شىنجاڭ تورى خەۋىرى: باش قىش كىرىپلا ئۈرۈمچىنىڭ ھاۋارايىدا ئۆزگىرىش بولۇشقا باشلىدى. بولۇپمۇ بۇ بىر قانچە كۈندە ئاسماننى بۇلۇت قاپلاپ، سوغۇق شامال چىقىشقا باشلىدى، ئاز بولمىغان كىشىلەر قىشلىق كىيىملىرىنى كىيىۋالدى. 16-نويابىر ياغىدىغان ئازراق ياكى ئوتتۇراھال قارنىڭ تەسىرىدە ئۈرۈمچىدە رەسمىي قىش كىرىدىغان بولۇپ، تېمپېراتۇرامۇ بارا-بارا چۈشىدىكەن.
مېتېئورولوگىيە مۇتەخىسىسلىرىنىڭ تونۇشتۇرۇشىچە، ھاۋارايى ئاتموسفېرا ئايلانما ئېقىمىنىڭ تەڭشىلىشىگە ئەگىشىپ، بۇ مەزگىلدە سوغۇق ھاۋا ئېقىمىنىڭ ھەرىكىتى بارا-بارا جانلىنىپ، قار-يامغۇر كۆپ يېغىشقا باشلايدىكەن، تېمپېراتۇرامۇ بارغانسېرى چۈشىدىكەن. ئۈرۈمچى شەھەرلىك مېتېئورولوگىيە ئىستانسىسى تارقاتقان بىر ھەپتىلىك ھاۋارايىدىن بېرىلگەن ئالدىن مەلۇماتتا كۆرسىتىلىشىچە، پەيشەنبە كۈنى مەركىزىي شەھەردە كۆرۈنەرلىك قار-يامغۇر يېغىپ تېمپېراتۇرا تۆۋەنلەيدىكەن.
مۆلچەرلىنىشىچە، 16-نويابىر چۈشتىن كېيىندىن كېچىگىچە، مىچۈەن-كۆكتاغ رايونىدا يامغۇر ئارىلاش قار ياكى ئوتتۇراھال قار ياغىدىكەن، جەنۇبىي شەھەر ئەتراپى ۋە تاغلىق رايونلاردا ئوتتۇراھال ياكى قاتتىق قار ياغىدىكەن.