تىيانشان تورى   ›   خەۋەر مەركىزى   ›   مۇھىم خەۋەر

شى جىنپىڭ بىلەن رۇسىيە زۇڭتۇڭى پۇتىن بىرلىكتە جۇڭگو - رۇسىيە دىپلوماتىك مۇناسىۋەت ئورناتقانلىقىنىڭ 70 يىللىقىنى خاتىرىلەش يىغىنىغا قاتناشتى ھەم ئەدەبىيات - سەنئەت نومۇرلىرىنى كۆردى

6- ئاينىڭ 5- كۈنى، دۆلەت رەئىسى شى جىنپىڭ بىلەن رۇسىيە زۇڭتۇڭى پۇتىن موسكۋا چوڭ تىياتىرخانىسىدا جۇڭگو - رۇسىيە دىپلوماتىك مۇناسىۋەت ئورناتقانلىقىنىڭ 70 يىللىقىنى خاتىرىلەش پائالىيىتىگە بىرلىكتە قاتناشتى.

(شىنخۇا ئاگېنتلىقى مۇخبىرى لى شۆرېن فوتوسى)

  شىنخۇا ئاگېنتلىقى، موسكۋا، 6- ئاينىڭ 5- كۈنى تېلېگراممىسى (مۇخبىرلار چېن جى، ۋېن شىن، خۇاڭيىن جيازى) دۆلەت رەئىسى شى جىنپىڭ 6- ئاينىڭ 5- كۈنى رۇسىيە زۇڭتۇڭى پۇتىن بىلەن موسكۋا چوڭ تىياتىرخانىسىدا جۇڭگو - رۇسىيە دىپلوماتىك مۇناسىۋەت ئورناتقانلىقىنىڭ 70 يىللىقىنى خاتىرىلەش يىغىنىغا بىرلىكتە قاتناشتى ھەم ئەدەبىيات - سەنئەت نومۇرلىرىنى كۆردى.

  تۈن پەردىسى يېيىلغاندا، موسكۋا شەھەر مەركىزىگە جايلاشقان چوڭ تىياتىرخانىدا پانۇسلار چاقناپ، رەڭدار نۇر چېچىلىپ، شاد - خۇرام بايرام كەيپىياتىغا تولغانىدى.

  شۇ جاي ۋاقتى سائەت 20دىن 45 مىنۇتلار ئۆتكەندە، شى جىنپىڭ پۇتىن بىلەن بىرلىكتە يىغىن مەيدانىغا كىردى. پۈتۈن مەيداندىكىلەر ئورنىدىن تۇرۇپ، ئالقىش ياڭرىتىپ قارشى ئالدى.

  پۇتىن ئالدى بىلەن تەبرىك سۆزى قىلدى. ئۇ مۇنۇلارنى بىلدۈردى: دىپلوماتىك مۇناسىۋەت ئورنىتىلغان 70 يىلدىن بۇيان، رۇسىيە - جۇڭگو مۇناسىۋىتى ئاجايىپ تەرەققىيات مۇساپىسىنى باشتىن كەچۈردى. ئىككى تەرەپ ئۆزئارا قوللاپ ۋە ياردەم بېرىپ، ئىككى دۆلەت مۇناسىۋىتىنىڭ بۈگۈنكى كۈندە تارىختىكى ئەڭ يۇقىرى سەۋىيەگە يېتىشىگە تۈرتكە بولدى. جۇڭگو رۇسىيەنىڭ ئەڭ چوڭ سودا ھەمراھى، ئىككى دۆلەتنىڭ ئېنېرگىيە، ئاۋىياتسىيە - ئالەم قاتنىشى، پەن - تېخنىكا قاتارلىق ساھەلەردىكى ھەمكارلىق نەتىجىلىرى مول بولدى. رۇسىيە - جۇڭگو ئىككى دۆلەت ھەمكارلىشىشنى قويۇقلاشتۇرۇپ، خەلقئارا ۋە رايون خەۋپسىزلىكى، مۇقىملىقىنى قوغداش، قىزىق نۇقتا مەسىلىلىرىنى ھەل قىلىش، ئىنسانلار دۇچ كەلگەن يېڭى خىرىس، يېڭى تەھدىتلەرگە تاقابىل تۇرۇش ئۈچۈن مۇھىم تۆھپىلەرنى قوشتى. رۇسىيە - جۇڭگو دۇنيانىڭ كۆپ قۇتۇپلىشىشىنى ئورتاق قوللاپ، خەلقئارا قانۇن ۋە بىرلەشكەن دۆلەتلەر تەشكىلاتى نىزامنامىسىنىڭ ئاساسىي مەقسىتى ۋە پىرىنسىپىنى قوغداپ، باراۋەر ئاساستا ئۆزئارا مەنپەئەت يەتكۈزۈش، ھەمكارلىشىپ ئورتاق پايدا ئېلىش پىرىنسىپىنى ئاساس قىلغان خەلقئارا يېڭى تەرتىپنىڭ شەكىللىنىشىگە تۈرتكە بولدى. مەن رەئىس شى جىنپىڭ بىلەن بۈگۈن بىرلىكتە قوشما بايانات ئىمزالاپ ھەم ئېلان قىلىپ، رۇسىيە - جۇڭگونىڭ ھەمكارلىقنى چوڭقۇرلاشتۇرۇشى ئۈچۈن تېخىمۇ ئۇلۇغۋار نىشاننى ئوتتۇرىغا قويدۇق. رۇسىيە تەرەپ جۇڭگو تەرەپ بىلەن بىرلىكتە ئىككى دۆلەت خەلقلىرىگە تېخىمۇ ياخشى بەخت يارىتىش ئۈچۈن ئورتاق تىرىشچانلىق كۆرسىتىشنى خالايدۇ.

