مۇنبەر خەۋەر تېرمىنالى مەخسۇس سەھىپە دېھقانلار تورى يانفون گېزىتى ئۈندىدار سالونى
    نىزاملار

    ‹‹جۇڭگو كوممۇنىستىك پارتىيەسى يەرلىك كومىتېتلىرىنىڭ خىزمەت نىزامى››

    ئامانگۈل2016-05-08 12:05:49شىنجاڭ گېزىتى

       1 – باب ئومۇمىي پىرىنسىپ

       1 – ماددا پارتىيەنى ئومۇميۈزلۈك قاتتىق باشقۇرۇش تەلىپىنى ئەمەلىيلەشتۈرۈپ، پارتىيەنىڭ يەرلىك كومىتېتلىرىنىڭ خىزمىتىنى كۈچەيتىپ ۋە ياخشىلاپ، پارتىيەنىڭ ھاكىمىيەت يۈرگۈزۈش ئىقتىدارى ۋە رەھبەرلىك سەۋىيەسىنى ئۆستۈرۈپ، پارتىيەنىڭ ھاكىمىيەت يۈرگۈزۈش نىشانىغا يېتىشكە تۈرتكە بولۇش ئۈچۈن، ‹‹جۇڭگو كوممۇنىستىك پارتىيەسى نىزامنامىسى››غا ئاساسەن مەزكۇر نىزام تۈزۈپ چىقىلدى.

       2 – ماددا مەزكۇر نىزام پارتىيەنىڭ ئۆلكە، ئاپتونوم رايون، بىۋاسىتە قاراشلىق شەھەر، رايون تەسىس قىلىنغان شەھەر ۋە ئاپتونوم ئوبلاست، ناھىيە (خوشۇن)، ئاپتونوم ناھىيە، رايون تەسىس قىلىنمىغان شەھەر ۋە شەھەرگە قاراشلىق رايونلۇق كومىتېتلىرى ۋە ئۇنىڭ دائىمىي كومىتېتلىرىغا تەتبىقلىنىدۇ.

       3 – ماددا پارتىيەنىڭ يەرلىك كومىتېتلىرى ئۆز رايونىدا ئومۇمىيەتنى كۆزلەش، تەرەپلەرنى ماسلاشتۇرۇش رەھبەرلىك يادروسىلىق رولىنى جارى قىلدۇرۇپ، ‹‹تۆت ئومۇميۈزلۈك›› ئىستراتېگىيەلىك ئورۇنلاشتۇرمىسىنى ماس ئىلگىرى سۈرۈش تەلىپىگە ئاساسەن، ئۆز رايونىنىڭ ئىقتىسادىي، سىياسىي، مەدەنىيەت، جەمئىيەت، ئېكولوگىيە مەدەنىيلىكى قۇرۇلۇشىغا ئومۇميۈزلۈك رەھبەرلىك قىلىدۇ، ئۆز رايونىنىڭ پارتىيە قۇرۇلۇشىغا ئومۇميۈزلۈك مەسئۇل بولىدۇ.

       4 – ماددا پارتىيەنىڭ يەرلىك كومىتېتلىرى خىزمەتلەردە تۆۋەندىكى پىرىنسىپقا ئەمەل قىلىشى شەرت:

    (1) جۇڭگوچە سوتسىيالىزم بايرىقىنى ئېگىز كۆتۈرۈپ، پارتىيەنىڭ نەزەرىيە، لۇشيەن، فاڭجېن، سىياسەتلىرىنى قەتئىي ئەمەلىيلەشتۈرۈش.

    (2) مەۋقەنى ئومۇم ئۈچۈن پارتىيە قۇرۇش، خەلق ئۈچۈن ھاكىمىيەت يۈرگۈزۈشكە قويۇپ، پارتىيەنىڭ ئاساسىي مەقسىتى ۋە ئاممىۋى لۇشيەنىنى ئەستايىدىل ئەمەلىيەتتە كۆرسىتىش.

    (3) ئىدىيەدە ئازاد بولۇش، ھەقىقەتنى ئەمەلىيەتتىن ئىزدەش، دەۋر بىلەن تەڭ ئىلگىرىلەش، ئەمەلىيەتچىل، راستچىل بولۇشتا چىڭ تۇرۇپ، ئۆز رايونىنىڭ ئەمەلىيىتىگە بىرلەشتۈرگەن ھالدا خىزمەتلەرنى ئىجادىي قانات يايدۇرۇش.

