تىيانشان تورى   ›   خەۋەر مەركىزى   ›   شىنجاڭ

ئايتۇرسۇنخاننىڭ كۈندىلىك خاتىرىسى

شىنجاڭ گېزىتى مۇخبىرلىرى سۈي يۈنيەن، شيې خۇيبيەن

  سەھەردىكى قۇياش نۇرى كەڭ زېمىنغا يېيىلدى، كېرىيە ناھىيەسى شەنبە بازار بازىرى ئاۋات كەنتىنىڭ كەنت ئاھالىسى ئايتۇرسۇنخان سەھەردىلا ئورنىدىن تۇرۇپ ئۆيلىرىنى يىغىشتۇردى ھەم يېڭى ئۆيىنىڭ ئىشىك ئالدىنى پاك - پاكىز تازىلاپ سۈپۈردى. كەچتە، ئايتۇرسۇنخان كۈندىلىك خاتىرىسىگە مۇنداق يازدى: يۇرتۇمدا بارغانسېرى چوڭ ئۆزگىرىشلەر بولۇۋاتىدۇ، تۇرمۇشىمىز بارغانسېرى ياخشىلىنىۋاتىدۇ.

  كېرىيە ناھىيەلىك كەسپىي ماھارەت تەلىم - تەربىيە مەركىزىدە تەربىيەلىنىش ئارقىلىق، ئەسلىي بىرمۇ خەت تونۇمايدىغان بۇ يېزا ئايالى دۆلەت ئورتاق تىل - يېزىقىدا تۇرمۇشىدىكى كىچىك ئىشلارنى خاتىرىلەشنى ئۆگەندى. ئوقۇشنى تاماملىغاندىن كېيىن، 25 ياشقا كىرگەن ئايتۇرسۇنخان ئىشىك ئالدىدىكى كارخانىغا كىرىپ ئىشقا ئورۇنلىشىپ، ئائىلە ئايالىدىن بىر كەسىپ ئىشچىسىغا ئايلاندى.

  ئايتۇرسۇنخان بۇ ئۆزگىرىش ۋە بەختلەرنى دۆلەت ئورتاق تىل - يېزىقىدا ئۆزىنىڭ كۈندىلىك خاتىرىسىگە يېزىپ قالدۇردى.

   «مەكتەپ ۋە ئوقۇتقۇچىلارنى بەكمۇ سېغىندىم»

  2018- يىلىنىڭ ئاخىرى، ئايتۇرسۇنخان تەلىم - تەربىيە مەركىزىدىكى ئوقۇشىنى تاماملىدى. تەلىم - تەربىيە مەركىزىدە ئۆگەنگەن پەيتلەر دائىم ئۇنىڭ خىيالىدىن كەتمەيتتى، ئۇ ئۆزىگە چەكسىز غەمخورلۇق قىلغان ئوقۇتقۇچىلىرىنى ئەسلەيتتى.

  ئوقۇشنى تاماملىغاندىن كېيىن، ئايتۇرسۇنخان بىر ئائىلە كىشىلىرى يېڭى ئۆيگە كۆچۈپ كىردى. يېڭى ئۆيگە كۆچۈپ كىرگەندىن كېيىن ئۆي يىغىشتۇرۇش، قورۇنى تازىلاش بىلەن ئالدىراش بولغاندىن باشقا، يەنە ئايتۇرسۇنخان ئاشخانىدا تۇخۇم ۋە ئۇن بىلەن ھەر خىل پېچىنە - پىرەنىك پىشۇرۇشقا كىرىشىپ كەتتى. مەززىلىك پېچىنە - پىرەنىكلەر پىشقاندىن كېيىن، ئىنچىكىلىك بىلەن بىر - بىرلەپ خالتىغا قاچىلىدى. ئۇ كېرىيە ناھىيەلىك كەسپىي ماھارەت تەلىم - تەربىيە مەركىزىگە بېرىپ، ئوقۇتقۇچىلىرىنى مەخسۇس يوقلىماقچى ئىدى.

  تەلىم - تەربىيە مەركىزىنىڭ ئوقۇتقۇچىلار ئىشخانىسىغا كىرىپ، ئوقۇتقۇچىسى قەمبەرنىساخان تۇرسۇننىيازنى كۆرگەندە، ئىككىيلەن خۇشاللىقىدىن چۇرقىرىشىپ قۇچاقلاشتى، خۇشاللىق ياشلىرى كۆزلىرىدىن سىرغىدى. «تەربىيەلەشكە قاتناشقان مەزگىلدە، ئوقۇتقۇچىلار خۇددى ئۆز بالىسىدىن خەۋەر ئالغاندەك بىزنى ئاسرىدى. بىر قېتىم مەن ئاغرىپ قالغاندا، قەمبەرنىساخان مۇئەللىم ماڭا ئىزچىل ھەمراھ بولۇپ، ئىككى ئاخشام تۈزۈك دەم ئالمىدى» دېدى ئايتۇرسۇنخان.