  قىزغىن ئالقىش سادالىرى ئىچىدە، شى جىنپىڭ «قول تۇتۇشۇپ تىرىشىپ، مۈرىنى مۈرىگە تىرەپ ئىلگىرىلەپ، يېڭى دەۋردىكى جۇڭگو - رۇسىيە مۇناسىۋىتىنىڭ گۈزەل كەلگۈسىنى يارىتايلى» دېگەن تېمىدا تەبرىك سۆزى قىلدى.

  شى جىنپىڭ مۇنداق دېدى: بۈگۈن، بىز جۇڭگو - رۇسىيە دىپلوماتىك مۇناسىۋەت ئورناتقانلىقىنىڭ 70 يىللىقىنى داغدۇغىلىق تەبرىكلەپ، بىرلىكتە ئىككى دۆلەت مۇناسىۋىتىدىكى يەنە بىر تارىخىي پەيتنى كۈتۈۋالدۇق. بىز مىسلىسىز جاپالىق ۋەتەننى قوغداش ئۇرۇشى ۋە ياپون باسقۇنچىلىرىغا قارشى ئۇرۇش مەزگىلىدە، جۇڭگو - سوۋېت ئارمىيەلىرى، خەلقلىرىنىڭ مۈرىنى مۈرىگە تىرەپ جەڭ قىلىپ، فاشىستلارنىڭ تاجاۋۇزچىلىقىغا ئورتاق زەربە بېرىپ، ئىسسىق قېنى بىلەن يىمىرىلمەس جەڭگىۋار دوستلۇق ئورناتقانلىقىنى ئۇنتۇمايمىز. جۇڭخۇا خەلق جۇمھۇرىيىتى قۇرۇلۇپ ئىككىنچى كۈنى، سوۋېت ئىتتىپاقى دەرھال ئېتىراپ قىلدى ھەم جۇڭخۇا خەلق جۇمھۇرىيىتى بىلەن دىپلوماتىك مۇناسىۋەت ئورناتتى. جۇڭخۇا خەلق جۇمھۇرىيىتى قۇرۇلۇپ تاشلىنىپ قالغان ئىشلار ئەۋج ئالدۇرۇلۇشقا باشلىغان ئاشۇ يىللاردا، زور تۈركۈمدىكى سوۋېت ئىتتىپاقى مۇتەخەسسىسلىرى ئەقىل - پاراسىتى ۋە قان - تەرى ئارقىلىق يېڭىلا ۋۇجۇدقا كەلگەن جۇڭخۇا خەلق جۇمھۇرىيىتىنىڭ سانائەتلىشىش ئاساسىنى سېلىشىغا ياردەم بەردى، شۇنداقلا ئىككى دۆلەت خەلقلىرى دوستلۇقىنىڭ ئاجايىپ داستانىنى پۈتتى. 21- ئەسىرگە كىرگەندە، ئىككى تەرەپ ئابىدىلىك ئەھمىيەتكە ئىگە «جۇڭگو - رۇسىيە ئىناق قوشنىدارچىلىق، دوستانە ھەمكارلىق شەرتنامىسى» ئىمزالىدى. ئىككى دۆلەت مۇناسىۋىتى ئومۇميۈزلۈك ئىستراتېگىيەلىك ھەمكارلىشىش ھەمراھلىق مۇناسىۋىتىگە يۈكسەلدۈرۈلۈپ، يېڭى تىپتىكى خەلقئارا مۇناسىۋەت ئورنىتىش، ئىنسانىيەت تەقدىرى ئورتاق گەۋدىسىنى بەرپا قىلىشقا تۈرتكە بولۇش ئۈچۈن ئۈلگە تىكلەپ بەردى.

