شەھەر ئىستېمالى سەھەر گېزىتى خەۋىرى. مۇخبىرنىڭ 11-ئاينىڭ 7-كۈنى خېجىڭ ناھىيەسى بايىنبۇلاق مەنزىرە رايونى باشقۇرۇش كومىتېتىدىن ئىگىلىشىچە، بايىنبۇلاق مەنزىرە رايونىدا بۇ يىل قىشتا ئىلگىرىكى يىللاردىكى قىشتا تىجارەت توختىتىشتەك ئەھۋال ئۆزگەرتىلىپ، 2018-يىلى 11-ئاينىڭ 1-كۈنىدىن 2019-يىلى 3-ئاينىڭ 30-كۈنىگىچە بولغان قىشلىق ساياھەت رەسمىي قوزغىتىلىدىكەن، بۇ مەزگىلدە ساياھەتچىلەرگە قارىتا كىرىش بېلىتىنى كەچۈرۈم قىلىش، كىرىش بېلىتىگە ئېتىبار بېرىش سىياسەتلىرى يولغا قويۇلىدىكەن.
قىشتا بايىنبۇلاق مەنزىرە رايونىدا ئوخشاشلا ئاق قۇلارنى كۆرگىلى بولىدۇ.
بايىنبۇلاق مەنزىرە رايونى قىشلىق ساياھەتنى تەرەققىي قىلدۇرۇشتا ئەۋزەل كىلىمات شارائىتى ھەمدە بايلىق ئەۋزەللىكىگە ئىگە. مەنزىرە رايونى تىيانشان تاغ تىزمىسىدىكى ئېگىز تاغ ئويمانلىقىغا جايلاشقان بولۇپ، دېڭىز يۈزىدىن ئوتتۇرىچە ئېگىزلىكى 2500 مېتىر كېلىدۇ، ھەر يىلى 10-ئايدا مۇددەتتىن بۇرۇن قىش پەسلىگە كىرىدۇ، ئۇزاققا سوزۇلغان قىش پەسلى بەش، ئالتە ئايغا يېتىدۇ.