ئۆز خەۋىرىمىز: مۇخبىرنىڭ يېقىندا «شىنفۇ» ئاۋىياتسىيە شىركىتىنىڭ شىنجاڭ سېتىش رايونىدىن ئىگىلىشىچە، «شىنفۇ» ئاۋىياتسىيە شىركىتى بۈگۈن(11–ئاينىڭ 20-كۈنى) قاراماي-ئالتاي ئاۋىياتسىيە لىنىيەسىنى رەسمىي ئەسلىگە كەلتۈرگەن. ئىگىلىنىشىچە، قاراماي-ئالتاي ئاۋىياتسىيە لىنىيەسىنىڭ نۆۋەتچى ئايروپىلان نومۇرى JR1597/98 (ھەر كۈندە بىر نۆۋەت) بولۇپ، سائەت 50 : 11 دە قارامايدىن ئۇچۇپ، سائەت 12：55 دە ئالتايغا قونىدىكەن. سائەت 13：25 دە ئالتايدىن ئۇچۇپ، سائەت 14：30 دا قارامايغا قايتىپ كېلىدىكەن.
بۇ قېتىمقى ئاۋىياتسىيە لىنىيەسىنىڭ ئىسمېنا قوشۇلۇشى ۋە ئەسلىگە كەلتۈرۈلۈشى ئالتايدىن قارامايغا بارىدىغان ۋاقىتنى تېجەپلا قالماستىن، يەنە «شىنفۇ» ئاۋىياتسىيە شىركىتىنىڭ نۆۋەتچى ئايروپىلانىغا ئولتۇرۇپ، قارامايدىن ئاپتونوم رايونىمىز ئىچى-سىرتىدىكى ھەر قايسى چوڭ شەھەرلەرگە ئايروپىلان ئالمىشىدىغان يولۇچىلارنىڭ باشقا ئايرودۇرۇملارغا بېرىپ ئايروپىلان ئالماشقىنىغا سېلىشتۇرغاندا تېخىمۇ قولايلىق ئېلىپ كېلىدىكەن.