  شى جىنپىڭ مۇنۇلارنى تەكىتلىدى: 70 يىللىق بوران - چاپقۇن، ئۆزگىرىشلەرنىڭ سىنىقىدىن ئۆتۈپ، جۇڭگو - رۇسىيە مۇناسىۋىتى بارغانسېرى پىشىپ يېتىلدى، مۇقىملاشتى، مۇستەھكەملەندى. مەن ۋە پۇتىن زۇڭتۇڭ جۇڭگو - رۇسىيەنىڭ يېڭى دەۋردىكى ئومۇميۈزلۈك ئىستراتېگىيەلىك ھەمكارلىشىش ھەمراھلىق مۇناسىۋىتىنى راۋاجلاندۇرۇپ، جۇڭگو - رۇسىيە مۇناسىۋىتىدە تېخىمۇ يۇقىرى سەۋىيەدىكى، تېخىمۇ زور تەرەققىي قىلغان يېڭى دەۋرنى بىرلىكتە ئاچىدىغانلىقىمىزنى جاكارلىدۇق.

  شى جىنپىڭ مۇنۇلارنى كۆرسەتتى: يېڭى دەۋردىكى جۇڭگو - رۇسىيە مۇناسىۋىتىدە، باشتىن - ئاخىر ئۆزئارا ئىشىنىشنى ئۇل تاش قىلىپ، ئۆزئارا ئىستراتېگىيەلىك تايىنىشنى مۇستەھكەملەپ، بىر - بىرىنىڭ يادرولۇق مەنپەئىتىگە چېتىلىدىغان مەسىلىلەردە ئۆزئارا قوللاش سالمىقىنى ئاشۇرۇپ، جۇڭگو - رۇسىيە مۇناسىۋىتىنىڭ ئالغا قاراپ تەرەققىي قىلىشىدىكى ئىستراتېگىيەلىك يۆنىلىشنى پۇختا ئىگىلەش كېرەك. مەنپەئەت يۇغۇرۇلۇشىنى كۈچەپ چوڭقۇرلاشتۇرۇپ، ئورتاق مەنپەئەت رىشتىنى چىڭىتىپ، «بىر بەلباغ، بىر يول»نى ئورتاق قۇرۇشنى ياۋروپا - ئاسىيا ئىقتىساد ئىتتىپاقى بىلەن ئۇدۇللاشتۇرۇشنى ئۈزلۈكسىز قانات يايدۇرۇپ، جۇڭگو - رۇسىيەنىڭ ئۆزئارا مەنپەئەت يەتكۈزۈش ھەمكارلىقىدا يېڭى ۋەزىيەت بەرپا قىلىش كېرەك. ئەل رىشتىنى تۇتاشتۇرۇشنى كۈچەپ ئىلگىرى سۈرۈپ، ئەۋلادمۇئەۋلاد دوستانە ئۆتىدىغان ئەلرايى ئاساسىنى پۇختىلاپ، ئىككى دۆلەت جەمئىيىتىدىكى ھەرقايسى ساھەلەر، ھەرقايسى جايلارنى ئالماشتۇرۇش، ئۆزئارا ئۆرنەك ئېلىشنى كۈچەيتىشكە ئىلھاملاندۇرۇپ، جۇڭگو - رۇسىيەنىڭ ئەۋلادمۇئەۋلاد دوستانە ئۆتۈش كۈچ ئۇلاش كالتىكىنى ئورتاق يەتكۈزۈش كېرەك. تېخىمۇ مەسئۇلىيەتچان بولۇپ، نەتىجە يارىتىپ، قول تۇتۇشۇپ دۇنيانىڭ تىنچلىقى، خاتىرجەملىكىنى قوغداپ، خەلقئارا جەمئىيەت بىلەن بىرلىكتە بىرلەشكەن دۆلەتلەر تەشكىلاتىنى يادرو قىلغان خەلقئارا سىستېمىنى قەتئىي قوغداپ، بىرلەشكەن دۆلەتلەر تەشكىلاتى نىزامنامىسىنىڭ ئاساسىي مەقسىتى ۋە پىرىنسىپىنى ئاساس قىلغان خەلقئارا تەرتىپنى قەتئىي قوغداپ، دۇنيانىڭ كۆپ قۇتۇپلىشىشى ۋە خەلقئارا مۇناسىۋەتنىڭ دېموكراتىيەلىشىشىگە تۈرتكە بولۇپ، ئورتاق ھالدا تېخىمۇ گۈللەنگەن، مۇقىم، ئادىل، ھەققانىي دۇنيا قۇرۇپ، قول تۇتۇشۇپ يېڭىچە خەلقئارا مۇناسىۋەت ۋە ئىنسانىيەت تەقدىرى ئورتاق گەۋدىسىنى بەرپا قىلىش كېرەك.