    (4) دېموكراتىيە – مەركەزلەشتۈرۈش تۈزۈمىدە چىڭ تۇرۇپ، پارتىيەنىڭ يەرلىك كومىتېتلىرى رەھبەرلىك كوللېكتىپىنىڭ ھاياتىي كۈچى ۋە پارتىيەنىڭ ئىتتىپاقلىقى، بىرلىكىنى كۈچەيتىش.

    (5) پارتىيە پارتىيەنى باشقۇرۇش، پارتىيەنى قاتتىق باشقۇرۇشتا چىڭ تۇرۇپ، پارتىيەنىڭ ئىلغارلىقى ۋە ساپلىقىنى باشتىن – ئاخىر ساقلاش.

    ( 6) ئاساسىي قانۇن ۋە قانۇنلار دائىرىسىدە پائالىيەت قىلىشتا چىڭ تۇرۇپ، پارتىيە نىزامنامىسى ۋە پارتىيە ئىچىدىكى باشقا نىزام – بەلگىلىمىلەرگە ئاساسەن مەسئۇلىيىتىنى ئادا قىلىش.

       5 – ماددا پارتىيەنىڭ يەرلىك كومىتېتلىرى ئاساسلىقى سىياسىي، ئىدىيە ۋە تەشكىلىي رەھبەرلىكنى يولغا قويۇپ، يۆنىلىشنى بېكىتىپ، ئومۇمىيەتنى ئىدارە قىلىپ، تەدبىر بەلگىلەپ، ئەمەلىيلەشتۈرۈشكە كاپالەتلىك قىلىدۇ.

    (1) ئۆز رايونىدىكى زور مەسىلىلەر توغرىسىدا تەدبىر بەلگىلەيدۇ.

    (2) قانۇندا بەلگىلەنگەن تەرتىپ بويىچە پارتىيە تەشكىلاتىنىڭ تەشەببۇسىنى يەرلىك نىزام، يەرلىك ھۆكۈمەتنىڭ قائىدىسى ياكى باشقا مەمۇرىي بۇيرۇققا ئايلاندۇرىدۇ.

    (3) ئۆز رايونىنىڭ تەشۋىقات، ئىدىيە، مەدەنىيەت خىزمىتىگە بولغان رەھبەرلىكنى كۈچەيتىپ، ئىدېئولوگىيە خىزمىتىگە رەھبەرلىك قىلىش ھوقۇقى، سۆز ھوقۇقىنى پۇختا ئىگىلەيدۇ.

    (4) كادىرلارنى باشقۇرۇش ھوقۇق چېكى بويىچە كادىرلارنى ۋەزىپىگە تەيىنلەيدۇ، ۋەزىپىسىدىن قالدۇرىدۇ، يەرلىكتىكى دۆلەت ئورگانلىرى، سىياسىي كېڭەش تەشكىلاتى، خەلق تەشكىلاتلىرى، دۆلەت كارخانىلىرى، كەسپىي ئورۇنلار قاتارلىقلارغا مۇھىم كادىرلارنى تەۋسىيە قىلىدۇ.

    (5) خەلق قۇرۇلتىيى، ھۆكۈمەت، سىياسىي كېڭەش، سوت مەھكىمىسى، تەپتىش مەھكىمىسى، خەلق تەشكىلاتلىرى قاتارلىقلارنىڭ قانۇن ۋە نىزامنامە بويىچە خىزمەتلەرنى مۇستەقىل مەسئۇل بولۇش، بىردەك ماسلاشتۇرۇش ئاساسىدا ئىشلىشىنى قوللايدۇ ۋە كاپالەتلەندۈرىدۇ، بۇ تەشكىلاتلاردىكى پارتىيە گۇرۇپپىلىرىنىڭ رەھبەرلىك يادروسىلىق رولىنى جارى قىلدۇرىدۇ.

    (6) ئۆز رايونىنىڭ ئاممىۋى تەشكىلاتلار خىزمىتى ۋە بىرلىك سەپ خىزمىتىگە بولغان رەھبەرلىكنى كۈچەيتىدۇ.

    (7) تەۋەلىكىدىكى پارتىيە تەشكىلاتلىرى، پارتىيە ئەزالىرىنى سەپەرۋەر قىلىپ ۋە تەشكىللەپ، ئاممىنى پارتىيەنىڭ نىشان – ۋەزىپىلىرىنى ئورۇنداشقا ئىتتىپاقلاشتۇرىدۇ ۋە يېتەكلەيدۇ.