  ئايتۇرسۇنخاننىڭ كۈندىلىك خاتىرىسى چوڭقۇر ئوقۇتقۇچى - ئوقۇغۇچىلىق مېھىر - مۇھەببىتى ۋە دوستلۇقىنى يېزىش بىلەن توشقانىدى.

  «مەكتەپنىڭ ئۆگىنىش مۇھىتى ئىنتايىن ياخشى، ئاشخانىنىڭ تاماق - سەيلىرىمۇ يېيىشلىك، مەن يەنە سەمرىپ قالدىم.»

  «كەچلىك تەكراردا، ئوقۇتقۇچى ماڭا: سىز ئوقۇشنى تاماملاش ئالدىدا تۇرۇۋاتىسىز، ئۆيگە قايتقاندىن كېيىن ياشانغانلارنى ھۆرمەتلەپ، كىچىكلەرنى ئىززەتلەپ، سەمىمىي، قانۇنغا رىئايە قىلىدىغان، مىللەتلەر ئىتتىپاقلىقىنى قوغدايدىغان ياخشى پۇقرا بولۇڭ! دېدى».

  «ئوقۇشنى تاماملىغىنىمغا بىر ئاي بولدى، مەكتەپنى بەك سېغىندىم، ئوقۇتقۇچىلىرىمنىمۇ بەك سېغىندىم».

  ئايتۇرسۇنخان ئوقۇتقۇچىسى بىلەن ئوقۇشنى تاماملىغاندىن كېيىنكى تۇرمۇشى توغرىسىدا پاراڭلاشتى، ئىككىسى بىر - بىرىنىڭ قولىنى تۇتۇپ قويۇۋەتمىدى. قەمبەرنىساخان خۇشال ھالدا مۇنداق دېدى: «ئۇنىڭ ھازىرقىدەك مۇشۇنداق خۇش پېئىل، مۇشۇنداق خۇشال ئىكەنلىكىنى كۆرۈپ، قىلغان بارلىق ئەجرىمنىڭ بىكار كەتمىگەنلىكىنى ھېس قىلدىم».

   «بىز يېڭى ئۆيگە كۆچۈپ كىردۇق»

  «بۇ بەنچاڭ، بۇ ئاشخانا، بۇ ھاجەتخانا، بۇنىڭدىن كېيىن سۇسىز ھاجەتخانىغا بارمايدىغان بولدۇق.» ئايتۇرسۇنخان مۇخبىرلارنى باشلاپ يېڭى ئۆيىنى ئېكسكۇرسىيە قىلدۇردى. كارىۋاتقا، يەرگە گىلەم سېلىنغان بولۇپ، سۇس ھال رەڭلىك پەردىلەردىن چۈشكەن قۇياش نۇرى كىشىگە يېقىملىق تۇيغۇ بەخش ئېتەتتى.

  كۈندىلىك خاتىرىگە ئايتۇرسۇنخاننىڭ يۈرەك سۆزى خاتىرىلەنگەنىدى: ئوقۇتقۇچى مەندىن قانداق ئارزۇيىڭىز بار دەپ سورىغاندا، مەن تويدىن كېيىن، قېيىنئانام، ئاكام - يەڭگەم ئۈچ ئائىلە كىشىلىرى بىلەن بىللە ئولتۇرۇپ كەلدىم، ئۆزۈمنىڭ ئۆيى بولۇشىنى ئىنتايىن ئۈمىد قىلىمەن دەپ جاۋاب بەردىم. تەلىم - تەربىيە مەركىزىدىكى ئوقۇتقۇچىلار دەرھال ئۇ تۇرۇشلۇق بازارلىق ھۆكۈمەت ۋە كەنتنىڭ 1- شۇجىسىغا ئەھۋالنى ئىنكاس قىلىپ، ئۇنىڭ ئەمىن ئۆي قۇرۇلۇشى كۆرسەتكۈچىنى تېزدىن ئەمەلىيلەشتۈرۈپ بەردى.

  ئايتۇرسۇنخاننىڭ دېيىشىچە، ئەمىن ئۆي سالغاندا ھۆكۈمەتنىڭ تولۇقلىمىسىدىن بەھرىمەن بولغان. «بىز يېڭى ئۆيگە كۆچۈپ كىردۇق، پارتىيە ۋە ھۆكۈمەتنىڭ ياخشى سىياسىتىدىن مىننەتدار بولدۇم، مېنىڭ ئارزۇيۇم ئاخىر ئەمەلگە ئاشتى» دېدى ئۇ.

