مۇخبىرنىڭ جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتىدىن ئىگىلىشىچە، 7-ئاينىڭ 1-كۈنى سائەت 19دىن 30 مىنۇت ئۆتكەندە، قەشقەردىن چۇڭچىڭ غەربىگە قاتنايدىغان K4532 قېتىملىق يولۇچىلار پويىزىنىڭ قەشقەر ۋوگزالىدىن يولغا چىقىشىغا ئەگىشىپ، بۇ يولۇچىلار پويىزى شىنجاڭدىكى گولمۇد-كورلا تۆمۈريولى ئارقىلىق شىنجاڭغا كىرىدىغان-چىقىدىغان تۇنجى يولۇچىلار پويىزىغا ئايلانغان، جەنۇبىي شىنجاڭدىكى ئاممىنىڭ سىچۇەن-چۇڭچىڭ يۆنىلىشىگە بېرىشى تېخىمۇ قولاي بولغان.
قەشقەردىن چۇڭچىڭ غەربىگە قاتنايدىغان K4532 قېتىملىق يولۇچىلار پويىزى تۇنجى قېتىم قاتنىدى.
ۋاڭ شياۋجيې فوتوسى
بۇنىڭدىن ئىلگىرى، جەنۇبىي شىنجاڭدا پويىزغا ئولتۇرۇپ سىچۇەن-چۇڭچىڭ رايونىغا بېرىش ئۈچۈن، جەنۇبىي شىنجاڭ تۆمۈر يولى ئارقىلىق تۇرپان شىمالىي ۋوگزالىنى ئايلىنىپ مېڭىپ، ئاندىن لەنجوۋ-شىنجاڭ تۆمۈر يولى ئارقىلىق شىنجاڭدىن چىقىشقا توغرا كېلەتتى. 7-ئاينىڭ 1-كۈنى قاتنىغان K4532 قېتىملىق يولۇچىلار پويىزى قەشقەر ۋوگزالىدىن يولغا چىقىپ، ئايلىنىپ ماڭماستىن، جەنۇبىي شىنجاڭ تۆمۈريولى، گولمۇد-كورلا تۆمۈريولى، چىڭخەي-شىزاڭ تۆمۈريولى، لەنجوۋ-چىڭخەي تۆمۈريولى، لەنجوۋ-چۇڭچىڭ تۆمۈريولىنى بېسىپ ئۆتۈپ، يول بويى ئاقسۇ، كۇچا، كورلا، چاقىلىق، مىرەن، ماڭيا، گولمۇد، دېلىڭخا، شىنىڭ، لەنجوۋ، خاداپۇ، لۇڭنەن، گۇاڭيۇەن، خېچۇەن قاتارلىق مۇھىم ۋوگزال-بېكەتلەردە توختاپ، ئەڭ ئاخىرىدا چۇڭچىڭ شەھىرىگە يېتىپ بارىدۇ، بۇ، لىنىيە بويىدىكى ئاممىنىڭ سەپەرگە چىقىشىنى زور دەرىجىدە قولايلاشتۇردى.
«تىيانشان تورى»دىن ئېلىپ تەرجىمە قىلىندى
