تىيانشان تورى   ›   تۇرمۇش   ›   ساغلاملىق

ياشانغانلار يېمەك-ئىچمەكتە ئون «بولۇش»نى ئىشقا ئاشۇرۇشى كېرەك

ئىلمىي يېمەك-ئىچمەك قېرىلىق دەۋرىدىكى ساغلاملىقنىڭ ئۇل تېشى. ياشانغانلارنىڭ يېمەك-ئىچمىكىدە ئون «بولۇش»قا ئەھمىيەت بېرىش كېرەك.

1. يېمەكلىكلەر ئارىلاش بولۇش. ئادەم بەدىنى ئوخشاش بولمىغان يېمەكلىكلەردىن ئوزۇقلۇققا ئېرىشىشكە ئېھتىياجلىق، ياشانغانلارنىڭ ھەر كۈنى دانلىق زىرائەت، ياڭيۇ تۈرىدىكىلەر، كۆكتات، مېۋە-چىۋە تۈرىدىكىلەر، بېلىق، تۇخۇم تۈرىدىكىلەر، سۈت، پۇرچاق تۈرىدىكىلەر ۋە ياغ تۈرىدىكىلەر قاتارلىق كۆپ خىل يېمەكلىكلەرنى تاللىشى، گۆشلۈك ۋە گۆشسىز، ئاق-قارا ئاشلىق، رەڭ، تەم، قۇرغاق ۋە سۇيۇق-سەلەڭ تۈرلەرنى ماسلاشتۇرۇشقا دىققەت قىلىشى تەۋسىيە قىلىنىدۇ.

2. سۈپىتى يۇقىرى بولۇش. ئاقسىل تولۇقلاشنى مىسال ئالساق، كۆپ ئۇچرايدىغان سۈت، تۇخۇم، دۇفۇ، گۆش تۈرلىرى قاتارلىقلار ياشانغانلارنى ئەلا سۈپەتلىك ئاقسىل بىلەن تەمىنلەيدۇ. گۆش تۈرلىرىنى تاللاشتا، بېلىق، راكنى كۆپرەك يېيىش تەۋسىيە قىلىنىدۇ.

3.كۆكتات ۋە مېۋە-چىۋىلەر يېڭى بولۇش. رەڭگى ئوچۇق كۆكتات، مېۋىلەر تەركىبىدە ئوكسىدلىنىشقا قارشى ماددىلار بىر قەدەر كۆپ بولۇپ، ئىممۇنىتېت كۈچىنى تەڭشەپ سوزۇلما خاراكتېرلىك كېسەللىكلەرنىڭ ئالدىنى ئالىدۇ. سۆسۈن رەڭلىك كۆكتاتلار تەركىبىدە سىئانىدىن مول، مەسىلەن، چەيزە؛ يېشىل رەڭلىك كۆكتاتلاردا خىلوروفىل، كسانتوفىل مول، مەسىلەن، بوسەي.

4. ئۇسسۇلۇقنى ۋاقتىدا ئىچىش. ياشانغانلارنىڭ ئۇسسۇزلۇققا بولغان سەزگۈرلۈكى تۆۋەنلەپ كېتىدۇ، شۇڭا ئاڭلىق ئۇسسۇلۇق ئىچىش ئادىتىنى يېتىلدۈرۈشى كېرەك. ھەر كۈنلۈك يېمەك-ئىچمەكتە سۇيۇق ئۇماچ، شورپا، پۇرچاق سۈتى، سۈت قاتارلىقلارنى مۇۋاپىق تەڭشەپ ئىستېمال قىلىش، ئۇنىڭدىن باشقا، ئايرىم ھالدا 900~1200 مىللىلېتىر سۇ ۋە چاي تولۇقلاش كېرەك.

5. مىقدارى ئاز بولۇش. ياشانغانلارنىڭ ئاساسىي مېتابولىزم نىسبىتى تۆۋەنلەيدۇ، 61~70 ياش ئارىلىقىدىكى ياشانغانلارنىڭ ئومۇمىي ئېنېرگىيە قوبۇل قىلىشى ياش، ئوتتۇرا ياشلارنىڭكىدىن %20، 71 ياشتىن يۇقىرى ياشانغانلارنىڭ ئومۇمىي ئېنېرگىيە قوبۇل قىلىشى %30 تۆۋەنلەپ كېتىدۇ. قوبۇل قىلىدىغان يېمەكلىك مىقدارى ئازايتىلسىمۇ، تۈرى ئاز بولسا بولمايدۇ.

