تاماكا خۇمارى تۇتقاندا، ئىمكانقەدەر كەينىگە كېچىكتۈرۈپ چېكىش، شۇنداقلا چوڭقۇر نەپەس ئېلىش، مەسىلەن، ئۈچ قېتىم، بەش قېتىم، 10 قېتىم چوڭقۇر نەپەس ئېلىش كېرەك. بۇ جەرياندا ئۆزىنى ئەركىن قويۇۋەتكەندە، تاماكا خۇمارى بېسىلىپ قېلىشى مۇمكىن. ياكى تاماكا چېكىشنىڭ ئورنىغا بىر ئىستاكان چاي، ئازراق سۇ قويۇپ ئىچىپ سىناپ بېقىش كېرەك.
تاماكا خۇمارى تۇتقاندا، ئەڭ مۇھىمى دىققەتنى چېچىش، ئامال قىلىپ بىرەر ئىش تېپىپ قىلىش. مەسىلەن، دوستلار بىلەن پاراڭلىشىش، سىرتقا چىقىپ سەيلە قىلىش ياكى چېنىقىش، بۇنداق بولغاندا تاماكا خۇمارىدىن يىراق تۇرغىلى بولۇشى مۇمكىن. ئۇزاق مۇددەت تاماكا چەككەن دوستلارنىڭ دائىم قولىدىن، ئاغزىدىن تاماكا چۈشمەيدۇ، بۇ چاغدا بىرەر ئىش بىلەن دىققەتنى چاچسا ياخشى. مەسىلەن، ھۆسىن خەت يېزىش، رەسىم سىزىش، چىش كولىغۇچ چىشلىۋېلىش ياكى سېغىز چايناش دېگەندەك، بۇلارنىڭ ھەممىسى قول، ئېغىز ئادىتىنى ئۈنۈملۈك يېنىكلىتىدىغان ئۇسۇللاردۇر. يەنە مۇزىكا ئاڭلىسىمۇ بولىدۇ، جۇشقۇن مۇزىكا ئادەمدىكى پاسسىپ خىيال ۋە كەيپىياتنى يوقىتىدۇ. نۇرغۇن تاماكا چەككۈچىلەر بېسىمغا ئۇچرىغاندا تاماكا چەككۈسى كېلىدىغانلىقىنى ئېيتقان. ئەمەلىيەتتە، تاماكا چېكىپ بېسىمنى يېنىكلەتكىلى بولمايدۇ، شۇڭا ساغلام ئۇسۇلدا بېسىمغا تاقابىل تۇرۇش تېخىمۇ ياخشى تاللاش ھېسابلىنىدۇ.
ھەر قانداق ياشتىكىلەر تاماكا تاشلىغاندا پايدىغا ئېرىشەلەيدۇ. تاماكا تاشلاپ 20 مىنۇتتىن كېيىن، قان بېسىمى، يۈرەك رىتىمىدا ئۆزگىرىش بولىدۇ؛ تاماكا تاشلاپ بىر يىلدىن كېيىن، يۈرەك كېسىلىگە گىرىپتار بولۇش خەۋپى ئەسلىدىكى تاماكا چەككەن ۋاقىتتىكىدىن يېرىم ھەسسە تۆۋەنلەيدۇ؛ تەخمىنەن تاماكا تاشلاپ 15 يىلدىن كېيىن، ئەسلىدىكى تاماكا چەكمىگەن ھالەتكە قايتىدۇ. 40 ياشتا تاماكا تاشلىغىلى بولسا، تاماكا چېكىش سەۋەبىدىن پەيدا بولغان كېسەللىك، مېيىپلىك ۋە ئۆلۈم خەۋپىنى %90 يېنىكلەتكىلى بولىدۇ. ئەگەر 30 ياشقا كىرگىچە تاماكا تاشلىغاندا، تاماكا چېكىش سەۋەبىدىن پەيدا بولىدىغان مۇناسىۋەتلىك كېسەللىك، مېيىپلىك ۋە ئۆلۈم خەۋپىنى %97 يېنىكلەتكىلى بولىدۇ. شۇڭا، تاماكىنى قانچە بالدۇر تاشلىسا شۇنچە ياخشى. نۇر گېزىتىدىن تەرجىمە قىلىندى