تىيانشان تورى خەۋىرى (ئىختىيارىي مۇخبىرلىرىمىز رىزۋانگۈل، گاۋ شىياۋيىڭ خەۋىرى، فوتوسى) «بۇ ماشىنىنىڭ ئىگىلەيدىغان ئورنى كىچىك، ئېنېرگىيە سەرپىياتى تۆۋەن، يۆتكەش قولايلىق، ئىشلىتىش ئاسان، ۋاقىت ھەم كۈچىمىزنى تېجەشكە ياردەم بېرىش بىلەن بىر ۋاقىتتا، ئەمگەك سىجىللىقىنى زور دەرىجىدە تۆۋەنلىتىپ، خىزمەت ئۈنۈمىنى ئاشۇردى.» 11- ئاينىڭ 1- كۈنى، شىنجاڭ بايىنغولىن موڭغۇل ئاپتونوم ئوبلاستلىق مالىيە ئىدارىسىنىڭ چەرچەن ناھىيەسى يېڭىئۆستەڭ يېزىسى ئاۋات كەنتىدە تۇرۇشلۇق 1-شۇجىسى، خىزمەت ئەترىتىنىڭ باشلىقى شيەن چۇڭۋېن بىر تەرەپتىن كەنت ئاھالىلىرىگە شامال بېرىش ماشىنىسىنىڭ ئارتۇقچىلىقلىرىنى چۈشەندۈرگەچ، يەنە بىر تەرەپتىن ماشىنىنى تەڭشەپ، نەق مەيداندا مەشغۇلات قىلىپ ئۈلگە كۆرسەتتى.
ھازىر دەل كۈزلۈك يىغىم مەزگىلى، چەرچەن ناھىيەسى ئاۋات كەنتىدىكى 4100 مو ئورگانىك چىلان ئۈزۈش مەزگىلىگە كىردى. كەنت ئاھالىلىرىنىڭ چىلان يىغىش خىزمىتىگە ياردەم بېرىپ، چىلان ئۈزۈش، ئاپتاپقا سېلىش خىزمىتىنى تېزدىن تاماملاپ، قىيىنچىلىقى بار ئاممىنىڭ كۈزلۈك يىغىم مەسىلىسىنى ھەل قىلىش ئۈچۈن، بايىنغولىن ئوبلاستلىق مالىيە ئىدارىسىنىڭ چەرچەن ناھىيەسى يېڭىئۆستەڭ يېزىسى ئاۋات كەنتىدە تۇرۇشلۇق خىزمەت ئەترىتى 17 مىڭ يۈەن ئاجرىتىپ، 7 شامال بېرىش ماشىنىسى ۋە 7 تاسقاش ماشىنىسى سېتىۋېلىپ، كەنتنىڭ كوللېكتىپ مۈلكى سۈپىتىدە كەنت ئاھالىلىرىنىڭ ھەقسىز ئىشلىتىشىگە بەردى.
ماشىنىنىڭ غوڭۇلدىغان ئاۋازىغا ئەگىشىپ، سېۋەت- سېۋەت چىلان ناھايىتى تېزلا تاسقاپ تاللاشتىن ئۆتتى. تاسقاپ تاللانغان پاكىز چىلانلارنى كۆرگەن ئەخمەت روزى خۇشال ھالدا مۇنداق دېدى: «خىزمەت ئەترىتى ئېلىپ كەلگەن بۇ ماشىنىنىڭ سۈرئىتى ناھايىتى تېز ئىكەن، يېرىم كۈندە قىلىدىغان ئىشنى بىر دەمدىلا قىلىپ بولغىلى بولىدىكەن، بىر نەچچە ئەمگەك كۈچىگە باراۋەر كېلىدىكەن.»
كەنت ئاھالىلىرىنىڭ شامال بېرىش ماشىنىسى بىلەن تاسقاش ماشىنىسىنى تېخىمۇ ياخشى ئىشلىتىپ، چىلان ئۈزۈش ئۈنۈمىنى ئاشۇرۇش ئۈچۈن، كەنتتە تۇرۇشلۇق خىزمەت ئەترىتى چىلانلىققا بېرىپ نەق مەيداندا ئوقۇتۇش ئېلىپ بېرىپ، ماشىنىنى ئىشلىتىش ئۇسۇلى، تەڭشەش تېخنىكىسى ۋە بىخەتەرلىك ئىشلىرىنى تەپسىلىي سۆزلەپ چۈشەندۈردى، ئىلغار يېزا ئىگىلىك ماشىنا- سايمانلىرىنى ئۆگىنىش، ئىشلىتىش ئارقىلىق كەنت ئاھالىلىرىنىڭ چىلان يىغىش ئۈنۈمىنى ئۆستۈرۈشىگە ياردەم بېرىپ، چىلان يىغىش خىزمىتىنىڭ ئوڭۇشلۇق ئېلىپ بېرىلىشىغا كاپالەتلىك قىلىپ، كەنت ئاھالىلىرىنىڭ كىرىمنى ئاشۇرۇپ بېيىشىغا ياردەم بەردى.
