ئانار بۇلۇت\شىنجاڭ گېزىتى خەۋىرى 1-ئاينىڭ 8-كۈنى، ئاپتونوم رايونلۇق خەلق ھۆكۈمىتىنىڭ تور بېكىتىگە ئاساسلانغاندا، يېقىندا، ئاپتونوم رايونلۇق خەلق ھۆكۈمىتى بەنگۇڭتىڭى «ئاپتونوم رايوننىڭ قار-مۇز تەنھەرىكىتىنىڭ يۇقىرى سۈپەتلىك تەرەققىياتى ئارقىلىق قار-مۇز ئىقتىسادىنىڭ ھاياتىي كۈچىنى ئۇرغۇتۇش توغرىسىدىكى يولغا قويۇش لايىھەسى»نى بېسىپ تارقاتقان.
«لايىھە»دە مۇنداق ئوتتۇرىغا قويۇلدى: ئاممىۋى قار-مۇز پائالىيىتى كەڭ قانات يايدۇرۇلىدۇ. ئاممىۋى قار-مۇز پەسلى، ئاممىۋى قار تېيىلىش، مۇز تېيىلىش ئۆلچىمىگە يېتىش سىنىقى قاتارلىق پائالىيەتلەر سىجىل قانات يايدۇرۇلىدۇ. ھەرقايسى جايلارنىڭ خاسلىقى گەۋدىلەندۈرۈلۈپ، قار-مۇز مارافونى، قارلىق دالا پۇتبولى، قارلىق دالا ئات بەيگىسى، مۇز ئۈستى يەلكەنلىك كېمىسى، قار-مۇز كاتتا مەرىكىسى قاتارلىق قار-مۇز ئىستىراھەت مۇسابىقە پائالىيەتلىرى قانات يايدۇرۇلۇپ، ئاممىۋى قار-مۇز مۇسابىقىسى داڭلىق ماركىسى يارىتىلىدۇ. «مۇسابىقە پائالىيەتلىرىگە ئەگىشىپ ساياھەت قىلىش» پائالىيىتى سىجىل قانات يايدۇرۇلۇپ، قار-مۇز مۇسابىقىلىرىنى مەنزىرە رايونلىرىغا، كوچا رايونىغا، سودا چەمبىرىكىگە كىرگۈزۈشكە تۈرتكە بولۇنىدۇ. ھەر يىلى قانات يايدۇرۇلىدىغان تۈرلۈك ئاممىۋى خاراكتېرلىك قار-مۇز مۇسابىقە پائالىيىتى 200 تۈردىن كەم بولمايدۇ.