       2 – باب تەشكىللىنىشى ۋە ئەزالىرى

       6 – ماددا پارتىيەنىڭ يەرلىك كومىتېتلىرى تەڭ دەرىجىلىك پارتىيە قۇرۇلتىيىدا سايلام ئارقىلىق ۋۇجۇدقا كېلىدۇ، كومىتېت ئەزالىرى ۋە كاندىدات ئەزالىرىدىن تەشكىللىنىدۇ، ۋەزىپە ئۆتەش مۇددىتى بەش يىل بولىدۇ.

    پارتىيەنىڭ يەرلىك كومىتېتلىرىنىڭ دائىمىي كومىتېتى (دائىمىي كومىتېت دەپ قىسقارتىپ ئېلىندى) پارتىيەنىڭ يەرلىك كومىتېتلىرىنىڭ ئومۇمىي يىغىنى (قىسقارتىپ ئومۇمىي يىغىن دەپ ئېلىندى)دا سايلام ئارقىلىق ۋۇجۇدقا كېلىدۇ، ئۇ پارتىيەنىڭ يەرلىك كومىتېتلىرىنىڭ شۇجىسى، مۇئاۋىن شۇجىلىرى ۋە دائىمىي كومىتېتنىڭ باشقا ئەزالىرىدىن تەشكىللىنىدۇ.

       7 – ماددا پارتىيەنىڭ يەرلىك كومىتېتلىرىنىڭ ئەزالىرى، كاندىدات ئەزالىرى ۋەكىللىك خاراكتېرىگە ئىگە بولۇشى، پارتىيە ئىستاژى، يېشى، جىنسى، كەسپى قاتارلىق تەرەپلەردىكى تەلەپلەرگە ئۇيغۇن كېلىشى كېرەك. نامزاتلار شۇجى، مۇئاۋىن شۇجى ۋە دائىمىي كومىتېتنىڭ باشقا ئەزالىرىنى ئۆز ئىچىگە ئېلىشى، ئادەتتە يەنە تەڭ دەرىجىلىك ھۆكۈمەت رەھبەرلىك بەنزىسىنىڭ ئەزالىرى، تەڭ دەرىجىلىك خەلق قۇرۇلتىيى دائىمىي كومىتېتى، سىياسىي كېڭەش، سوت مەھكىمىسى، تەپتىش مەھكىمىسىنىڭ ئاساسلىق مەسئۇللىرى، تەڭ دەرىجىلىك پارتكوم ۋە ھۆكۈمەتنىڭ ئالاقىدار تارماقلىرىنىڭ ئاساسلىق مەسئۇللىرى، تەڭ دەرىجىلىك ئىشچىلار ئۇيۇشمىسى، كوممۇنىستىك ياشلار ئىتتىپاقى، ئاياللار بىرلەشمىسىنىڭ ئاساسلىق مەسئۇللىرى، بىر دەرىجە تۆۋەن پارتكوم ۋە ھۆكۈمەتنىڭ ئاساسلىق مەسئۇللىرى شۇنداقلا ماس نىسبەتتە ئاساسىي قاتلام پارتىيە ئەزالىرىنى ئۆز ئىچىگە ئېلىشى كېرەك.

    پارتىيەنىڭ يەرلىك كومىتېتلىرىنىڭ ۋەزىپە ئۆتەش مۇددىتى ئىچىدە ئەزالىرى كېمەيگەن ئەھۋالدا، كاندىدات ئەزالىرى ئىچىدىن ئېرىشكەن ئاۋازنىڭ ئاز – كۆپلۈكى بويىچە تەرتىپ بىلەن تولۇقلىنىدۇ، تولۇقلانغاندىن كېيىنمۇ كەم قالغانلىرىنى پارتىيە قۇرۇلتىيى ياكى پارتىيە يىغىنى ئېچىپ تولۇقلاپ سايلاشقا بولىدۇ.

