مۇخىبرىمىز يۈ مېڭفەن خەۋىرى: ھەممەيلەن «باھار يامغۇرى ياغدىنمۇ قىممەتلىك» دېيىشىدۇ، بىر قېتىملىق باھار يامغۇرىدىن كېيىن، ئېچىلىش ئالدىدا تۇرغان غۇنچىلار ھۈپپىدە چېچەكلەيدۇ، دەرەخ شاخلىرىدىكى يامغۇر تامچىلىرى خۇددى بالىلارنىڭ يىغلاشلىرىدىن كېيىن ئوماق يۈزىدە تۇرۇپ قالغان ياش تامچىسىدەك يالتىراپ تۇرىدۇ. بۈگۈن شىمالىي شىنجاڭنىڭ كۆپ قىسىم جايلىرىدا يامغۇر ياغىدۇ، شەرقىي شىنجاڭدىمۇ ئاز مىقداردا يامغۇر ياغىدۇ. يامغۇرنىڭ ئاز-كۆپ يېغىشىدىن قەتئىينەزەر، سىرتقا چىققاندا كۈنلۈك ئېلىۋېلىشنى ئۇنتۇماڭ.
تۈنۈگۈن ياغقان يامغۇردىن كېيىن، بۈگۈن ئۈرۈمچىدە ھاۋا ئوچۇق بولۇپ، ئەڭ يۇقىرى تېمپېراتۇرا ℃17، ئەڭ تۆۋەن تېمپېراتۇرا ℃9 بولىدۇ، ئۈچ بال شامال چىقىدۇ. بۇ ھەپتىدە ئۈرۈمچىدە سوغۇق ھاۋا ئېقىمى ھەرىكىتى بىر قەدەر كۆپ بولىدۇ، كۆپچىلىك كىيىنىشكە دىققەت قىلىپ، زۇكام بولۇپ قېلىشنىڭ ئالدىنى ئېلىشى كېرەك.