6. تاماق تۈجۈپىلەپ تەييارلانغان بولۇش. ياشانغانلارنىڭ يېمەك-ئىچمىكىنى تەييارلاشتا تېخىمۇ تۈجۈپىلەش، رەڭگى، پۇرىقى، تەمى ۋە شەكلىنى تەڭشەشكە ئەھمىيەت بېرىش كېرەك.

7. يۇمشاق بولۇش. ياشانغانلارنىڭ ھەزىم قىلىش سۇيۇقلۇقى، ھەزىم قىلىش فېرمېنتى ۋە ئاشقازان كىسلاتاسىنىڭ ئاجرىلىپ چىقىرىلىشى ئازىيىپ كېتىدىغان بولغاچقا، يېمەكلىكلەرنىڭ ھەزىم قىلىنىشى ۋە سۈمۈرۈلۈشىگە تەسىر يېتىدۇ، شۇڭا ياشانغانلارنىڭ تاماقلىرى يۇمشاق ۋە ئېزىلىپ پىشقان بولسا بولىدۇ، ھورداش، قاينىتىش، دۈملەش، قورۇش قاتارلىق تاماق ئېتىش ئۇسۇللىرىنى قوللىنىش كېرەك.

8. يېمەك-ئىچمەك قىزىقراق بولۇش. يېمەكلىكنىڭ ئەڭ ياخشى ھەزىم قىلىنىش، سۈمۈرۈلۈش جەريانى بەدەن تېمپېراتۇرىسىغا يېقىنلاشقان شارائىتتا ئېلىپ بېرىلىدۇ، شۇڭا، قىزىقراق يېمەك-ئىچمەكلەر ياشانغانلارغا ئەڭ ماس كېلىدۇ.

9. تاماق يېيىش سۈرئىتى ئاستا بولۇش. يۇمشاق چايناپ ئاستا يۇتۇش يېمەكلىكلەرنىڭ پارچىلىنىش ئۈنۈمى ۋە ئاشقازان ساغلاملىقىغا كاپالەتلىك قىلىشقا پايدىلىق، شۇنىڭ بىلەن بىر ۋاقىتتا ھەزىم قىلىش ۋە سۈمۈرۈشكىمۇ پايدىلىق.

10. مايسىزراق، تۇزسىزراق بولۇش. ياشىنىپ قالغاندا، خولېستېرىن ۋە ترىگلىتسېرىدنىڭ ئۆرلەپ كېتىشىدىن ساقلانغىلى بولمايدۇ، شۇڭا ماينى تىزگىنلەشكە توغرا كېلىدۇ؛ ياشانغانلارنىڭ شېكەرگە بولغان چىدامچانلىقى تۆۋەنلەپ كېتىدۇ، شۇڭا شېكەرنى ئازايتىشقا توغرا كېلىدۇ؛ ياشانغانلار يۇقىرى قان بېسىم پەيدا بولۇشتىن ساقلىنىش ئۈچۈن، تۇزنى ئازايتىشى كېرەك. بۇنىڭدىن باشقا، تۇزلانغان يېمەكلىك، كونسېرۋا، تېز تاماق ۋە ھەر خىل تەييار يېمەكلىكلەرنى يېيىشتىن ساقلىنىشى كېرەك.

مەسئۇل مۇھەررىر : مېھرىگۈل ناسىر

ئەسكەرتىش:

تورىمىزدىكى ئەسەرلەرنىڭ نەشر ھوقۇقى شىنجاڭ يېڭى تاراتقۇلار مەركىزىگە تەۋە، ھەرقايسى تاراتقۇلار كۆچۈرۈپ تارقاتقاندا « تىيانشان تورى » دەپ مەنبەنى ئېنىق ئەسكەرتىشى كېرەك، بولمىسا قانۇنىي جاۋابكارلىقى سۈرۈشتە قىلىنىدۇ.

  • مەركەز مالىيەسىدىن ئاجرىتىلغان 2 مىليارد 100 مىليون يۈەن يېزا ئەمىن ئۆي قۇرۇلۇشى تولۇقلىما ياردەم مەبلىغى نەقلەشتى
  • شىنجاڭدا بۇغداينىڭ بىرلىك ھوسۇل رېكورتى يېڭىلىنىپ 731.3 كىلوگىرامغا يەتتى
  • يازدا قومۇل مىڭشا تېغىغا بېرىش