    ئۆز رايونىدىن يۆتكىلىپ كېتىش، خىزمىتىدىن ئىستېپا بېرىش، پېنسىيەگە چىقىش قاتارلىق سەۋەبلەر تۈپەيلىدىن پارتكومنىڭ ئەزاسى، كاندىدات ئەزاسىلىق ۋەزىپىسىنى داۋاملىق ئۆتەشكە ماس كەلمىگەنلەر ئىستېپا بېرىدۇ ياكى تۇرۇشلۇق يەرلىك پارتكوم تەرتىپ بويىچە دائىمىي كومىتېت ئەزاسى، كاندىدات ئەزاسىلىق ۋەزىپىسىدىن قالدۇرىدۇ. ۋاپات بولغانلار، دۆلەت تەۋەلىكىنى يوقاتقانلار، جىنايى ئىشلار جاۋابكارلىقى سۈرۈشتۈرۈلگەنلەر، پارتىيەلىكى توختىتىلغانلار، پارتىيەدە قالدۇرۇپ سىناشتىن يۇقىرى پارتىيە ئىنتىزام جازاسى بېرىلگەنلەرنىڭ ئەزالىق، كاندىدات ئەزالىق ۋەزىپىسى ئۆزلۈكىدىن ئاخىرلىشىدۇ. ئەزالىق، كاندىدات ئەزالىق ۋەزىپىسىدىن ئىستېپا بەرگەنلەر، قالدۇرۇلغانلار ياكى ئەزالىق ۋە كاندىدات ئەزالىق ۋەزىپىسى ئۆزلۈكىدىن ئاخىرلاشقانلار بىر دەرىجە يۇقىرى پارتكومغا مەلۇم قىلىنىپ رويخەتكە ئېلىنىدۇ. ھەقىقەتەن زۆرۈر بولغاندا، بىر دەرىجە يۇقىرى پارتكوم بىر دەرىجە تۆۋەن پارتكومنىڭ ئەزالىرىنى، كاندىدات ئەزالىرىنى تەيىنلىسە ۋە قالدۇرسا بولىدۇ.

       8 – ماددا دائىمىي كومىتېت ئەزالىرىنى سەپلەشنى يۇقىرى دەرىجىلىك پارتكوم خىزمەت ئېھتىياجىغا ئاساسەن، دېموكراتىيە – مەركەزلەشتۈرۈش تۈزۈمىنى ئىجرا قىلىش، كېڭىشىش، تەدبىر بەلگىلەش سەۋىيەسىنى ئۆستۈرۈشكە پايدىلىق بولۇش پىرىنسىپى بويىچە قارار قىلىدۇ. دائىمىي كومىتېت ئەزالىرىنىڭ سانى ئۆلكە دەرىجىلىكنىڭ 11 دىن 13 كىچە، شەھەر، ناھىيە دەرىجىلىكنىڭ 9 دىن 11 گىچە بولىدۇ، ئايرىم جايلار ئېھتىياجىغا قاراپ مۇۋاپىق كۆپەيتسە ياكى كېمەيتسە بولىدۇ، پارتىيە مەركىزىي كومىتېتى قارار قىلىدۇ ياكى ئۆلكە دەرىجىلىك پارتكوم مەركەزنىڭ روھىغا ئاساسەن تەكشۈرۈپ تەستىقلايدۇ.

    پارتىيەنىڭ يەرلىك كومىتېتلىرىدا بىر شۇجى، ئىككى مۇئاۋىن شۇجى تەسىس قىلىنىدۇ، ئايرىم مىللىي ئاپتونومىيەلىك جايلاردا ئېھتىياجىغا قاراپ مۇئاۋىن شۇجىلىق ۋەزىپە ئورنىنى مۇۋاپىق كۆپەيتىشكە بولىدۇ، پارتىيە مەركىزىي كومىتېتى قارار قىلىدۇ ياكى ئۆلكە دەرىجىلىك پارتكوم مەركەزنىڭ روھىغا ئاساسەن تەكشۈرۈپ تەستىقلايدۇ.

    پارتىيەنىڭ يەرلىك كومىتېتلىرى نۆۋەت ئالماشقاندا، شۇجى، مۇئاۋىن شۇجى ۋە دائىمىي كومىتېتنىڭ باشقا ئەزالىرى ئومۇمىي يىغىندا سايلام ئارقىلىق ۋۇجۇدقا كېلىدۇ ھەم بىر دەرىجە يۇقىرى پارتكومنىڭ تەستىقلىشىغا سۇنۇلىدۇ. يېڭىدىن سايلانغان شۇجى، مۇئاۋىن شۇجى ۋە دائىمىي كومىتېتنىڭ باشقا ئەزالىرى ئادەتتە بىر نۆۋەت ۋەزىپە ئۆتەيدۇ. پارتىيە قۇرۇلتىيى يېپىق مەزگىلدە، يۇقىرى دەرىجىلىك پارتكوم خىزمەت ئېھتىياجىغا ئاساسەن تۆۋەن دەرىجىلىك پارتكومنىڭ شۇجىسى، مۇئاۋىن شۇجىسى ۋە دائىمىي كومىتېتنىڭ باشقا ئەزالىرىنى يۆتكىسە، تەيىنلىسە ۋە قالدۇرسا بولىدۇ، سانى ۋەزىپە ئۆتەش مۇددىتى ئىچىدە ئادەتتە دائىمىي كومىتېت ئەزالىرىنىڭ ئىككىدىن بىر قىسمىدىن ئېشىپ كەتسە بولمايدۇ.

