ئۆز خەۋىرىمىز (مۇخبىر جى شياۋجېن، ياڭ كۇن) : 9-ئاينىڭ 14-كۈنى، كۆنچى دەرياسى مەنزىرە بەلبېغىدىكى كۆۋرۈكنىڭ تۆۋەنكى ئېقىنىدىكى غەربىي مەيدان ئەتراپىدىكى سۇ رايونىدا پەيلىرى قاردەك ئاپئاق ئاق قۇ ئويناقشىپ، نۇرغۇنلىغان شەھەر ئاھالىلىرىنى سۈرەتكە تارتىپ خاتىرە قالدۇرۇشقا جەلپ قىلدى. بۇ ئاققۇلار بۇلتۇرقىغا قارىغاندا كورلا شەھىرىگە بىر ھەپتە بۇرۇن ئۇچۇپ كەلگەن.
ئىگىلىنىشىچە، 2011-يىلى 5-ئايدا، كورلا شەھىرى كۆنچى دەرياسىدىكى كۆۋرۈكنىڭ تۆۋەنكى ئېقىنىغا كۆلىمى 2300 كىۋادرات مېتىر كېلىدىغان ئىككى سۈنئىي ئارال ـــ ئاق قۇ ئارىلىنى بەرپا قىلدى، ھەريىلى ئاق قۇ، ياۋا ئۆردەك، ئاق چايكا، قارنا قاتارلىق ياۋايى سۇ قۇشلىرى بۇ جايغا ماكانلىشىدۇ.
9-ئاينىڭ 16-كۈنى، كورلا شەھىرىگە يەنە ئىككى ئاق قۇ ئۇچۇپ كېلىپ، بالدۇر ئۇچۇپ كەلگەن ئاق قۇلارنىڭ سانى تۆتكە يەتكەن.