شىنخۇا ئاگېنتلىقى، بېيجىڭ، 1 - ئاينىڭ 27 - كۈنى تېلېگراممىسى گوۋۇيۈەن بەنگۇڭتىڭىنىڭ 2020 - يىللىق چاغانلىق دەم ئېلىش ۋاقتىنى ئۇزارتىش توغرىسىدىكى ئۇقتۇرۇشى، تولۇق تېكىستى تۆۋەندىكىچە:
ھەرقايسى ئۆلكە، ئاپتونوم رايون، بىۋاسىتە قاراشلىق شەھەرلىك خەلق ھۆكۈمەتلىرى، گوۋۇيۈەننىڭ ھەرقايسى مىنىستىرلىق، كومىتېتلىرى، ھەرقايسى بىۋاسىتە قاراشلىق ئاپپاراتلار:
گوۋۇيۈەننىڭ تەستىقلىشى بىلەن، يېڭى تىپتىكى تاجسىمان ۋىرۇس بىلەن يۇقۇملانغان ئۆپكە ياللۇغى يۇقۇمىنىڭ ئالدىنى ئېلىش - تىزگىنلەش خىزمىتىنى كۈچەيتىپ، كىشىلەرنىڭ توپلىنىشىنى ئۈنۈملۈك ئازايتىپ، يۇقۇمنىڭ تارقىلىشىنى توسۇپ، خەلق ئاممىسىنىڭ ھاياتىي بىخەتەرلىكى ۋە تەن ساغلاملىقىغا تېخىمۇ ياخشى كاپالەتلىك قىلىش ئۈچۈن، ھازىر 2020 - يىللىق چاغانلىق دەم ئېلىش ۋاقتىنى ئۇزارتىش توغرىسىدىكى كونكرېت ئورۇنلاشتۇرۇش تۆۋەندىكىچە ئۇقتۇرۇش قىلىندى.
1. 2020 - يىللىق چاغانلىق دەم ئېلىش ۋاقتى 2 - ئاينىڭ 2 - كۈنى(دېھقانلار كالېندارى بويىچە 1 - ئاينىڭ 9 - كۈنى، يەكشەنبە)گىچە ئۇزارتىلىدۇ، 2 - ئاينىڭ 3 - كۈنى(دۈشەنبە)دىن باشلاپ نورمال ئىشقا چىقىلىدۇ.
2. ھەرقايسى جايلاردىكى ئالىي مەكتەپ، تېخنىكوملار، ئوتتۇرا - باشلانغۇچ مەكتەپلەر، يەسلىلەر ئوقۇش باشلاشنى كېچىكتۈرىدۇ، كونكرېت ۋاقتىنى مائارىپ تارماقلىرى ئايرىم ئۇقتۇرۇش قىلىدۇ.
3. يۇقۇمنىڭ ئالدىنى ئېلىش - تىزگىنلەش سەۋەبلىك دەم ئالالمىغان ئىشچى - خىزمەتچىلەر «جۇڭخۇا خەلق جۇمھۇرىيىتىنىڭ ئەمگەك قانۇنى»دىكى بەلگىلىمە بويىچە تولۇقلاپ دەم ئېلىشقا ئورۇنلاشتۇرۇلىدۇ، دەم ئالمىغان ۋاقىتتىكى مائاشى، ئىش ھەققى ئالاقىدار سىياسەت بويىچە كاپالەتلەندۈرۈلۈشى، ئەمەلىيلەشتۈرۈلۈشى كېرەك.
گوۋۇيۈەن بەنگۇڭتىڭى
2020 - يىلى 1 - ئاينىڭ 26 - كۈنى