       3 – باب خىزمەت مەسئۇلىيىتى

       9 – ماددا پارتىيەنىڭ يەرلىك كومىتېتلىرى پارتىيە قۇرۇلتىيى يېپىق مەزگىلىدە يۇقىرى دەرىجىلىك پارتىيە تەشكىلاتىنىڭ يوليورۇقى ۋە تەڭ دەرىجىلىك پارتىيە قۇرۇلتىيىنىڭ قارارى، بېكىتمىسىنى ئىجرا قىلىدۇ، ئۆز رايونىنىڭ خىزمەتلىرىگە رەھبەرلىك قىلىدۇ.

    پارتىيەنىڭ يەرلىك كومىتېتلىرى ئومۇمىي يىغىن ئېچىش ئارقىلىق تۆۋەندىكىدەك خىزمەت مەسئۇلىيەتلىرىنى ئادا قىلىشقا ھەقلىق:

    (1) پارتىيە مەركىزىي كومىتېتى ۋە يۇقىرى دەرىجىلىك پارتىيە تەشكىلاتىنىڭ تەدبىر، ئورۇنلاشتۇرمىلىرى ۋە تەڭ دەرىجىلىك پارتىيە قۇرۇلتىيىنىڭ قارارى، بېكىتمىسىنى ئىزچىللاشتۇرۇش، ئىجرا قىلىشتىكى مۇھىم تەدبىرلەرنى تۈزۈش.

    (2) ئۆز رايونىنىڭ ئىقتىسادىي، ئىجتىمائىي تەرەققىيات ئىستراتېگىيەسى، زور ئىسلاھات تۈرلىرى، زور خەلق تۇرمۇشى كاپالىتى قاتارلىق ئىقتىسادىي، ئىجتىمائىي تەرەققىياتقا دائىر زور مەسىلىلەرنى مۇزاكىرە قىلىش ۋە بېكىتىش.

    (3) ئۆز رايونىنىڭ پارتىيە قۇرۇلۇشىغا دائىر زور مەسىلىلەرنى مۇزاكىرە قىلىش ۋە بېكىتىش، پارتىيە ئىچىدىكى مۇھىم قائىدە – نىزام ياكى قائىدە خاراكتېرلىك ھۆججەتلەرنى قاراپ چىقىپ ماقۇللاش.

    (4) تەڭ دەرىجىلىك پارتىيە قۇرۇلتىيى ياكى پارتىيە يىغىنىنى ئېچىشنى بېكىتىش ھەم تەكلىپلەرگە ئالدىن قاراپ چىقىش ۋە پىكرىنى ئوتتۇرىغا قويۇش.

    (5) دائىمىي كومىتېتنىڭ خىزمەت دوكلاتى ياكى مەخسۇس خىزمەت دوكلاتىنى ئاڭلاش ۋە ئۇنىڭغا قاراپ چىقىش.

    (6) شۇجى، مۇئاۋىن شۇجى ۋە دائىمىي كومىتېتنىڭ باشقا ئەزالىرىنى سايلاش؛ پارتىيەنىڭ تەڭ دەرىجىلىك ئىنتىزام تەكشۈرۈش كومىتېتىنىڭ ئومۇمىي يىغىنىدا سايلام ئارقىلىق ۋۇجۇدقا كەلگەن شۇجى، مۇئاۋىن شۇجى ۋە دائىمىي كومىتېتنىڭ باشقا ئەزالىرىنى ماقۇللاش.

    (7) پارتكومنىڭ دائىمىي كومىتېت ئەزالىرىنى تولۇقلاپ سايلاشنى قارار قىلىش؛ پارتكومنىڭ ئەزاسى، كاندىدات ئەزاسىلىق ۋەزىپىسىدىن ئىستېپا بېرىش ياكى قالدۇرۇشنى تەستىقلاش؛ بىر دەرىجە تۆۋەن پارتىيە تەشكىلاتىنى قايتىدىن تەشكىللەش ياكى تارقىتىۋېتىشنى قارار قىلىش؛ پارتكوم ئەزالىرى، كاندىدات ئەزالىرىغا پارتىيە ئىچىدىكى ۋەزىپىسىدىن قالدۇرۇشتىن يۇقىرى ئىنتىزام جازاسى بېرىشنى بېكىتىش ياكى مۇئەييەنلەشتۈرۈش.