  شى جىنپىڭ مۇنۇلارنى تەكىتلىدى: 70 يىللىق تارىخىي تەجرىبىلەر شۇنى تولۇق ئىسپاتلىدىكى، مەيلى ئىلگىرى، ھازىر ياكى كەلگۈسىدە بولسۇن، جۇڭگو - رۇسىيە كۆچۈپ كېتەلمەيدىغان ياخشى قوشنىلار، ئايرىۋەتكىلى بولمايدىغان ھەقىقىي ھەمراھلاردۇر. بىز دىپلوماتىك مۇناسىۋەت ئورناتقانلىقىمىزنىڭ 70 يىللىقىنى تەبرىكلەشنى يېڭى باشلىنىش نۇقتىسى قىلىپ، قول تۇتۇشۇپ تىرىشىپ، مۈرىنى مۈرىگە تىرەپ ئىلگىرىلەپ، يېڭى دەۋردىكى جۇڭگو - رۇسىيەنىڭ ئومۇميۈزلۈك ئىستراتېگىيەلىك ھەمكارلىشىش ھەمراھلىق مۇناسىۋىتىنىڭ گۈزەل كەلگۈسىنى ئورتاق يارىتايلى!

  پۈتۈن مەيداندىكىلەر جۇڭگو - رۇسىيە ئىككى دۆلەت باشلىقلىرىنىڭ سۆزىگە قىزغىن ئالقىش ياڭراتتى.

  ئارقىدىنلا، شى جىنپىڭ بىلەن پۇتىن بىرلىكتە «خۇشاللىق ئىلكىدە ئۆزئارا تۈرتكە بولۇۋاتقان جۇڭگو - رۇسىيە» ئادىمىيەت ئالاقىسى باش تېما پائالىيىتىنىڭ قىسقا سىن فىلىمىنى كۆردى ھەم جۇڭگو - رۇسىيە ئىككى دۆلەت سەنئەتكارلىرى بىرلىكتە ئورۇنلىغان ئەدەبىيات - سەنئەت ئويۇنىدىن ھۇزۇرلاندى.

  ئويۇن «ئازادە كوچىنى بويلاپ» ناملىق رۇسىيە خەلق ناخشىسى بىلەن باشلاندى. مول مەزمۇنلۇق جۇڭگو مىللىي سىمفونىيەلىك مۇزىكا «تەبرىكلەش مۇقەددىمىسى»دە خۇشال، ئىناق بايرام مەنزىرىسى نامايان قىلىندى. جۇڭگو - رۇسىيە سەنئەتكارلىرى جۇڭگو مۇزىكىسى «مولىخۇا» ۋە رۇسىيە مۇزىكىسى «قىزىل مېيخۇا گۈلى ئېچىلدى»نى بىرلىكتە ئورۇنلاپ، ئىككى دۆلەتنىڭ ئەنئەنىۋى دوستلۇقىغا مەدھىيە ئوقۇدى. «شەرقتىن كەلگەن بەخت تىلىكى» چوڭقۇر مەنىگە ئىگە مۇزىكىلىق كۆرۈنۈشنى ھاسىل قىلدى. ئويۇن «كالىنكا» ناملىق رۇسىيە مىللىي مۇزىكا ساداسى ئىچىدە ئاخىرلاشتى.

  جۇڭگو - رۇسىيەنىڭ ھەرقايسى ساھەلىرىدىكى زاتلاردىن تەخمىنەن 1600 كىشى قاتناشتى.

  خاتىرىلەش يىغىنىدىن ئىلگىرى، ئىككى دۆلەت باشلىقلىرى بىرلىكتە جۇڭگو - رۇسىيە دىپلوماتىك مۇناسىۋەت ئورناتقانلىقىنىڭ 70 يىللىقىغا ئائىت سۈرەتلەر كۆرگەزمىسىنى ئېكسكۇرسىيە قىلدى.

  دىڭ شۆشياڭ، ياڭ جيېچى، ۋاڭ يى، خې لىفېڭ قاتارلىقلار يۇقىرىقى پائالىيەتلەرگە قاتناشتى.

مەسئۇل مۇھەررىر : ئامانگۈل ئابدۇراخمان

ئەسكەرتىش:

تورىمىزدىكى ئەسەرلەرنىڭ نەشر ھوقۇقى شىنجاڭ يېڭى تاراتقۇلار مەركىزىگە تەۋە، ھەرقايسى تاراتقۇلار كۆچۈرۈپ تارقاتقاندا « تىيانشان تورى» دەپ مەنبەنى ئېنىق ئەسكەرتىشى كېرەك، بولمىسا قانۇنىي جاۋابكارلىقى سۈرۈشتە قىلىنىدۇ.

ئالاقىلىشىڭ ئەسەر ئەۋەتىڭ خەت قالدۇرۇڭ تورىمىز ئىختىيارى مۇخبىرلار خەت ساندۇقى