ياپونىيە پاناسونىك شىركىتى يېقىندا بىر تۈرلۈك يېڭى تېخنىكىنى ئېلان قىلدى، بۇ تېخنىكا ئارقىلىق ئايرودۇرۇمدا يولۇچىنىڭ پاسپورتىغا قارىتا «چىراي پەرقلەندۈرۈش»نى ئەمەلگە ئاشۇرۇپ، چېگرادىن كىرىش-چىقىش رەسمىيىتىنى ئاددىيلاشتۇرۇشقا بولىدىكەن.
بۇ تېخنىكا بۇ يىل ئۆكتەبىردە ئالدى بىلەن توكيو نارىتا ئايرودرومىدا ئىشلىتىلگەن بولۇپ، 2018-يىلىدىن باشلاپ باشقا ئايرودۇرۇملارغا داۋاملىق كېڭەيتىش پىلانلانغان. «ئادەم يۈزىنى پەرق ئېتىش» ئېلېكتىرونلۇق ئىشىك ئارقىلىق چېگرادىن كىرىپ-چىقىش رەسمىيىتىنى بىجىرگەندە يولۇچىلار پەقەت پاسپورتىنى يېنىدىكى پەرق ئېتىش ماشىنىسىغا قويۇپ، ئۆزىنىڭ يۈزىنى پەرق ئېتىش ماشىنىسىدىكى ئەينەككە قاراپ پەرقلەندۈرسىلا رەسمىيەتلەرنى بېجىرىپ بولىدىكەن.
پەرق ئېتىش ماشىنىسى پاسپورتنىڭ ئىچكى قىسمىغا ئورۇنلاشتۇرۇلغان IC ئۆزەكتىكى يۈز قىسمى سۈرىتىنى يولۇچىلارنىڭ يۈز قىسمى بىلەن سېلىشتۇرۇپ، ئەگەر ئىككىسى بىردەك بولسىلا ئېلېكترونلۇق ئىشىك ئاپتوماتىك ئېچىلىدىكەن.
پاناسونىك شىركىتى يەنە سۈرەت توغرىلاش تېخنىكىسى قاتارلىقلارنى بۇ ماشىنىغا قوللانغان بولۇپ، گەرچە يېشى چوڭ، گىرىم قىلغان ياكى چاچ شەكلىنى ئۆزگەرتكەن بولسىمۇ پەرق ئېتىش ماشىنىسى يەنىلا پەرق ئېتەلەيدىكەن.