    (8) ئۆز رايونىنىڭ مەمۇرىي رايونلىرىنى ئايرىش، تەڭشەش شۇنداقلا ئالاقىدار پارتىيە، ھۆكۈمەت، جامائەت ئاپپاراتلىرىنى تەسىس قىلىش، ئۆزگەرتىش ۋە ئەمەلدىن قالدۇرۇش لايىھەسىنى تەتقىق قىلىش ۋە مۇزاكىرە قىلىش.

    (9) دائىمىي كومىتېت قارار چىقىرىشقا سۇنغان ئىشلار ياكى ئومۇمىي يىغىندا بېكىتىلمەكچى بولغان باشقا ئىشلار توغرىسىدا قارار چىقىرىش.

       10 – ماددا ئومۇمىي يىغىن يېپىق مەزگىلدە، دائىمىي كومىتېت پارتىيەنىڭ يەرلىك كومىتېتلىرىنىڭ خىزمەت ھوقۇقىنى يۈرگۈزىدۇ، دائىمىي خىزمەتلەرگە رىياسەتچىلىك قىلىدۇ. ئۇنىڭ ئاساسلىق مەسئۇلىيىتى:

    (1) ئومۇمىي يىغىن ئېچىپ، ئومۇمىي يىغىنغا خىزمىتىدىن دوكلات بېرىدۇ ھەم نازارەتچىلىكنى قوبۇل قىلىدۇ؛ ئومۇمىي يىغىننىڭ مۇزاكىرە قىلىشى ۋە قارار قىلىشىغا سۇنۇلىدىغان ئىشلارغا ئالدىن قاراپ چىقىدۇ ۋە پىكرىنى ئوتتۇرىغا قويىدۇ.

    (2) يۇقىرى دەرىجىلىك پارتىيە تەشكىلاتىنىڭ تەدبىر – ئورۇنلاشتۇرمىلىرى ۋە ئومۇمىي يىغىننىڭ قارار، بېكىتمىلىرىنى تەشكىللەپ يولغا قويىدۇ.

    (3) يۇقىرى دەرىجىلىك پارتىيە تەشكىلاتىغا خىزمىتىدىن دوكلات بېرىدۇ، ئۇنىڭدىن يوليورۇق سورايدۇ، تۆۋەن دەرىجىلىك پارتىيە تەشكىلاتى يوليورۇق سورىغان، دوكلات قىلغان مۇھىم ئىشلارنى مۇزاكىرە قىلىدۇ ۋە بېكىتىدۇ.

    (4) ئۆز رايونىنىڭ ئىقتىسادىي، ئىجتىمائىي تەرەققىياتى ۋە تەشۋىقات، ئىدىيە، مەدەنىيەت خىزمىتى، تەشكىلات خىزمىتى، ئىنتىزام تەكشۈرۈش خىزمىتى، ئاممىۋى خىزمەت، بىرلىك سەپ خىزمىتى، سىياسىي – قانۇن خىزمىتى قاتارلىق دائىملىق خىزمەتلەرگە دائىر مۇھىم مەسىلىلەر توغرىسىدا قارار چىقىرىدۇ.

    (5) ئالاقىدار بەلگىلىمە بويىچە كادىرلارنى تەۋسىيە قىلىدۇ، نامزاتلىققا كۆرسىتىدۇ، ۋەزىپىگە تەيىنلەيدۇ ۋە ۋەزىپىدىن قالدۇرىدۇ. زۆرۈر بولغاندا، مۇھىم كادىرلارنى ۋەزىپىگە تەيىنلەش ۋە ۋەزىپىدىن قالدۇرۇشتا پارتكوم ئەزالىرىنىڭ پىكرىنى ئالىدۇ؛ كادىرلارغا تەربىيە بېرىدۇ، ئۇلارنى باشقۇرىدۇ ۋە نازارەت قىلىدۇ؛ پارتىيەلىك كادىرلارغا ئىنتىزام جازاسى بېرىشكە دائىر ئىشلارنى مۇزاكىرە قىلىپ قارار قىلىدۇ.

