ئۆز خەۋىرىمىز: 11-ئاينىڭ 12-كۈنى، ئاقسۇ «سېڭسېڭ» مېۋىچىلىك چەكلىك مەسئۇلىيەت شىركىتىنىڭ «بىڭتاڭشىن» ئالما بازىسىدا، مەسئۇل خادىم لى جيەنشېڭ ئىشچىلارنى ئۈزۈپ كېلىنگەن ئالمىلارنى ئايرىپ، ساندۇقلارغا قاچىلاپ، مەملىكەتنىڭ ھەرقايسى جايلىرىغا تارقىتىشقا ئورۇنلاشتۇرۇش بىلەن ئالدىراش ئىدى. ئەمدىلا ئۆتۈپ كەتكەن «قوش 11»دا لى جيەنشېڭ «تيەنماۋ»، «جىڭدۇڭ» قاتارلىق ئېلېكتىرونلۇق سودا سۇپىسىدا 15 توننىغا يېقىن «بىڭتاڭشىن» ئالما ساتتى.
مۇخبىر ئاقسۇ «سېڭسېڭ» مېۋىچىلىك چەكلىك مەسئۇلىيەت شىركىتىنىڭ تيەنماۋدا تىزىمغا ئالدۇرغان دۇكىنىغا كىرىپ، دۇكاننىڭ بۇ قېتىمقى «قوش 11» پائالىيىتىدە ئىككى ساندۇق ئالما (4 كىلوگرام/يەشىك) سېتىۋالغان خېرىدارلارغا يەنە بىر ساندۇق سوۋغا قىلىشتەك سېتىش تەدبىرىنى يولغا قويۇپ، 5000دىن ئارتۇق زاكازنى تاپشۇرۇۋالغانلىقىنى كۆردى.
لى جيەنشېڭ مۇنداق دېدى: ئىككى كۈندىن بۇيان «بىڭتاڭشىن» ئالمىنى تېخىمۇ كۆپ سېتىش ئۈچۈن بەكلا ئالدىراش بولۇپ كەتتىم، بىز بۇ يىل ماللارنى تولۇق تەييارلىدۇق، مالنى ئەڭ تېز سۈرئەتتە تارقىتىشقا كاپالەتلىك قىلىمىز.