ئالما تۇرمۇشىمىزدا كۆپ ئىستېمال قىلىنىدىغان مېۋىلەرنىڭ بىرى. ئەمما، بەزىدە رەڭگى قىزىل ئالمىلارنىڭمۇ تەمىنىڭ ئۇنچە تاتلىق ئەمەسلىكىنى بايقايمىز. تۆۋەندە ئالما تاللاشتىكى بەزى چارىلەرنى تونۇشتۇرۇپ ئۆتىمىز.
رەڭگىگە قاراش
ئالمىنىڭ رەڭگى قانچە قىزىل بولسا تەمىنىڭ شۇنچە تاتلىق بولىدىغانلىقىدىن دېرەك بەرمەيدۇ. شۇڭا ئالما سېتىۋالغاندا سېرىقلىق ئىچىدىن قىزىللىقى بىلىنىپ تۇرىدىغان رەڭگى تەكشى، سىرتقى يۈزى بەك سىلىق بولمىغاننى تاللاش كېرەك، چۈنكى بۇنداق ئالما سۇلۇق ھەم تەملىك بولىدۇ.
مېۋە كىندىكىگە قاراش
ئالمىنىڭ مېۋە كىندىكى قانچە چوڭقۇر بولسا، ئالمىنىڭ شۇنچە تەملىك ئىكەنلىكىنى بىلدۈرىدۇ، شۇڭا ئالما سېتىۋالغاندا مېۋە كىندىكى چوڭقۇرراقنى تاللاش كېرەك.
ئالما ساپىقىغا قاراش
ئالما ساپىقى سۇس يېشىل رەڭدە بولسا، ئالمىنىڭ شاختىن ئۈزۈۋېلىنغىنىغا ئۇزۇن بولمىغانلىقىنى بىلدۈرىدۇ. ئالما ساپىقىنىڭ كۆزى قانچە چوڭقۇر بولسا ئالمىنىڭ شۇنچە تەملىك ئىكەنلىكىنى بىلدۈرىدۇ.