يۆ يەنيۈن
10- ئاينىڭ 10- كۈنىدىكى «شىنجاڭ گېزىتى»نىڭ خەۋىرىگە ئاساسلانغاندا، ئۈرۈمچى ناھىيەسى ئالدىن پىلانلاپ، كۈزلۈك ساياھەت تازا قىزىۋاتقان پەيتتە، داغدۇغىلىق ھالدا قار - مۇز ساياھىتى پەسلىنىڭ تەييارلىقىنى باشلىۋەتكەن. قار تېيىلىش يېتەكچىسى تەكلىپ قىلىش، قار - مۇز ساياھىتى پائالىيىتى لايىھەسىنى تۈزۈش، پۇقراۋى تۇرالغۇ تىجارەتچىلىرىنى ماھارەت بويىچە تەربىيەلەشنى يولغا قويۇشنى بىرتۇتاش پىلانلاش... بۇ بىر قاتار ھەرىكەتلەر قار - مۇز ساياھىتى ئۈچۈن قىلىنغان «ئالدىن تەييارلىق».
ھەرقانداق ئىش تەييارلىق پۇختا بولسا ئوڭۇشلۇق بولىدۇ، تەييارلىق پۇختا بولمىسا ئوڭۇشلۇق بولمايدۇ. شىنجاڭ ئەلا سۈپەتلىك، مول قار - مۇز بايلىقىغا ئىگە، لېكىن ھازىر قار - مۇز ساياھىتىنى تەرەققىي قىلدۇرۇشتا يەنىلا بىر قىسىم كەمتۈكلۈك ساقلانماقتا، مەسىلەن، قار - مۇز ساياھىتى مەھسۇلاتلىرى يەككە بولۇش، قاتتىق دېتال ئەسلىھەلىرى مۇكەممەل بولماسلىق، ساياھەتچىلەرگە مۇلازىمەت قىلىش ئىقتىدارى كۈچلۈك بولماسلىق قاتارلىقلار. قار - مۇز ساياھىتى ئۈچۈن «ئالدىن تەييارلىق»نى ياخشى قىلغاندا، تېخىمۇ سالماقلىق بىلەن «ئىچكى ماھارەت»نى تولۇقلاپ، قىش پەسلى يېتىپ كەلگەندە ساياھەتچىلەرنىڭ كۈتكەن يېرىدىن چىققىلى بولىدۇ.
بالدۇر پىلانلاش، ئەتراپلىق تەييارلىق كۆرۈش ئۈرۈمچى ناھىيەسىنىڭ قار - مۇز ساياھىتىگە تۇتقان پوزىتسىيەسى ۋە قار - مۇز ساياھىتىنى ياخشى تەرەققىي قىلدۇرۇش ئىرادىسىنى ئەكس ئەتتۈردى. «سوغۇق بايلىق»نى «ئىسسىق ئىقتىساد»قا ئايلاندۇرۇش مۇشۇنداق پوزىتسىيە ۋە ئىرادىگە ئېھتىياجلىق. شىنجاڭنى ساياھەت ئارقىلىق گۈللەندۈرۈش ئىستراتېگىيەسىنى زور كۈچ بىلەن يولغا قويۇشتا، بۇنداق پوزىتسىيە ۋە ئىرادە تېخىمۇ كەم بولسا بولمايدۇ.
بىز بالدۇر ھەرىكەتلىنىپ، قار - مۇز ساياھىتى ئۈچۈن «ئالدىن تەييارلىق»نى ياخشى قىلىپ، بۇ يىلقى قار - مۇز ساياھىتىنى بۇلتۇرقى ئاۋاتچىلىق ئاساسىدا تېخىمۇ يۇقىرى پەللىگە كۆتۈرەيلى.
(«سۆز ھەممىگە» ئىستونىغا ماقالە ئەۋەتىش پوچتا ساندۇقى: xjrbplb@126.com)
