ئالدىنقى يېرىم يىلدا غۇلجا شەھىرىنىڭ سانائەت ئىقتىسادى تېز سۈرئەتتە ئاشتى

  ئۆز خەۋىرىمىز: مۇخبىرنىڭ 8-ئاينىڭ 9-كۈنى غۇلجا شەھەرلىك سودا ئۇچۇرلاشتۇرۇش كومىتېتىدىن ئىگىلىشىچە، 6-ئايغا قەدەر غۇلجا شەھىرىنىڭ يېزا ۋە يېزا دەرىجىلىكتىن يۇقىرى سانائەت قوشۇلما قىممىتى 1 مىليارد 70 مىليون يۈەن بولۇپ، بۇلتۇرقى ئوخشاش مەزگىلدىكىدىن ％33.50 ئاشقان، بۇنىڭ ئىچىدە، كۆلەمدىن يۇقىرى سانائەت كارخانىلىرىنىڭ سانائەت قوشۇلما قىممىتى 1 مىليارد 34 مىليون يۈەن بولۇپ، بۇلتۇرقى ئوخشاش مەزگىلدىكىدىن ％35.40 ئاشقان.

  بۇ يىل، غۇلجا شەھىرىدىكى نۇقتىلىق كارخانىلارنىڭ سانائەت قوشۇلما قىممىتىدىن قارىغاندا، ئىلى چۈەننىڭ بىيو تېخنىكا چەكلىك شىركىتى بۇ يىل 4-ئاينىڭ ئاخىرىدىن باشلاپ، بىرىنچى ۋە ئىككىنچى قارارلىق ئىشلەپچىقىرىش باسقۇچىدا تولۇق ئىشلەپچىقىرىشنى ئىشقا ئاشۇرغان بولۇپ، بۇلتۇرقى ئوخشاش مەزگىلدىكىدىن ％98.16 ئېشىپ، كۆلەمدىن يۇقىرى سانائەتنىڭ قوشۇلما قىممىتىگە روشەن تۈرتكە بولغان؛ ئەنچى ئېچىتقۇسى (ئىلى) مەسئۇلىيەت چەكلىك شىركىتىنىڭ جەمئىي ％15.38 ئاشقان؛ دۆلەت سېلىنمىسىدىكى ئىلى ئېنېرگىيە ئېچىش چەكلىك مەسئۇلىيەت شىركىتى غۇلجا شەھىرىدىكى ئىسسىقلىق بىلەن توكنى بىرلىكتە ئىشلەپچىقىرىدىغان ساھە بولۇش سۈپىتى بىلەن، مەھسۇلات قىممىتى ئاساسلىقى 1-ئايدىن 4-ئايغىچە بولغان مەزگىلگە مەركەزلەشكەن بولۇپ، مۇقىم سۈرئەتتە ئاشقان.

  قۇرۇلما جەھەتتىن قارىغاندا، غۇلجا شەھىرىنىڭ يېنىك سانائەت ئىقتىسادىنىڭ ئېشىش سۈرئىتى ئېغىر سانائەتنىڭكىدىن تېز بولغان. 6-ئايدا، غۇلجا شەھىرىنىڭ يېنىك سانائەت قوشۇلما قىممىتى 710 مىليون يۈەن بولۇپ، بۇلتۇرقى ئوخشاش مەزگىلدىكىدىن ％52.60 ئاشقان؛ ئېغىر سانائەت قوشۇلما قىممىتى 360 مىليون يۈەن بولۇپ، بۇلتۇرقى ئوخشاش مەزگىلدىكىدىن ％6.40 ئاشقان؛ ئىقتىساد تىپىدىن قارىغاندا، پاي تۈزۈمىدىكى كارخانىلارنىڭ قوشقان تۆھپىسى يەنىلا بىر قەدەر چوڭ بولغان، 6-ئايدا، پاي تۈزۈمىدىكى كارخانىلارنىڭ قوشۇلما قىممىتى 1 مىليارد يۈەن بولۇپ، بۇلتۇرقى ئوخشاش مەزگىلدىكىدىن ％39.10 ئاشقان.