    (6) دائىمىي كومىتېت بېكىتكەن باشقا مۇھىم ئىشلار توغرىسىدا قارار چىقىرىدۇ.

       11 – ماددا پارتكوم شۇجىسى پارتىيەنىڭ يەرلىك كومىتېتلىرىنىڭ ئومۇمىي خىزمىتىگە رىياسەتچىلىك قىلىپ، دائىمىي كومىتېتنىڭ پائالىيەتلىرىنى تەشىكىللەيدۇ، دائىمىي كومىتېت ئەزالىرىنىڭ خىزمىتىنى ماسلاشتۇرىدۇ، پارتكومنىڭ خىزمەتلىرىگە ئاساسلىق مەسئۇل بولىدۇ.

    ھۆكۈمەتنىڭ ئاساسلىق مەسئۇللۇقىنى ئۈستىگە ئالغان پارتكومنىڭ مۇئاۋىن شۇجىسى ھۆكۈمەتنىڭ ئومۇمىي خىزمىتىگە رىياسەتلىك قىلىدۇ، ھۆكۈمەت پارتگۇرۇپپىسىنىڭ پائالىيەتلىرىنى تەشكىللەيدۇ. ھۆكۈمەتتە ۋەزىپە ئۆتىمەيدىغان پارتكومنىڭ مۇئاۋىن شۇجىسى ئاساسلىقى شۇجىنىڭ پارتىيە قۇرۇلۇشىنى تۇتۇشىغا ماسلىشىدۇ، شۇنىڭ بىلەن بىللە، ئېھتىياجغا قاراپ باشقا خىزمەتلەرنى ماسلاشتۇرىدۇ ۋە ئۇنىڭغا مەسئۇل بولىدۇ.

    دائىمىي كومىتېتنىڭ باشقا ئەزالىرى ئىش تەقسىماتىغا ئاساسەن ئالاقىدار خىزمەتلەرگە مەسئۇل بولۇپ، مەسئۇل بولغان ساھە بويىچە پارتىيەنى قاتتىق باشقۇرۇش مەسئۇلىيىتىنى ئادا قىلىدۇ.

       12 – ماددا پارتىيەنىڭ يەرلىك كومىتېتلىرى مەسئۇلىيەت تىزىملىكى تۈزۈمىنى تۇرغۇزۇپ، دائىمىي كومىتېت ۋە ئۇنىڭ ئەزالىرىنىڭ مەسئۇلىيىتىنى ئايدىڭلاشتۇرۇشى ھەم مۇئەييەن دائىرە ئىچىدە ئاشكارىلىشى شەرت.

      13 – ماددا پارتىيەنىڭ يەرلىك كومىتېتلىرى پارتىيەنى ئومۇميۈزلۈك قاتتىق باشقۇرۇشتىكى سۇبيېكتلىق مەسئۇلىيىتىنى ئەستايىدىل ئادا قىلىشى، شۇجى پارتىيە قۇرۇلۇشىنى تۇتۇشتىكى بىرىنچى مەسئۇللۇق مەسئۇلىيىتىنى ئادا قىلىشى شەرت. دائىمىي كومىتېت قەرەللىك ھالدا پارتىيە قۇرۇلۇشى خىزمىتىنى مۇزاكىرە قىلىپ، ئومۇمىي يىغىن ۋە بىر دەرىجە يۇقىرى پارتكومغا پارتىيە قۇرۇلۇشى خىزمىتىنى ھەر يىلى ئاز دېگەندىمۇ بىر قېتىم مەخسۇس تېمىدا دوكلات قىلىشى شەرت. پارتىيە قۇرۇلۇشى خىزمىتى رەھبەرلىك گۇرۇپپىسىنىڭ فۇنكسىيەلىك رولىنى تولۇق جارى قىلدۇرۇشى كېرەك. ئاساسىي قاتلام پارتىيە تەشكىلاتلىرىنىڭ قۇرۇلۇشىنى كۈچەيتىپ، شەھەر، ناھىيە ئىككى دەرىجىلىك پارتكوم شۇجىلىرىنىڭ ئاساسىي قاتلام پارتىيە قۇرۇلۇشى خىزمىتىنى باھالاش تۈزۈمىنى يولغا قويۇپ، پارتىيە قۇرۇلۇشى خىزمىتىنى باھالاشقا دائىر ئۇنىۋېرسال باھالاش سىستېمىسىنى مۇكەممەللەشتۈرۈپ، پارتىيە قۇرۇلۇشىغا دائىر تۈرلۈك ئورۇنلاشتۇرمىلارنى ھەقىقىي ئەمەلىيلەشتۈرۈشكە كاپالەتلىك قىلىشى شەرت.

