ئۆز خەۋىرىمىز (مۇخبىر ليۇ خۇڭۋېن، ئىختىيارىي مۇخبىر شۈ لۇڭ): نۆۋەتتە، شىنجاڭ ئاقسۇ ۋىلايىتىدىكى چىلانلار ئارقا-ئارقىدىن پىشىپ، دېھقانلار ۋاقىتنى چىڭ تۇتۇپ چىلان يىغىشقا كىرىشىپ كەتتى، ئېتىز بويلىرى مول ھوسۇل شادلىقىغا چۆمدى.
11-ئاينىڭ 7-كۈنى، توقسۇ ناھىيەسى ئۈچقات يېزىسى كۈزلۈك كەنتىدىكى دېھقان رەناگۈل غالىپ چىلانلارنى ئاپتاپقا سالغاچ خۇشال ھالدا مۇنداق دېدى: بىز 12 مو يەرگە چىلان تېرىغانىدۇق، بۇ يىل چىلاندىن 6 توننا ھوسۇل ئالدۇق، ئەگەر بۇ يىلقى بازار باھاسى ئالدىنقى يىلىدىكىگە ئوخشاش بولسا، 80 مىڭ يۈەن كىرىم قىلالىشىمىز مۇمكىن.
دېھقانلارنىڭ كىرىمىنى ئاشۇرۇش ئۈچۈن، ئاقسۇ ۋىلايەتلىك ئورمانچىلىق ئىدارىسى دېھقانلارغا چىلانلارنى دەرەختە تەبىئىي قۇرۇتۇش ئارقىلىق چىلاننىڭ سۈپىتىگە كاپالەتلىك قىلىش، ئۇنىڭدىن باشقا يەنە، يىغىپ بولۇنغان چىلانلارنى ھاۋانىڭ ياخشى ۋاقتىدىن پايدىلىنىپ ئاپتاپقا سېلىپ قۇرۇتۇش، سۈپىتىنىڭ ئۆزگىرىپ كېتىشىدىن ساقلىنىش، شۇنىڭ بىلەن بىر ۋاقىتتا يىغىۋېلىنغان چىلانلارنى پىششىقلاپ ئىشلەش، دەرىجىگە ئايرىش، تازىلاش، قۇرۇتۇش قاتارلىقلارنى ۋاقتىدا بىر تەرەپ قىلىپ، كىرىمنىڭ ياخشى بولۇشىغا كاپالەتلىك قىلىش قاتارلىق تەكلىپ -پىكىرلەرنى بەردى.
