شىنخۇا تورى خەۋىرى: «گۈل-گىياھ ماكانى» بولغان جياڭسۇ شۇياڭ ناھىيەسىدە، شىنجاڭ پەيزاۋات ناھىيەسىدىن كەلگەن مىرزات ئۆمەر ۋە ئايالى زۆرەم تۇرسۇننىڭ «يىلتىز تارتىپ ئىلىم ئالغان»ىغا بىر يىلدىن ئاشتى، ئۇلار جاشيا بازىرىدا 20 مودىن ئارتۇق يەرنى ئوبوروت قىلىپ، ئەتىرگۈل تىكىپ، زامانىۋى يېزا ئىگىلىك تېخنىكىسىنى ئۆگەندى.
بۇ يىل 44 ياشقا كىرگەن مىرزات ئۇزۇن يىللىق گۈل سودىگىرى بولۇپ، 22 يېشىدىلا يۇرتىدا گۈل دۇكىنى ئاچقان، جەنۇبتىكى گۇاڭجوۋغا بېرىپ نۇرغۇن يىل گۈل-گىياھ توپ تارقىتىش سودىسىنى قىلغان. ئالتە يىل ئىلگىرى ئۇ داڭقىنى ئاڭلاپ شۇياڭغا مال كىرگۈزگىلى كېلىپ، شۇنىڭدىن كېيىن بۇ تۇپراق بىلەن ئۈزۈلمەس رىشتە باغلىدى.
«شۇ نەچچە يىلدا، مەن ھەر يىلى ئەتىياز، كۈز ئىككى پەسىلدە بۇ يەرگە كېلىپ مال كىرگۈزدۈم، ھەر قېتىمدا يېرىم ئايچە تۇردۇم.» شۇياڭنىڭ گۈل-گىياھ ئۆستۈرۈش ئىلغار تېخنىكىسى مىرزاتنى جەلپ قىلدى، ئۇ، بۇ يەردە قېلىشنى قارار قىلدى. يۇرتتىكى نۇرغۇن كىشىلەر ئەتىرگۈل تېرىش ئارقىلىق بېيىشنى ئويلايدىغان بولۇپ، بۇ يەرنىڭ تېخنىكىسىغا موھتاج ئىدى. 2019-يىلىنىڭ بېشىدا، يەرلىك ھۆكۈمەتنىڭ ياردىمى ۋە قوللىشى بىلەن، مىرزات شۇ جايدىكى شېرىكى بىلەن يېڭى ئىشىنى باشلىدى.
تېخنىكا-پەرۋىش قىلىشنى ئۆگىنىش، ئەتىرگۈل بېغىنى باشقۇرۇش، توردا بىۋاسىتە كۆرسىتىپ «مال سېتىش»..... مىرزات ئەر-خوتۇننىڭ ھەر بىر كۈنى ئالدىراشلىقتا ئۆتتى، سودىسىمۇ خېلى ياخشىلاندى. ئۇلار جاشيا بازىرىنىڭ ئەتىرگۈل مايسىسىنى شىنجاڭنىڭ ھەرقايسى جايلىرىغا ساتتى، شۇنداقلا تېخنىكىنى بىۋاسىتە كۆرسىتىش سۇپىسى، ئاممىۋى سۇپا ئارقىلىق يۇرتداشلارغا ئۆگەتتى. «بىر كىشىنىڭ بېيىشى باي بولغانلىق ھېسابلانمايدۇ، كۆپچىلىك بېيىسا ھەقىقىي باي بولغانلىق بولىدۇ.» بىر قىسىم يۇرتداشلار ھەتتا جاشيا بازىرىغا كېلىپ، مىرزاتقا ئەگىشىپ ئەتىرگۈل تېرىشنى ئۆگەندى. مىرزات مۇنداق تونۇشتۇردى، ئۇ ئالدى-كەينى بولۇپ شىنجاڭدىكى 500دىن ئارتۇق دېھقاننى ئەتىرگۈل تېرىشقا يېتەكلىدى، بۇنىڭ ئىچىدە 100دىن ئارتۇق نامرات ئاھالە بار بولۇپ، بەزىلىرى نامراتلىقتىن قۇتۇلدى. مىرزات تېخنىكا ئۆگەنگىلى كەلگەن نامرات ئاھالىلەرنىڭ بېرىپ-كېلىش كىرا ھەققىنى كۆتۈردى، ياتاق ۋە تاماقنى كۆتۈرگەندىن سىرت يەنە تۇرمۇش پۇلى بەردى. ئۆگىنىپ بولغاندىن كېيىن بۇ يەردە قالسىمۇ، شىنجاڭغا قايتسىمۇ، يەنە گۈل مايسىسى ۋە مەبلەغ قاتارلىق ياردەم بىلەن تەمىنلىدى.
«مېنىڭ يۇرتۇم <بىر بەلباغ بىر يول>دا، ئىشلىرىمىزنىڭ بارغانسېرى زورىيىپ روناق تېپىشىنى، كەلگۈسىدە ئەتىرگۈللەرنى ياۋروپاغا سېتىشنى ئۈمىد قىلىمەن» دېدى مىرزات كەلگۈسىگە ئىشەنچ باغلىغان ھالدا.
شىنخۇا ئاگېنتلىقى مۇخبىرى جى چۇنپىڭ فوتوسى