    پارتىيەنىڭ يەرلىك كومىتېتلىرى پارتىيە ئىستىلى، پاكلىق قۇرۇلۇشىدىكى سۇبيېكتلىق مەسئۇلىيىتىنى ئەستايىدىل ئادا قىلىپ، ئىنتىزام تەكشۈرۈش ئورگانلىرىنىڭ نازارەت قىلىش مەسئۇلىيىتىنى ئادا قىلىشىغا رەھبەرلىك قىلىپ ۋە ئۇنى قوللاپ، ئىنتىزام قانۇننىڭ ئالدىدا تۇرۇش، ئىنتىزام قانۇندىن قاتتىق بولۇشتا چىڭ تۇرۇپ، پارتىيە ئىنتىزامىنى قەتئىي ئىجرا قىلىپ، چىرىكلىشىشكە جۈرئەت قىلالماسلىق، چىرىكلىشەلمەسلىك، چىرىكلىشىشنى خالىماسلىقتەك پاك ھاكىمىيەت يۈرگۈزۈش مۇھىتىنى شەكىللەندۈرۈشكە تۈرتكە بولۇشى شەرت.

       14 – ماددا پارتىيەنىڭ يەرلىك كومىتېتلىرى ۋە ئۇنىڭ ئەزالىرى ئىدىيە، سىياسىي قۇرۇلۇشنى كۈچەيتىپ، ئۆزىنى ماركسىزم، لېنىنىزم، ماۋ زېدۇڭ ئىدىيەسى، جۇڭگوچە سوتسىيالىزم نەزەرىيە سىستېمىسى بىلەن قوراللاندۇرۇشى، باش شۇجى شى جىنپىڭنىڭ مۇھىم سۆزىنىڭ روھىنى چوڭقۇر ئۆگىنىپ ۋە ئىزچىللاشتۇرۇپ، غايە – ئېتىقادىنى چىڭىتىپ، سىياسىي ئىنتىزام ۋە سىياسىي قائىدىگە رىئايە قىلىشى شەرت. پارتىيە ئىچىدىكى سىياسىي تۇرمۇشنى چىڭىتىپ، بەلگىلىمە بويىچە دېموكراتىك تۇرمۇش يىغىنى ۋە تەشكىلىي تۇرمۇش يىغىنىغا قاتنىشىشى شەرت. مەركەزنىڭ خىزمەت ئىستىلىنى ياخشىلاش، ئامما بىلەن زىچ ئالاقە ئورنىتىش توغرىسىدىكى بەلگىلىمىسىنى قەتئىي ئەمەلىيلەشتۈرۈپ، شەكىلۋازلىق، بىيۇروكراتلىق، ھەشەمەتچىلىك ۋە ئىسراپچىلىققا قەتئىي قارشى تۇرۇشى شەرت. ‹‹ئۈچتە تەلەپچان، ئۈچتە راستچىل بولۇش›› تەلىپىنى ئەمەلىيەتتە كۆرسىتىش ئىدىيە ئاڭلىقلىقى ۋە ھەرىكەت ئاڭلىقلىقىنى ھەقىقىي كۈچەيتىپ، باشلامچىلىق بىلەن ياخشى سىياسىي مۇھىت يارىتىشى شەرت. ‹‹جۇڭگو كوممۇنىستىك پارتىيەسىنىڭ پاك، تەلەپچان بولۇش مىزانى›› قاتارلىق ئالاقىدار بەلگىلىمىلەرگە قەتئىي ئەمەل قىلىپ، خەلقنى كۆزلەش، ئەمەلىيەتچىل، پاك بولۇشنى ھەقىقىي ئىشقا ئاشۇرۇشى شەرت.

    ئەسكەرتىش:

    تورىمىزدىكى ئەسەرلەرنىڭ نەشىر ھوقۇقى شىنجاڭ ئۇيغۇر ئاپتونوم رايونلۇق ئاخبارات ئىشخانىسىغا تەۋە، ھەرقايسى تاراتقۇلار كۆچۈرۈپ تارقاتقاندا «تەڭرىتاغ تورى›› دەپ مەنبەنى ئېنىق ئەسكەرتىشى كېرەك، بولمىسا قانۇنىي جاۋابكارلىقى سۈرۈشتە قىلىنىدۇ.