  بۇ ئائىلىدىكىلەرنى بالدۇرراق يېڭى ئۆيگە كۆچۈرۈش ئۈچۈن، كەنتتە تۇرۇشلۇق كادىرلار بىلەن كەنت كادىرلىرى بىرلىكتە ياردەملىشىپ ھويلا - ئاراننى تەكشىلىدى. ئايتۇرسۇنخاننىڭ دېيىشىچە، ھويلىسى قىزىلگۈل تېرىشكە ئەڭ ماس كېلىدىكەن.

   «مەن بىر گۇرۇپپا باشلىقى»

  تەربىيەلەش مەركىزىدە دۆلەت ئورتاق تىل - يېزىقى ۋە قانۇن ئۆگەنگەندىن كېيىن، ئايتۇرسۇنخاننىڭ قەلب دېرىزىسىدىن بىرسى ئېچىلدى، بىر كىشىلىك خىزمەتكە ئېرىشىشنى ئۈمىد قىلدى، شۇنىڭ بىلەن ئۇ ئاياغ تىكىش ھۈنىرىنى تىرىشىپ ئۆگەندى. ئوقۇشنى تاماملىغاندىن كېيىن، ئايتۇرسۇنخان ئۆيىدىن ئانچە يىراق بولمىغان جايدىكى ئاياغ زاۋۇتىغا بېرىپ ئىشلىدى. ئاياغ زاۋۇتىنى يەرلىكتىكى بىر پۇقراۋى كارخانا ئاچقان بولۇپ، زاۋۇت ئۆيى قوشنا كەنتتىلا ئىدى. ئۇ ھەر كۈنى توكسىكلىت بىلەن ئىشقا بېرىپ - كېلىدىغان بولۇپ، ناھايىتى قولايلىق ئىدى.

  ئاياغ زاۋۇتىدا 50تىن ئارتۇق ئايال خىزمەتچى بار بولۇپ، ھەممىسى يېقىن ئەتراپتىكى كەنت ئاھالىلىرى، يەنە ئايتۇرسۇنخانغا ئوخشاش ئوقۇشنى تاماملىغان تەربىيەلەنگۈچىلەرمۇ بار ئىدى. زاۋۇت ئۆيى ئازادە، يورۇق بولۇپ، يۇقىرى قۇۋۋەتلىك ھاۋا تەڭشىگۈچ ئىزچىل ئوچۇق تۇرغاچقا، خىزمەت مۇھىتى ناھايىتى راھەت ئىدى.

  ئايتۇرسۇنخان پۇتۇڭخۇادا سۆزلىيەلىگەچكە، ماھارەتكە پىششىق بولغاچقا، گۇرۇپپا باشلىقلىقىنى ئۈستىگە ئالدى، ئۇ 30غا يېقىن ئىشچى - خىزمەتچىنى باشقۇرىدۇ. «مېنىڭ ئاساسلىق خىزمىتىم ئىشلەپچىقىرىشقا تەشكىللەش ۋە سۈپەت تەكشۈرۈش» دېدى ئۇ كۈلۈپ تۇرۇپ.

  ئايتۇرسۇنخان كۈندىلىك خاتىرىسىگە مۇنداق بىر جۈملە سۆزنى يازغانىدى: بىزنىڭ گۇرۇپپا ھەر كۈنى 30 جۈپتىن 50 جۈپكىچە ئاياغ ئىشلەپچىقىرالايدۇ، بۇ بىر كۆڭۈللۈك خىزمەت.

  چۈشلۈك دەم ئېلىش ۋاقتىدا، ئايتۇرسۇنخان بىرقانچە خىزمەتدىشى بىلەن بازار ئايلىنىشقا كېلىشتى، ئۇ يېڭى ئۆيىگە بىر يۈرۈش چىرايلىق چىنە - قاچا سېتىۋالماقچى ئىدى. ئۇلار بازارنىڭ ھەممە يېرىنى دېگۈدەك ئايلاندى، ئۇيان تاللاپ، بۇيان تاللاپ، نەرسە - كېرەكلەرنى سېتىۋېلىپ بولغاندىن كېيىن يەنە بىرلىكتە مالاچۈەن يېدى، كۈلكە - چاقچاقلار ئۈزۈلمىدى. «مېنىڭ ھازىر مۇقىم كىرىمىم بار، ئۆزى تاپقان پۇلنى خەجلىگەندىكى تۇيغۇ بەك ياخشى بولىدىكەن!» دېدى ئۇ چىن قەلبىدىن تەسىرلىنىپ.

