ئىختىيارىي مۇخبىرىمىز ياڭ سۇڭۋېن خەۋىرى: مۇخبىر 2019-يىل 1-ئاينىڭ 15-كۈنى قابا ناھىيەسى تېرەكتى يېزىسى چىبارشىلىك كەنتىگە كەلدى. بۇ جاينىڭ بىر تەرىپى تاغقا، بىر تەرىپى دەرياغا يانداش بولۇپ، قىش پەسلىدە قاتار-قاتار ياغاچ ئۆيلەرنىڭ ئۆگزىلىرى ئاپئاق قار بىلەن ئورىلىدۇ، ياغاچ ئۆيلەرگە ئانچە يىراق بولمىغان جايدىكى مەزمۇت قەد كۆتۈرۈپ تۇرغان كۆركەم قارلىق تاغ باغرىدا توپ-توپ يۈرگەن چارۋىلار قىش ئايلىرىدا تىمتاسلىققا چۆمگەن بۇ خىلۋەت جاينى تېخىمۇ ئاۋاتلاشتۇرىدۇ. بۇ جايدىكى كىشىلەر ئىنتايىن ئاددى-ساددا، مېھماندوست، تۈز كۆڭۈل بولۇپ، ئۆز قولى بىلەن تەييارلىغان قازاق مىللىتىنىڭ مەززىلىك تائاملىرى بىلەن يىراق-يېقىندىن كەلگەن مېھمانلارنى قىزغىن كۈتۈۋالىدۇ. بۇ يەرگە كەلگەن ھەر قانداق بىر ئادەم شەھەرلەردىكى شاۋقۇن-سۈرەننى پۈتۈنلەي ئۇنتۇپ، جىمجىتلىقتىن قانغۇچە ھۇزۇرلىنىپ راھەت تۇيغۇغا كېلىدۇ.
