقىرىشىنىڭ پۈتۈن زەنجىرىنى قاپلىغان.
تونۇشتۇرۇلۇشىچە، بۇ قېتىمقى كۆرگەزمە 8-ئاينىڭ 8-كۈنىگىچە داۋاملىشىدىكەن. باشلىنىش مۇراسىمى ئۆتكۈزۈلگەن كۈنى، مەسئۇل بولۇپ ئۆتكۈزگەن تەرەپ بىرلا ۋاقىتتا مەھسۇلات تونۇشتۇرۇش ۋە مەركەزلىك كېلىشىم ئىمزالاش پائالىيىتى ئۆتكۈزۈپ، كۆرگەزمىگە قاتناشقان كارخانىلارنى تېخىمۇ كۆپ ئالماشتۇرۇش، كېڭىشىش پۇرسىتىغا ئىگە قىلىپ، كۆرگەزمە ئۆتكۈزۈش ئۈنۈمىنى ئۆستۈرۈشنى مەقسەت قىلغان.
«ئانار بۇلۇت»تىن ئېلىپ تەرجىمە قىلىندى