   «مەنمۇ ئوقۇتقۇچى بولدۇم»

  ئايتۇرسۇنخاننىڭ تۇرمۇشى ئالدىراشلىق ئىچىدە مەنىلىك ئۆتمەكتە، ھەر ھەپتىدە تۆت كۈن كەچتە ئۇ كەنتتىكى كەچلىك كۇرسقا بېرىپ، كەنت ئاھالىلىرىگە دۆلەت ئورتاق تىل - يېزىقى ئۆگىتىدۇ. «كەنت ئاھالىلىرى دەرس تېز ئۆتۈلىدىغان سىنىپ، دەرس ئاستا ئۆتۈلىدىغان سىنىپ دەپ ئىككى سىنىپقا ئايرىلغان بولۇپ، مەن دەرس ئاستا ئۆتۈلىدىغان سىنىپقا دەرس ئۆتىمەن. مەنمۇ ئوقۇتقۇچى بولدۇم» دېدى ئۇ.

  كەنتتىكى دەرسخانا ئازادە پائالىيەت مەركىزىگە تەسىس قىلىنغان بولۇپ، ئايتۇرسۇنخان دوسكىغا «古» خېتىنى يېزىپ سۆزلۈك ياسىدى. «......古,古老,古人,古诗» ئۇ بىر قېتىم ئوقۇسا، كۆپچىلىك ئەگىشىپ بەش قېتىم ئوقۇدى.

  كەنت ئاھالىسى ئايشەمخان ئابدۇقادىر ھەربىر سۆزدە بىر تىنىپ تۇرۇپ مۇخبىرلارغا، ئۆزىنىڭ ئۆگىنىشنى ئەمدى باشلىغانلىقىنى، پۇتۇڭخۇانى ناھايىتى ئۆگەنگۈسى بارلىقىنى، ئايتۇرسۇنخانغا ئوخشاش باشقىلار بىلەن راۋان سۆزلەشكۈسى بارلىقىنى ئېيتتى. دۆلەت ئورتاق تىل - يېزىقىنى ئۆگىنىشتە، ئايتۇرسۇنخان ئىزچىل ناھايىتى كۆڭۈل قويدى. تەربىيەلەشنى قوبۇل قىلىۋاتقان چاغدا، ئۇ كۈندىلىك خاتىرىسىگە مۇنداق يازغانىدى: مەن ھازىر بەك ئالدىراش، چۈنكى مەن دۆلەت ئورتاق تىل - يېزىقىنى تىرىشىپ ئۆگىنىۋاتىمەن، تەربىيەلەش مەركىزىدىكى ئوقۇتقۇچىلار بىزگە ناھايىتى سەۋرچانلىق بىلەن ئۆگىتىۋاتىدۇ.

  بۈگۈنكى كۈندە، ئايتۇرسۇنخاننىڭ كۈندىلىك خاتىرىسىگە مۇنۇلار يېزىلدى: كەچلىك كۇرستىكى دەرستىن چۈشكەندىن كېيىن كەنت ئاھالىلىرى ماڭا، رەھمەت مۇئەللىم! دېدى، مەن ئىچ - ئىچىمدىن ناھايىتى تەسىرلەندىم، بەك خۇشال بولدۇم!

  «دۆلەت ئورتاق تىل - يېزىقى ھەر مىللەت خەلقنىڭ ئالاقىلىشىشى، ئالماشتۇرۇشى، ئارىلىشىشىدىكى كۆۋرۈك، مەن بۇنىڭدىن كېيىن تېخىمۇ ئەستايىدىللىق بىلەن دەرس تەييارلاپ، ئۆگەنگەن بىلىملىرىمنىڭ ھەممىسىنى كەنت ئاھالىلىرىگە ئۆگىتىمەن، بۇ مېنىڭ پارتىيەنىڭ مېھىر - شەپقىتىگە جاۋاب قايتۇرۇشتىكى بىر خىل ئۇسۇلۇم» دېدى ئايتۇرسۇنخان.

مەسئۇل مۇھەررىر : قۇربانجان قېيۇم

ئەسكەرتىش:

تورىمىزدىكى ئەسەرلەرنىڭ نەشر ھوقۇقى شىنجاڭ يېڭى تاراتقۇلار مەركىزىگە تەۋە، ھەرقايسى تاراتقۇلار كۆچۈرۈپ تارقاتقاندا « تىيانشان تورى » دەپ مەنبەنى ئېنىق ئەسكەرتىشى كېرەك، بولمىسا قانۇنىي جاۋابكارلىقى سۈرۈشتە قىلىنىدۇ.

  • مەركەز مالىيەسىدىن ئاجرىتىلغان 2 مىليارد 100 مىليون يۈەن يېزا ئەمىن ئۆي قۇرۇلۇشى تولۇقلىما ياردەم مەبلىغى نەقلەشتى
  • شىنجاڭدا بۇغداينىڭ بىرلىك ھوسۇل رېكورتى يېڭىلىنىپ 731.3 كىلوگىرامغا يەتتى
  • يازدا قومۇل مىڭشا تېغىغا بېرىش