3-ئاينىڭ 11-كۈنى، چەرچەن ناھىيەسى توغراقلىق يېزىسى زاغۇنلۇق كەنتىدىكى نۇرنىسا ئوسماننىڭ چىلانزارلىقىدا، بايىنغولىن موڭغۇل ئاپتونوم ئوبلاستلىق تەرەققىيات ۋە ئىسلاھات كومىتېتىنىڭ كەنتتە تۇرۇشلۇق خىزمەت ئەترىتىنىڭ مۇئاۋىن ئەترەت باشلىقى جاڭ ۋېيپىن كەنت ئاھالىلىرىگە كۆكتات تېرىش تېخنىكىسىنى ئۆگەتتى، 120 دىن ئارتۇق كەنت ئاھالىسى بۇ قېتىمقى كۇرسقا قاتناشتى.
تېمپېراتۇرىنىڭ ئۈزلۈكسىز ئۆرلىشىگە ئەگىشىپ، ئەتىيازلىق تېرىلغۇ خىزمىتى تەدرىجىي باشلاندى. جاڭ ۋېيپىن كەنت ئاھالىلىرىنىڭ كۆكتاتنى ئۆلچەملىك تېرىپ، كىرىمىنى ئاشۇرۇشىغا ياردەم بېرىش ئۈچۈن، ئۆزىنىڭ كۆكتات تېرىش تەجرىبىسىنى كەنت ئاھالىلىرىگە ئۆگەتتى. ئۇ كۆكتات تۈرىنى قانداق تاللاش، قاچان قوشۇمچە ئوغۇتلاش، قانداق دېھقانچىلىق دورىسى چېچىش قاتارلىقلار توغرىسىدا ئۆزىنىڭ تەجرىبىسىنى سۆزلەپ بەردى ھەمدە كەنت ئاھالىلىرىنىڭ ئۆگىنىشى ئۈچۈن ئۈلگە كۆرسەتتى. ئارقىدىن كۆپچىلىك بىرلىكتە كەنت ئاھالىسى نۇرنىسا ئوسمانغا ياردەملىشىپ، ئۇنىڭ ئىككى مو يېرىگە سامساق، چىڭسەي، شياۋبەيسەي، ئەتىيازلىق لوبو تېرىدى.
«ئىشنىڭ بېشى باھاردىن، خىزمەت ئەترىتىدىكىلەر كەنت ئاھالىلىرىنى تۈرلۈك تېخنىكا كۇرسلىرىغا قاتنىشىشقا پائال تەشكىللەش بىلەن بىللە ھويلا-ئاران تېرىقچىلىقىنى تەرەققىي قىلدۇرۇشقا ئىلھام بەردى، كېيىنكى باسقۇچتا، بىز ئېتىز - ئېرىق پەرۋىشى تېخنىكىسى ۋە بازاردا سېتىشقا كۈچ سەرپ قىلىپ، كەنت ئاھالىلىرى تېرىغان تۈرلۈك كۆكتاتلارنىڭ ھەممىسىنى ياخشى باھادا سېتىپ، كەنت ئاھالىلىرىگە ھويلا-ئاران ئىگىلىكىنى تەرەققىي قىلدۇرۇشنىڭ پايدىسىنى ھېس قىلدۇرۇپ، ھويلا-ئاران ئىگىلىكىنى قېلىپلاشتۇرۇشنىڭ كېيىنكى تەرەققىياتى ئۈچۈن پۇختا ئاساس سالىمىز.» دېدى كەنتنىڭ 1 - شۇجىسى، خىزمەت ئەترىتىنىڭ باشلىقى دىڭ جىيەنفىڭ. (بايىنغولىن ئوبلاستى «ئەلرايىنى بىلىش، ئەلگە نەپ يەتكۈزۈش، ئەلنى مايىل قىلىش» بويىچە كەنتتە تۇرۇش خىزمىتىگە رەھبەرلىك قىلىش گۇرۇپپىسى ئىشخانىسىدىن ۋاڭ شىنجۈن، لياڭ خاۋ تەمىنلىگەن)